TIPISALEMA 112

₁Dzunisani Yehovha!

Ku katekile munhu la chavaka Yehovha,

A tsakelaka ngopfu milawu ya yena.

₂Rixaka ra yena ri ta va ni matimba emisaveni;

Vatukulu va lavo lulama va ta katekisiwa.

₃Ndzalo ni rifuwo swi ta va kona endlwini ya yena,

Ku lulama ka yena ku tshama hi masiku.

₄Ku vonakala ku xela lava lulameke emunyameni,

Ni lava nga ni tintswalo, ni nsovo, ni ku lulama.

₅Ku katekile munhu la hananaka a va a lomba;

A lulamisa timhaka ta yena hi ku anakanya,

₆Hikuva a nga ka a nga tsekatsekisiwi ni siku ni rin'we.

La lulameke a tsundzukiwa hi masiku,

₇A nga ka a nga chavi mpfumawulo lowo biha;

Mbilu ya yena yi tiyile, yi titshembela Yehovha.

₈Mbilu ya yena yi tiyile swinene, a nga chavi nchumu,

Mahlo ya yena ma ko ma tsakisiwa hi valala va yena.

₉A avela, a nyika swisiwana;

Ku lulama ka yena i ka masiku hinkwawo;

Rimhondzo ra yena ri yima hi ku kwetsima.

₁₀Lowo biha u vona sweswo, kutani a vilela ha swona,

U getsela meno, a omelela,

Ku navela ka lavo biha ku endliwa swahava.