1Marito ya Aguri, n'wana Yake. Timhaka leti dyondzisiweke hi wanuna yeloyi, a byela Itiele na Ukala.
2Kunene ndzi hungukile ku tlula hinkwavo,
A ndzi na ku twisisa ka vanhu;
3Hikuva a ndzi dyondzanga vutlhari,
A ndzi na ku tiva ka vakwetsimi.
4I mani la tlhandlukeleke etilweni a tlhela a xikela kona?
I mani la fumbarheleke mheho hi swandla swa yena?
La hlengeleteke mati hinkwawo engubyeni ya yena, i mani xana?
I mani loyi a tumbuluxeke matlhelo hinkwawo ya misava?
Vito ra yena i mani?
I mani vito ra n'wana wa yena loko u n'wi tiva?
5Marito hinkwawo ya Xikwembu ma ringiwile efulweni,
I xitlhangu eka lava chavelaka eka xona.
6U nga engeteli marito ya xona,
Xi nga ti ku holovela, u kumiwa u ri wa mavunwa.
7Swimbirhi ndzi kombela eka wena:
U nga ndzi tsoni ndzi nga si fa!
8Tshineta ekule na mina ku kanganyisa ni marito ya mavunwa.
U nga ndzi hi vusiwana, hambi ku ri ku fuwa;
Ndzi wundle hi swakudya leswi ndzi ringanaka.
9Kumbexana loko ndzi xurhile ndzi nga ku landzula,
Ndzi ku: “Yehovha i mani?”
Kumbe xana, loko ndzi ri xisiwana, ndzi yiva,
Ndzi tlanga hi vito ra Xikwembu xa mina.
10U nga hehli nandza eka n'wini wa yena,
A nga ti ku rhukana, u kuma nandzu.
11Ri kona rixaka rin'we leri rhukanaka tata wa rona,
Ri nga khensi mana wa rona.
12Ku ni rixaka rin'wana leri baseke emahlweni ka rona,
Kasi a ri si tihlantswa thyaka ra rona;
13Ina, rixaka ri kona ra mahlo lama tlakukeke,
Ra tinxiyi leto leha;
14Rixaka ri kona ra meno laya kotaka mafumu,
Ra tinhlaya leti fanaka ni mikwana,
Ku dya va nhlomulo emisaveni,
Ni ku heta vapfumari exikarhi ka vanhu.
15Nyulu wu ni vana va xisati vambirhi, va nge: “Nyika! Nyika!”
Swilo swinharhu swi kona leswi nga xurhiki,
Ndzi nga ku swa mune leswi nga vuriki ni siku ni rin'we:
“Swi ringanile!”
16I xivandla xa vafi, i khwiri leri nga tswariki,
Ni misava leyi nga xurhiki mati,
Ni ndzilo lowu nga vuriki ni siku ni rin'we:
“Swi ringene.”
17Tihlo ra munhu leri solaka tatana,
Leri sandzaka ku yingisa manana,
Mawukuwuku ya le nambyeni ma ta ri boxa,
Mavondlo ya gama ma ta ri dya.
18Swilo swinharhu swi kona leswi ndzi hlulaka,
Ndzi nga ku swa mune leswi ndzi nga swi tiviki:
19Ntila wa gama empfhukeni wa le tilweni,
Ni ntila wa nyoka ebakweni ra ribye,
Ni ntila wa byatso exikarhi ka lwandle,
Ni ntila wa wanuna eka wanhwana.
20Mikhuva ya wansati wa mbiri yi tano na yona:
Wa dya, a tihlangula nomu,
A ku: “A ndzi endlanga swo biha!”
21Misava yi rhurhumerisiwa hi swilo leswinharhu,
Ndzi nga ku swa mune swi kona leswi yi nga ka yi nga swi rhwali;
22I khumbi leri hundzukeke hosi,
Ni xihunguki lexi xurheke vuswa,
23Ni wansati la nyenyiweke loko a tshuka a tekiwa,
Ni nandzanyana wa wansati loko a dya ndzhaka ya nkosikazi ya yena.
24Swivandzana swa mune leswitsanana swi kona la emisaveni,
Kambe swi tlharihile ngopfu:
25I vusokoti, ri nga tikwana leri pfumalaka matimba,
Kasi hi ximumu ri hlengeleta swakudya;
26I timbila, ri nga tikwana leri tsaneke,
Kasi ri tihlawulela tindlu emaribyeni;
27I tinjiya, hambi ti nga ri na hosi,
Ti famba hinkwato hi mavandla;
28I lumpfana leri u ri tamelaka hi mavoko,
Kasi ri nghena etindlwini ta tihosi.
29Swilo swinharhu leswi langutekaka,
I mune leswi mafambele ya swona ma tsakisaka:
30I nghala yi nga nhenha exikarhi ka swivandzana hinkwaswo,
Leyi nga chaviki nchumu;
31I hanci leyi lunghiseriweke nyimpi kumbe xiphongo;
Hambi yi ri hosi leyi munhu a nga faneriki ku yi kaneta.
32Kungakuloko u endlile vusinge hi ku tikukumuxa,
U anakanya leswo biha, veka voko enon'wini!
33Hikuva ku kama ntswamba swi humesa phehlwa,
Ku kama tinhompfu swi humesa mongolo,
Ku hlohlotela vukari swi humesa timholovo.
