TIPISALEMA 139

₁Yehovha! U ndzi kambile, wa ndzi tiva;

₂U tiva loko ndzi tshama, ni loko ndzi pfuka;

U tiva miehleketo ya mina u ri kule;

₃Wa ndzi kamba loko ndzi famba, ni loko ndzi etlela,

Kutani u tiva tindlela ta mina hinkwato.

₄Hikuva rito loko ri nga si fika eririn'wini ra mina,

U ri tivile hinkwaro, oho Yehovha!

₅U ndzi rhendzele emahlweni ni le ndzhaku,

U veke xandla xa wena henhla ka mina.

₆Ku tiva loko, i mahlori eka mina,

Ku tlakukile ngopfu ku tlurisa, ndzi tsandzeka ku ku fikela.

₇Xana ndzi nga ya kwihi, ndzi va kule ni moya wa wena?

Kumbe ndzi nga balekela kwihi, ndzi va kule ni mombo wa wena?

₈Loko ndzi tlhandlukela ematilweni, u kona;

Ni loko ndzi ya etlela exivandleni xa vafi, ni kwalaho u kona.

₉Ni loko ndzi khandziya etimpapeni ta vurhonga,

Ndzi ya aka emakumu ka lwandle,

₁₀Na kona voko ra wena ri ta ndzi fambisa,

Ni voko ra wena ra xinene ri ta ndzi khoma.

₁₁Loko ndzi ku:

“A ndzi fihliwe hi munyama —

Vusiku byi ta xa emahlweni ka mina.”

₁₂Eka wena, munyama wu nga ka wu nga endli ntima,

Vusiku byi xa kukotisa nhlekanhi,

Munyama wu nga kota ku vonakala.

₁₃Kunene hi wena la vumbeke xisuti xa mina,

U ndzi vumbile ekhwirini ra manana.

₁₄Ndza ku khensa hikwalaho ka mahlori ya xivumbeko xa mina.

Mitirho ya wena ya hlamarisa,

Moya wa mina wa swi tiva swinene ngopfu.

₁₅Miri wa mina a wu fihliwanga ka wena,

Loko ndzi ri karhi ndzi vumbiwa exihundleni,

Ndzi lukeleriwa swirho eku enteni ka misava.

₁₆Mahlo ya wena ma vonile ku vumbiwa ka swona,

Kutani masiku ya mina ma tsariwile hinkwawo ebukwini ya wena;

Ma hlayiwile ma nga si va kona.

₁₇Oho Xikwembu miehleketo ya wena yi ndzi tsandzisa ku yini!

Ntsengo wa yona yi tarisile swonghasi!

₁₈Loko ndzi rhandza ku yi hlaya, yi tlula sava hi ku tala.

Loko ndzi khindlimuka ndza ha ri na wena.

₁₉Oho Xikwembu, ingi loko u lovisa lowo biha!

N'wina, vanhu va ngati, tshinelani kule na mina!

₂₀Lava nga valala eka wena, va ku vula hi ku biha,

Va karhi va tlanga hi vito ra wena!

₂₁Yehovha, a ndzi va venganga lava ku vengaka xana?

A ndzi karihelanga lava ku pfukelaka xana?

₂₂Ndzi va vengile hakunene; ka mina i valala.

₂₃Xikwembu, ndzi kambe, u tiva mbilu yanga!

Ndzi ringe, u tiva ku anakanya ka mina!

₂₄Languta loko ndzi famba hi ndlela ya ku homboloka,

Kutani u ndzi fambisa endleleni ya vutomi lebyi nga heriki.