TIPISALEMA 144

₁A ku vongiwe Yehovha, matimba ya mina,

La letelaka mavoko ya mina nyimpi,

Ni tintiho ta mina ku lwa.

₂Hi yena tintswalo ta mina ni khokholo ra mina,

Khokholo lero tlakuka ra mina ni mulamuleri wa mina,

Xitlhangu ni xichavelo xa mina,

Yena la ndzi tsongahatelaka tiko ra mina.

₃Yehovha, xana munhu i yini, leswaku u n'wi tiva?

Ni n'wana wa munhu, leswaku u n'wi hlayisa?

₄Munhu u fana ni ku hefemula,

Masiku ya yena ma fana ni ndzhuti lowu hundzaka.

₅Yehovha, xikisa matilo ya wena, u xika!

Khumba tintshava ti mpukuka!

₆Hatimisa rihati, u hangalasa valala va mina!

Copa miseve ya wena, u va hangalasa!

₇Tshambuluta mavoko ya wena, u ndzi kutsula,

U ndzi humesa ematini lamakulu,

U ndzi ponisa evokweni ra vana va matiko,

₈Valavo, milomu ya vona yi vulaka swahava,

Ni voko ra vona ra xinene ri nga voko ra vuxisi!

₉Oho Xikwembu!

Ndzi rhandza ku ku yimbelelela risimu lerintshwa,

Ndzi ta ku dzunisa hi haripa ya khume ra tingoti.

₁₀Hi wena la nyikaka tihosi ku hlayiseka,

Wena la lamuleleke nandza wa wena, Davhida, etlharini leri dlayaka.

₁₁Ndzi kutsule, u ndzi ponisa evokweni ra vana va matiko,

Lava, milomu ya vona yi vulavulaka swahava,

Lava, voko ra vona ra xinene ri nga voko ra vuxisi.

₁₂Vana va hina va xinuna va fana ni swimilana,

Va kula evuntshweni bya vona;

Vana va hina va vanhwana va fana ni maribye lama vatliweke,

Lama vombisaka tindlu ta tihosi.

₁₃Tingula ta hina ti tele swakudya swa tinxakaxaka.

Tihomu ta hina ti andzile hi makume ya madzana,

Ti dya emadyelweni ya hina hi madzana ya madzana.

₁₄Mathokazi ya hina ma tswala, ku hava khombo,

Ku hava ku hlaselwa ni mikosi emitsendzeleni ya hina.

₁₅Ku katekile tiko leri nga tano!

Ku katekile tiko leri Yehovha nga Xikwembu xa rona!