Ku ta ka Hosi ya ku kwetsima.
Pisalema ya Davhida.
1Misava i ya Yehovha, ni leswi nga eka yona,
Misava ni lava akeke eka yona.
2Hikuva u yi sungurile ehenhla ka malwandle,
U yi tiyisile ehenhla ka milambu.
3I mani la nga ta tlhandlukela entshaveni ya Yehovha?
Kambe i mani la nga ta tshama evukwetsimelweni bya yena?
4Hi loyi a nga ni swandla leswi nga riki na nandzu, ni mbilu leyi tengeke.
Loyi a nga nyiketiki moya wa yena ku hemba mavunwa,
La nga hlambanyiki hi ku xisa.
5U ta vona ku kateka ka Yehovha,
Ni ku lulama ka Xikwembu xa ku hlayiseka ka yena.
6Hi rona rixaka ra lava xi lavaka,
Ra lava lavisaka mombo wa wena, Yakobo.
7N'wina tinyangwa, tlakusani marimba ya n'wina!
Titlakuseni, n'wina tinyangwa ta masiku lama nga heriki!
Ku ta nghena hosi ya ku kwetsima.
8Hosi ya ku kwetsima, i mani?
I Yehovha wa matimba la nga tsandziwiki ha nchumu,
Yehovha la nga ni matimba enyimpini.
9N'wina tinyangwa, tlakusani marimba ya n'wina!
Ma tlakuseni, n'wina tinyangwa ta masiku!
Ku ta nghena hosi ya ku kwetsima.
10Hosi ya ku kwetsima i mani?
I Yehovha wa tinyimpi;
Hi yena la nga hosi ya ku kwetsima.
