SWIVURISO 1

₂Ku tiva vutlhari ni tidyondzo,

Ni ku hlamusela marito ya vutlhari;

₃Ku amukela dyondzo ya ku anakanya swo lulama,

Ya ku tivisisa ku lulama ni mfanelo;

₄Ku tlharihisa varivali,

Ni ku nyika lavantshwa ku tiva ni ku anakanya.

₅La tlhariheke, a a yingise, u ta tiengetela ku tiva;

La nga ni ku twisisa u ta tikumela mano

₆Ya ku twisisa swivuriso ni marito ya ku enta,

Ni timhaka ta lavo tlhariha, ni dyondzo ya vona leyi fihlekeke.

₇Ku chava Yehovha, i masungulo ya vutivi hinkwabyo;

Kambe lavo rivala va tsan'wa vutlhari ni dyondzo.

₈N'wananga, yingisa dyondzo ya tata wa wena,

U nga fularheli ku laya ka mana wa wena;

₉Hikuva swi ta va xibombiso lexo saseka enhlokweni ya wena,

Ni sindza ra nkoka enhan'wini ya wena.

₁₀N'wananga, loko vadyohi va ku kanganyisa,

U nga pfumeli.

₁₁Loko va ku:

“A hi fambeni swin'we! Hi ya etlelela,

Hi rhiya lava nga riki na nandzu, hi halata ngati ya vona,

₁₂Hi va mita va ha hanya, kukotisa xivandla xa vafi,

Hinkwavo va ta fana ni lava hojomelaka ekheleni;

₁₃Hi ta kuma swo saseka hinkwaswo,

Hi tata tindlu ta hina hi leswi hi swi phangeke;

₁₄U ta kuma ku averiwa swin'we na hina,

Hi ta hlanganisa mali enkwameni wun'we!”

₁₅N'wananga, u nga tshuki u famba hi tindlela ta vona,

U hambukisa nenge wa wena emitileni ya vona.

₁₆Hikuva milenge ya vona yi tsutsumela eku biheni,

Va hatlisa ku halata ngati.

₁₇Kunene ntlhamu wu rhiyiwile mahala emahlweni ka tinyanyana hinkwato,

₁₈Kasi vona va halata ngati ya vona,

Va tirhiya vutomi bya vona.

₁₉Hi yona mhaka ya hinkwavo lava tinyiketaka rifuwo,

Hikuva ri khoma moya wa lava ri fuwaka.

₂₀Vutlhari byi huwelela ehandle,

Byi tlakusa rito emitsendzeleni,

₂₁Byi huwelela emindyangwini ya pongo.

Enyangweni ya muti, byi dyondzisa timhaka, byi ku:

₂₂“N'wina, varivali, mi ta rhandza ku rivala ku yisa kwihi?

Xana vasandzi va ta tsakela ku sandza,

Ni va rihuhu va ta venga vutivi ku yisa kwihi xana?

₂₃Hundzukani hi ku tshinya ka mina!

Maswivo, ndzi ta mi chelela moya wa mina,

Ndzi mi dyondzisa timhaka ta mina.

₂₄Kungakuloko ndzi vitana, mi ala ku yingisa,

Ndzi kondza ndzi tshambuluta voko ra mina, ku nga ri na munhu la tsundzukaka.

₂₅Mi munyile ku tsundzuxa ka mina,

A mi yingisanga ku tshinya ka mina;

₂₆Na mina, ndzi ta hleka emakhombyeni ya n'wina,

Ndzi sandza siku mi humelelaka hi ku chava,

₂₇Siku ku chava ku mi humelelaka kukotisa xidzedze,

Ni makhombo ma mi tsutsumela kukotisa xihuhuri;

Kutani mahlomulo ni mbitsi ya mbilu swi mi wela ehenhla,

₂₈Enkarhini wolowo va ta vitana eka mina, kambe ndzi nga ka ndzi nga hlamuli;

Va ta ndzi lava, kambe va nga ka va nga ndzi kumi.

₂₉Hikuva va vengile vutivi,

A va tihlawulelanga ku chava Yehovha,

₃₀Va arile ku lerisa ka mina,

Va sandzile ku tshinya ka mina,

₃₁Va ta dya mihandzu ya mikhuva ya vona,

Va ta xurha hi makungu ya vona.

₃₂Hikuva ku hambuka ka varivali ka va dlaya,

Kutani ku tsaka ka varihuhe ka va lovisa.

₃₃Kambe la ndzi yingisaka u ta tiakela hi ku rhula,

A nga chavi khombo.”