SWIVURISO 2

₁N'wananga loko u amukela marito ya mina,

U va u tihlayisela milawu ya mina,

₂Loko u rhiya ndleve ya wena ku yingisa vutlhari,

U nyiketa mbilu ya wena eku yingiseni;

₃Ndzi ri, loko u rilela vutivi,

Loko u huwelela ku twisisa,

₄Loko u swi lava kukotisa mali,

U hakuta kukotisa xuma lexi fihliweke,

₅Hilaha u nga ta twisisa ku chava ka Yehovha,

U ta kuma ku tiva ka Xikwembu.

₆Hikuva Yehovha hi yena la nyikaka vutlhari;

Ku tiva ni ku twisisa swi huma enon'wini wa yena.

₇U hlayisela lavo lulama ku kateka,

A va xitlhangu eka lava fambaka eku lulameni.

₈U tiyisa mitila ya lava fambaka hi mfanelo,

U hlayisa ndlela ya lava n'wi rhandzaka.

₉Hi kona u nga ta tiva ku lulama ni mfanelo.

Ni ku saseka, ni mikhuva hinkwayo ya leswinene.

₁₀Loko vutlhari byi ta nghena embilwini ya wena,

Ku tiva ku ta tsakisa moya wa wena;

₁₁Ku anakanya ku ta ku langutela,

Ku twisisa ku ta ku hlayisa,

₁₂Ku ku tshunxa endleleni leyo biha,

Ni ku ku hambuxa eka lava vulavulaka swo homboloka,

₁₃Eka lava fularhelaka ndlela yo lulama,

Lava fambaka hi tindlela ta munyama,

₁₄Lava tsakelaka ku kanganyisa,

Va tsakela mikhuva yo biha,

₁₅Valavo tindlela ta vona ti hambukeke,

Ni mafambele ya vona ma hombolokeke;

₁₆Ku ku namurhuta eka wansati wa un'wana,

Eka wansati wa dlakuta la kanganyisaka hi ku vulavula ka yena,

₁₇La fularheleke nakulobye wa vuntshwa bya yena,

A rivala ntwanano wa Xikwembu xa yena.

₁₈Kunene yindlu ya yena yi voyamele rifu,

Tindlela ta yena ti yisa eka lava feke;

₁₉Eka lava yaka eka yena, a ku na un'we la nga vuya,

A khoma ndlela ya vutomi.

₂₀Hikwalaho, famba hi mitila ya lavanene,

U tiyisela endleleni ya lavo lulama.

₂₁Hikuva lava lulameke va ta aka emisaveni,

Lavo tenga va ta siyiwa kona;

₂₂Kambe lavo biha va ta susiwa la emisaveni,

Ni timbabva ti ta tsuvuriwa eka yona.