TIPISALEMA 11

₁Ndzi tshembile Yehovha;

Xana mi nga vurisa ku yini eka moya wa mina:

“Tsutsumela etintshaveni ta n'wina tani hi nyanyana”?

₂Hikuva lavo homboloka va khotsa mavurha ya vona,

Va rhiyeketa miseve ya vona erisingeni,

Ku copa emunyameni vanhu va timbilu leti lulameke.

₃Loko masungulo ma mbundzukile,

La lulameke a nga endlisa ku yini?

₄Yehovha u le tempeleni ya yena leyo kwetsima,

Yehovha u ni xiluvelo xa yena ematilweni;

Mahlo ya yena ma languta,

Tinkohe ta yena ti ringa vana va vanhu.

₅Yehovha u kamba la lulameke;

Moya wa yena wu venga lowo homboloka ni la rhandzaka ku pfukela matimba.

₆U ta nisela lavo homboloka mitlhamu, ni ndzilo ni xivavula;

Mheho leyi hisaka, i xinwelo lexi va xi averiweke.

₇Hikuva Yehovha u lulamile, u rhandza mitirho ya ku lulama;

Vanhu lava lulameke va ta hlalela nghohe ya yena.