1Xisiwana lexi fambaka hi ku lulama ka xona,
Xi tlula wa ku homboloka emilon'wini ya yena, xi nga xihunguki.
2Ku hiseka loku nga riki na ku tiva,
a ku sasekanga,
Ni la angwetlisaka mikondzo ya yena u wela exidyohweni.
3Vuhunguki bya munhu byi n'wi hambukisa ndlela,
Mbilu ya yena yi hlunamela Yehovha.
4Rifuwo ri humesa maxaka yo tala,
Kambe xisiwana xi sukeriwa hi warikwavo.
5Mbhoni yo hemba yi nga ka yi nga huluki ku biwa,
Ni la vulaka mavunwa a nga ka a nga poni.
6Lavo tala va sasela munhu lonkulu;
Na swona un'wana ni un'wana i nakulobye wa la hananaka.
7Vamakwavo va xisiwana va xi venga hinkwavo,
Ni tintangha ta xona ti ta hatla ti xi sukela,
Loko xi vulavula, va hangalaka, va xi siya.
8La lavaka vutlhari u rhandza moya wa yena,
La hlayisaka mianakanyo u ta vona ku kateka.
9Mbhoni yo hemba yi nga ka yi nga huluki ku biwa,
Kambe la vulaka mavunwa u ta lova.
10Ku tsaka a ku lulameri xihunguki;
Swi nga tshuna ngopfu loko nandza a fuma tihosi.
11Munhu wa vutlhari u hlwela ku kariha,
Ku twala ka yena i ku yingisela ku dyoheriwa.
12Ku kariha ka hosi ku fana ni ku dzuma ka nghala,
Kambe rirhandzu ra yena ri fana ni mberha ebyanyini.
13N'wana wo hunguka i nhlomulo eka tata wa yena,
Ni nsati wa ku leva i yindlu leyi pfutaka hi masiku.
14Yindlu ni rifuwo i ndzhaka ya vatata wa munhu,
Kambe nsati wa ku anakanya i nyiko ya Yehovha.
15Vulolo byi wisela munhu evurhongweni,
Kutani moya wa lolo wu ta va ni ndlala.
16La hlayisaka milawu u hlayisa moya wa yena,
Kambe la nga siyiki ndlela ya yena u ta fa.
17La tsetselaka xisiwana u lomba Yehovha,
Kutani Yehovha u ta hakela ku endla ka yena.
18Laya n'wana wa wena loko ku tshemba ka ha ri kona,
Kambe u nga holovi ku n'wi dlaya.
19Munhu wo kariha u ta rhwala ku biwa ka kona,
Loko u n'wi kutsula u ta fanela ku engetela.
20Yingisela ku byeriwa, u amukela ku laya,
U ta tlhariha mundzuku.
21Meehleketo yo tala yi le mbilwini ya munhu,
Kambe makungu ya Yehovha hi wona lama tiyeke.
22Lexi sasaka munhu i vunene bya yena;
Munhu wa xisiwana u tlula lowa vunwa.
23Xichavo xa Yehovha xi yisa evutomini,
U ta xurha, a etlela, a nga humeleri hi khombo.
24Lolo ri peta voko enkambaneni,
Kutani a nga ri tlherisi enon'wini.
25Bana musandzi, murivali a ta tlhariha,
Holovela munhu wa ku anakanya, u ta twisisa vutivi.
26La hangalasaka xuma xa tata wa yena, a va a hlongola manana,
I n'wana lowo biha la khomisaka tingana.
27N'wananga, tshika ku yingisela tidyondzo
Loko ti ku fularhelisa timhaka ta vutlhari.
28Mbhoni ya hava yi sandza ku lulama,
Nomu wa vadyohi wu mita ku homboloka.
29Ku biwa ku vekeriwa vasori,
Ni nhonga enhlaneni wa swihunguki.
