TIPISALEMA 132

₁Yehovha, tsundzuka Davhida, ni ku xaniseka ka yena hinkwako!

₂U hlambanyile ka Yehovha,

U tshembisile lowa matimba wa Yakobo,

a ku:

₃“A ndzi nga ha ngheni endlwini ya mina,

A ndzi nga wisi emasangwini ya mina,

₄A ndzi nga nyiketi mahlo ya mina vurhongo,

Ni tinkohe ta mina ku khudzehela,

₅Ndzi nga si kumela Yehovha vuako,

Ni Lowa matimba wa Yakobo yindlu.”

₆Languta, hi swi twile loko yi vuriwa Efrata,

Hi yi kumile emasin'wini ya Yaare ...

₇A hi ngheneni endlwini ya yona,

A hi khinsameni evunavelweni bya yona! ...

₈Pfuka Yehovha, u nghena evuwiselweni bya wena,

Wena ni areka ya vukulu bya wena!

₉Vaprista va wena a va ambale ku lulama,

Ni lava ku rhandzaka va havela hi ku tsaka!

₁₀Hikwalaho ka Davhida, nandza wa wena,

U nga fularheli muhlawuriwa wa wena!

₁₁Yehovha u endlile nhlambanyo lowunene ka Davhida,

A nga ka a nga hundzuki ka yona, u te:

“Ndzi ta veka exiluvelweni xa wena n'wana la velekiweke hi wena.

₁₂Loko vana va wena va hlayisa ntwanano wa mina

Ni swileriso leswi ndzi nga ta va dyondzisa swona,

Vana va vona va ta tshamisa exiluvelweni xa wena hi masiku.”

₁₃Hikuva Yehovha u tihlawulele Siyoni,

U rhandzile ku ta tiakela kona, a ku:

₁₄“La, i vuwiso bya mina hi laha ku nga heriki;

Ndzi rhandza ku aka kona, hikuva ndzi ku naverile.

₁₅Ndzi ta ku nyika ndzalo,

Kutani vapfumari va kona ndzi ta va xurhisa hi vuswa;

₁₆Ndzi ta funengeta vaprista va kona hi ku hlayiseka,

Ni vahlawuriwa va ta havela hi ku tsaka.

₁₇Kona ndzi ta tiyisa vuhosi bya Davhida,

Ndzi lunghisela muhlawuriwa wa mina rivoni,

₁₈Ndzi ta funengeta valala va yena hi tingana,

Kutani harhi ya vuhosi ya yena yi ta kwetsima enhlokweni ya yena.”