TIPISALEMA 102

₁Oho Yehovha, yingisa ku khongela ka mina,

Ku huwelela ka mina a ku fike eka wena!

₂U nga ndzi fihleri mombo wa wena hi siku ra mahlomulo ya mina!

Rhiya ndleve ya wena loko ndzi vitana!

Hatlisa u ndzi hlamula!

₃Hikuva masiku ya mina ma nyumba kukotisa musi;

Ni marhambu ya mina ma hisa kukota swisa,

₄Mbilu ya mina yi biwile, yi vunile tani hi byanyi,

Ndzi rivala ni ku dya vuswa bya mina.

₅Ku konya ka mina i kukulu swonghasi;

Marhambu ya mina ma namarhela enyameni ya mina;

₆Ndzi fana ni gumba ra le mananga,

Ni xuhunu exikarhi ka marhumbi.

₇A ndza ha kumi vurhongo;

Ndzi fana ni nyanyana ya xisiwana exihlungweni xa yindlu.

₈Hi masiku hinkwawo valala va mina va ndzi sandza;

Va ndzi karihela, va hlambanya hi vito ra mina.

₉Ndzi dya ntshuri ematshan'weni ya vuswa,

Ndzi pfanganyisa swakunwa swa mina ni minyembeti,

₁₀Hikwalaho ka ku hlundzuka ni ku kariha ka wena;

Kunene u ndzi tlakurile u ndzi wisela ehansi.

₁₁Masiku ya mina ma fana ni ndzhuti wa madyambu,

Ndzi omile kukota byanyi.

₁₂Kambe wena Yehovha, u tshama hi laha ku nga heriki,

Ni ku tsundzukiwa ka wena etinxakeni ta tinxaka.

₁₃U ta pfuka, u tsetselela Siyoni,

Hikuva hi wona nkarhi wa ku n'wi tsetselela;

Nkarhi lowu vekiweke, wu fikile.

₁₄Hikuva malandza ya wena ma rhandza maribye ya Siyoni,

Ma rhandzisisa ni ntshuri wa yena.

₁₅Hi laha matiko hinkwawo ma nga ta chava vito ra Yehovha,

Ni tihosi hinkwato ta misava ti chava ku kwetsima ka wena.

₁₆Kutakuloko Yehovha a ta pfuxa Siyoni,

U ta tikombisa eku kwetsimeni ka yena.

₁₇U ta yingisela ku khongela ka xisiwana,

A nga ka a nga nyenyi ku khongela ka yena.

₁₈Mhaka leyi yi ta tsaleriwa rixaka leri taka,

Ni tiko lerintshwa ri ta dzunisa Yehovha.

₁₉Hikuva Yehovha u languta, a ri exivandleni lexo tlakuka xa vukwetsimelo bya yena,

Ematilweni ya le henhla, u languta misava,

₂₀Ku yingisa ku konya ka lava bohiweke,

Ni ku tshunxa lava hlawuleriweke rifu,

₂₁Leswaku va ta twarisa vito ra Yehovha le Siyoni,

Ni ku dzuna ka yena le Yerusalema,

₂₂Loko matiko hinkwawo ma ta hlengeletana,

Ni ku fuma hinkwako, ku tirhela Yehovha.

₂₃U tshovile matimba ya mina endleleni,

U komisile masiku ya mina.

₂₄Ndzi te: “Oho Xikwembu xanga!

U nga ndzi susi, ndza ha ri exikarhi ka masiku ya mina;

Malembe ya wena ma tshama ma ri kona etinxakeni ta tinxaka.”

₂₅I khale u vekile masungulo ya misava,

Ni matilo, i ntirho wa mavoko ya wena,

₂₆Swi ta hela, kambe wena u ta tama u ri kona;

Swi ta dyuhala kukota nguvu;

U ta swi hundzuluxa tani hi xifunengelo, kutani swi ta hundzuka.

₂₇Kambe wena u tama u ri wena.

Ni malembe ya wena ma nga ka ma nga heri.

₂₈Vana va malandza ya wena va ta tshamiseka,

Ni vatukulu va vona va ta tiyisiwa emahlweni ka wena.