1Vutlhari byi akile yindlu ya byona,
Byi vatlile timhandze ta yona ta ntlhanu na timbirhi.
2Byi tlhavile tihomu ta byona, byi pfanganyisile vhinyo,
Byi andlarile tafula ra byona.
3Byi rhumile malandza ya byona.
Byi yimile eswitsungeni swa muti, byi huwelela, byi ku:
4“Mani na mani la rivaleke, a a hambukele halenu.”
Eka lava pfumalaka ku anakanya, byi ku:
5“Tanani, mi dya swakudya swa mina,
Mi nwa vhinyo leyi pfanganyisiweke.
6Tshikani ku rivala mi ta hanya,
Mi famba endleleni ya vutlhari!”
7La layaka musandzi u tilavela xisandzu,
Ni la tshinyaka lowo biha wa kuma xivati.
8U nga tshuki u laya musandzi, kumbe xana u ta ku venga,
Laya wa ku tlhariha, yena u ta ku rhandza.
9Dyondzisa la nga ni ku anakanya, u ta engeta a tlhariha,
U dyondzisa la lulameke, u ta engetela ku tiva ka yena.
10Masungulo ya vutlhari i ku chava Yehovha.
Ni vutivi bya lava tengeke hi kona ku twisisa.
11Hikuva ha mina, masiku ya wena ma ta andzisiwa,
Kutani malembe ya ku hanya ka wena ma ta lehisiwa.
12Loko u tlhariha, u ta pfuniwa hi vutlhari bya wena;
Kambe loko u ri musandzi, hi wena swaku u nga ta onhakeriwa.
13Ku rivala i wansati wa pongo,
A ku na mbilu yo rhula, a ku tivi nchumu.
14Ku tshamisa emahlweni ka nyangwa ya yindlu ya kona,
Exitulwini xo tlakuka, exitsungeni xa muti.
15Ku huwelela lava hundzaka hi ndlela,
Lava fambaka hi ku lulama,
16Ku ku:
“Mani na mani la rivaleke a a hambukele halenu,”
Ni ka la pfumalaka vutlhari, ku ku:
17“Mati lama yiviweke ma nandziha,
Ni vuswa lebyi dyiwaka exihundleni bya xawula!”
18Kasi yeloyi a nga tivi leswaku hilaha va ku fa va nga kona,
Ni leswaku lava a va rhambeke va le mikoveni ya xivandla xa vafi.
