SWIVURISO 26

₁Kukotisa gamboko hi ximumu, ni mpfula enkarhini wa ku tshovela,

Na xona xichavo a xi faneri xihunguki.

₂Hilaha nyanyana yi hahelaka hala ni hala, na tona timbewulana ti wongawonga ntsena,

Swi tano ni ku rhukana ka hava, a ku tirhi nchumu.

₃Nkharisa wu fanele hanci, ni tomu mbhongolo,

Ni nhonga nhlana wa xihunguki.

₄U nga hlamuli xihunguki hi vuhunguki bya xona,

U nga ti fana na xona.

₅U hlamula xihunguki hi vuhunguki bya xona,

Xi nga ti tshuka xi tipimisela wa vutlhari.

₆La rhumaka timhaka hi xihunguki

U titsema milenge, u nwa khombo.

₇Hilaha milenge ya xilema yi lengalengaka ntsena,

Ku vulavula ka vutlhari ku kota sweswo enon'wini wa xihunguki.

₈Ku dzunisa xihunguki

Swi fana ni ku bohelela ribye exipelupelwini.

₉Ku vulavula ka tintlhari enon'wini wa xihunguki,

I rhavi ra mitwa evokweni ra mupyopyi.

₁₀Munhu la tholaka xihunguki ni mutsendzeleki,

I mutameri wa vurha la tlhavaka vanhu.

₁₁Ku kota mbyana loko yi tlhela yi dya mahlanta ya yona,

Xihunguki xi vuyela sweswo evuhungukini bya xona.

₁₂Xana u vone munhu la tivonaka vutlhari?

Wa rihuhu u tshembeka ku tlula yeloyi.

₁₃Lolo ri ri:

“Nghala yo dzumadzuma yi kona endleleni,

Nghala yi kona emitsendzeleni!”

₁₄Rivanti ra yindlu ri hundzuluka eswikhuleketweni swa rona,

Ni lolo emasangwini ya rona.

₁₅Lolo ri yisa voko enkambaneni,

Kambe ri hluleka ku ri tlherisela enon'wini wa rona hi ku karhala.

₁₆Lolo ri tivona ku tlhariha

Ku tlula va ntlhanu na vambirhi lava hlamulaka swinene.

₁₇Muhundzi wa ndlela la nghenaka etimholoveni ta van'wanana hi ku leva,

U khoma mbyana hi tindleve.

₁₈La dyelelaka warikwavo,

U fana ni munhu wa nsele

₁₉La hoxaka swisa, ni miseve, ni rifu,

A ku: “A ndzo tlanga ntsena.”

₂₀Ndzilo wu timeka hi ku pfumala tihunyi;

Swi tano ni timholovo,

ti hela loko muhlevi ku ri hava.

₂₁Makala ni tihunyi,

swi tshivela ndzilo;

Swi tano ni munhu wa timholovo,

u pfurhisa ku holova.

₂₂Ku vulavula ka muhlevi i swakudya leswi xawulaka,

Swi nghena, swi va swi nyupela endzeni ka marhumbu.

₂₃Milomu leyo nandziha ni mbilu yo biha,

Yi kotisa mabuwu ya silivhere lama namekiweke ehenhla ka mbita ya vumba.

₂₄La vengaka u kanganyisa hi milomu ya yena,

Embilwini u kanela ku dyelela;

₂₅Loko a vulavula hi vunene,

u nga kholwi ha yena,

Hikuva manyala ya ntlhanu na mambirhi

ma le mbilwini ya yena.

₂₆Rivengo ri tifihla hi ku kanganyisa,

Kambe ku biha ka rona ku ta tiviwa enhlengeletanweni.

₂₇La celaka rindzi u ta wela kona

Ribye ri ta tlhelela eka loyi a ri khunguluxeke.

₂₈Ririmi ra vunwa ri venga lava pyanyiweke hi rona,

Nomu wa ku xengetela wu vanga ku onhaka.