Tiko ra Israele ri ta va muhluri.
Risimu. Pisalema ya Davhida.
1Oho Xikwembu!
Mbilu ya mina yi tiyile!
Ndzi ta yimbelela tinsimu, ndzi yimbelela hi haripa
Na kona ku kwetsima ka mina ku ta ku dzunisa.
2Pfukani n'wina psalteri ni haripa ya mina,
Ndzi ta pfuka ni vurhonga.
3Ndzi ta ku dzunisa, Yehovha, exikarhi ka tinxaka,
Ndzi ta ku yimbelela exikarhi ka matiko,
4Hikuva tintswalo ta wena ti titlakukile ehenhla ka matilo,
Ni ku tshembeka ka wena ku fike emapapeni,
5Oho Xikwembu!
Titlakuse henhla ka matilo,
Ku kwetsima ka wena a ku voninge misava hinkwayo!
6Ponisa hi voko ra wena ra xinene, u ndzi yingisa,
Leswaku varhandziwa va wena va ta hlayiseka.
7Xikwembu xi vurile eku kwetsimeni ka xona xi ku: “Ndzi ta hlula,
Ndzi ta pambula Xikeme, ndzi ta pima nkova wa Sukoti.
8Giliyadi i wa mina; Manase i wa mina!
Efrayimi, i xiseketelo xa nhloko ya mina;
Yuda, ndzi n'wi vekile ku lerisa milawu ya mina.
9Mowabu i nkambana lowu ndzi hlambelaka eka wona;
Ndzi ta hoxela ntanghu ya mina ehenhla ka Edomu;
Ndzi ba huwa ya ku tsaka etikweni ra Vafilista.”
10I mani la nga ta ndzi yisa emutini lowa matimba?
I mani la nga ta ndzi fambisa ku ya fika eEdomu?
11A hi wena, Xikwembu lexi hi cukumeteke?
U nga ha humi ni tinyimpi ta hina!
12U hi pfuna ku ta huma ekhombyeni,
Hikuva ku pfuna ka munhu i ka hava!
13Ha Xikwembu, hi ta hlula,
Hi xona xi nga ta kandziyela valala va hina.
