TIPISALEMA 135

₁Dzunisani Yehovha!

Dzunisani vito ra Yehovha,

Ri dzuniseni, n'wina malandza ya Yehovha,

₂Lava yimaka endlwini ya Yehovha,

Erivaleni ra yindlu ya Xikwembu xa hina!

₃Dzunisani Yehovha! Hikuva Yehovha u nene;

Yimbelelani hi vito ra yena, hikuva ra nandziha.

₄Hikuva Yehovha u tihlawulele Yakobo,

Na Israele, leswaku a va ndzhaka ya yena.

₅Ndzi tiva leswaku Yehovha i nkulukumba,

Hosi ya hina yi kulukumba ngopfu ku tlula swikwembu hinkwaswo.

₆Hinkwaswo leswi Yehovha a swi rhandzaka, u swi endla

Ematilweni ni le misaveni,

Emalwandle ni le swidziveni hinkwaswo.

₇Hi yena la tlakusaka mapapa emakumu ka misava,

La hatimisaka tilo, a nisaka mpfula,

A humesaka mimoya evuhlayiselweni byakwe.

₈Hi yena la beke mativula ya Egipta,

Ku sungula ka vanhu ku ya fika ka swifuwo.

₉U humesile xikarhi ka wena, eEgipta, swikombiso ni masingita,

Ku ba Faro ni malandza ya yena hinkwawo.

₁₀Hi yena la loviseke matiko layo tala,

Kutani a dlaya tihosi ta matimba,

₁₁Sihoni, hosi ya Vaamori, na Ogo hosi ya Baxani,

Ni tihosi hinkwato ta Kanana;

₁₂Kutani tiko ra vona hinkwaro a ri nyiketa ku va ndzhaka,

Ndzhaka ya Vaisraele; ri va tiko ra vona.

₁₃Yehovha! Vito ra wena ri tshama hi laha ku nga heriki,

Yehovha! Wa tsundzukiwa etinxakeni ta tinxaka.

₁₄Hikuva Yehovha u ta avanyisa tiko ra yena, U ta twela malandza ya yena vusiwana.

₁₅Swifaniso swa swikwembu swa matiko i ntsopfu ni nsuku,

I ntirho wa mavoko ya vanhu.

₁₆Swi ni milomu, kambe a swi vulavuri,

Swi ni mahlo, kambe a swi voni,

₁₇Swi ni tindleve, kambe a swi twi,

Ku hefemula a ku kona emilon'wini ya swona.

₁₈Lava swi endlaka va fana na swona,

Swin'we ni hinkwavo lava swi tshembaka.

₁₉N'wina va yindlu ya Israele, khensani Yehovha!

N'wina va yindlu ya Aroni, khensani Yehovha!

₂₀N'wina va yindlu ya Levhi, khensani Yehovha!

N'wina lava chavaka Yehovha, khensani Yehovha!

₂₁Yehovha la tiakeleke Yerusalema, a a khensiwe eSiyoni!

Dzunisani Yehovha!