Rito ra Yehovha ri tirha hi matimba.
Pisalema ya Davhida.
1N'wina vana va Xikwembu, nyikani Yehovha,
Nyikani Yehovha ku kwetsima ni xichavo,
2Nyikani Yehovha ku twakala ka vito ra yena.
Khinsamelani Yehovha, mi ambele xo kwetsima!
3Rito ra Yehovha ri pfuma ehenhla ka mati,
Xikwembu xo kwetsima xi twakarisa ku dzindza;
Yehovha u le henhla ka mati lamakulu.
4Rito ra Yehovha ri ni matimba,
Rito ra Yehovha ri twakala hi vukulu,
5Rito ra Yehovha ri tshovelela tikedari;
Yehovha u tshovelela tikedari ta Lebanoni.
6U ti khanisa kukotisa marhole;
Lebanoni, na Siriyoni, kukotisa tinyarhi letintshwa.
7Rito ra Yehovha ri hoxa malangavi ya ndzilo.
8Rito ra Yehovha ri tsekatsekisa mananga.
Yehovha u tsekatsekisa mananga ya Kadexe.
9Rito ra Yehovha ri tswarisa tinhlangu,
Ri hlanhla swihlahla.
Etempeleni ya yena hinkwaswo swi ku: “Ku kwetsima!”
10Yehovha a a fuma enguveni ya ndhambi;
Yehovha u ta fuma a ri Hosi hi laha ku nga heriki.
11Yehovha u ta nyika tiko ra yena matimba;
Yehovha u ta katekisa tiko ra yena hi ku rhula.
