TIPISALEMA 118

₁Dzunisani Yehovha, hikuva u lulamile.

Hikuva, nsovo wa yena, hi lowu nga heriki!

₂A ku vule Israele:

“Ina, nsovo wa yena, hi lowu nga heriki!”

₃A ku vule yindlu ya Aroni:

“Ina, nsovo wa yena, hi lowu nga heriki!”

₄A va vule, lava chavaka Yehovha:

“Ina, nsovo wa yena, hi lowu nga heriki!”

₅Emakhombyeni ya mina ndzi khongerile Yehovha;

Yehovha u ndzi yingisile, a ndzi veka eku anameni.

₆Yehovha wa ndzi yimele, a ndzi nga chavi nchumu.

Munhu a nga ndzi endla yini?

₇Yehovha u na mina, kun'we ni lava ndzi pfunaka,

Mina, ndza titsakela loko ndzi languta lava ndzi vengaka.

₈Ku tsutsumela eka Yehovha

Ku tlula ku tshemba munhu.

₉Ku chavela eka Yehovha

Ku tlula ni loko munhu a tshemba tihosi!

₁₀Matiko hinkwawo ma ndzi rhendzele:

Hi vito ra Yehovha, kunene; ndzi ta ma herisa,

₁₁Ma ndzi rhendzele.

Hi vito ra Yehovha, kunene, ndzi ta ma herisa,

₁₂Ma ndzi rhendzele tani hi tinyoxi,

Ma ta timeka kukota ndzilo wa mitwa!

Hi vito ra Yehovha, kunene, ndzi ta ma herisa.

₁₃A wu ndzi susumeta hi matimba ku ndzi wisa,

Kambe Yehovha u ndzi pfunile.

₁₄Yehovha, i matimba ya mina, ni risimu ra mina,

Hi yena la ndzi ponisaka.

₁₅Rito ra mihuvo ni ra ku ponisiwa

Ri twakala emixaxeni ya lavo lulama:

Voko ra xinene ra Yehovha ri tirhe hi matimba!

₁₆Voko ra xinene ra Yehovha ri tlakukile ngopfu!

Voko ra xinene ra Yehovha ri tirhe hi matimba!

₁₇Ndzi nga ka ndzi nga fi, ndzi ta hanya,

Kutani ndzi ta vula swiendlo swa Yehovha.

₁₈Yehovha u ndzi bile ngopfu,

Kambe a nga ndzi nyiketanga eku feni.

₁₉Ndzi pfuleleni tinyangwa ta ku lulama:

Ndzi ta nghena, ndzi vonga Yehovha!

₂₀Nyangwa ya Yehovha, hi leyi,

Lava lulameke va ta nghena ha yona.

₂₁Ndzi ta ku tlangela, hikuva u ndzi yingisile,

U ve ku hlayiseka ka mina.

₂₂Ribye leri soriweke hi vaaki

Ri endliwile ribye ro rhanga ra yinhla.

₂₃Leswo swi endliwe hi Yehovha;

I singita emahlweni ka hina.

₂₄Hi rona siku leri endliweke hi Yehovha,

A hi tsakeni, hi tsakela rona!

₂₅Oho Yehovha! Ponisa!

Oho Yehovha! Katekisa!

₂₆A ku katekisiwe la taka hi vito ra Yehovha;

Ha mi katekisa, hina va yindlu ya Yehovha!

₂₇Yehovha i Xikwembu, u hi voningile.

Bohani hi mapindza mhamba ya nkhuvo,

Mi yi tisa etimhondzweni ta alitari.

₂₈U Xikwembu xa mina, ndzi ta ku tlangela!

U Xikwembu xanga, ndzi ta ku dzunisa.

₂₉Dzunisani Yehovha, hikuva u lulamile

Hikuva tintswalo ta yena hi leti nga heriki.