TIPISALEMA 114

₁Kuteloko Israele a humile eEgipta,

Yindlu ya Yakobo loko yi suke etikweni ra ririmi rin'wana,

₂Yuda u hundzuke ku kwetsima ka Yehovha,

Na Israele ku fuma ka yena.

₃Lwandle loko ri n'wi vona, ri baleka,

Yena Yordani a tlhelela endzhaku;

₄Tintshava ti tlulatlula kukotisa tinyimpfu,

Switsunga kukotisa swinyimpfana.

₅A wu ri na yini, wee lwandle leswi u nga baleka,

Na wena Yordani, loko u tlhelela endzhaku?

₆N'wina tintshava mi tlulatlulela yini kukotisa tinyimpfu,

Na n'wina switsunga mi kotisela yini swinyimpfana?

₇Wena, misava, rhurhumela emahlweni ka Hosi!

Emahlweni ka Xikwembu xa Yakobo,

₈Lexi hundzuluxaka ribye ri va tiva ra mati,

Ni tamba ma va mati lama pfelelaka!