VAFILIPIYA 1

₁Pawulo na Timotiya, malandza ya Yesu Kriste,

Eka vakwetsimi hinkwavo lava nga eka Yesu Kriste, lava akeke eFilipiya ni ka varisi ni vadiyakoni va Kereke;

₂Tintswalo ni ku rhula a swi ve na n'wina, swi huma eka Xikwembu, Tata wa hina, ni le ka Yesu Kriste, Hosi ya hina.

₃Ndzi khensa Xikwembu xa mina emikarhini hinkwayo leyi ndzi mi anakanyaka ha yona, ₄ndzi ri karhi ndzi mi khongelela hinkwenu hi masiku hi ku tsaka, emikhongelweni hinkwayo leyi ndzi yi endlaka; ₅hikuva kunene, mi namarhele Evhangeli mpfhuka mi nga sungula, ku fika sweswi. ₆Ndza tshemba leswaku la sunguleke ntirho lowunene eka n'wina, u ta wu heta ku fikela siku ra Yesu Kriste; ₇kutani swi lulamile loko ndzi anakanya sweswo eka n'wina hinkwenu, hikuva eku bohiweni ka mina, ni le ku hlamuleni ka mina, ni le ku tiyiseni ka Evhangeli, ndzi na n'wina embilwini ya mina, hikuva hinkwenu mi ni ku averiwa ka tintswalo swin'we na mina. ₈Hikuva Xikwembu i mbhoni yanga leswaku ndzi mi xuva hinkwenu hi rirhandzu ra Yesu Kriste. ₉Kutani lexi ndzi xi kombelaka hi ku khongela, hileswaku rirhandzu ra n'wina ri engeteleka hi masiku hi ku tiva ni miehleketo hinkwayo, ₁₀mi ta tiva ku tsundzuka timhaka leti tlurisaka hi ku saseka; mi ri karhi mi tenga, mi nga tshuki mi khunguvanyeka, ku ko ku fika siku ra Kriste; ₁₁mi ri karhi mi veka mihandzu ya ku lulama leyi vekiwaka ha Yesu Kriste, leswaku ku va eku twakaleni ni le ku dzuniseni ka Xikwembu.

₁₂Vamakwerhu ndzi rhandza leswaku mi tiva leswaku leswi ndzi humeleleke swi pfunile ngopfu ku fambisa Evhangeli emahlweni; ₁₃hikuva ku bohiwa ka mina hikwalaho ka Kriste, ku twakele hinkwako endlwini ya vuhosi, ni matlhelo man'wana hinkwawo. ₁₄Kutani sweswi, lavo tala eka vamakwerhu eHosini, va engeteriwe matimba hi ku bohiwa ka mina, ku vula rito ra Xikwembu hi ku tiyisa, va nga chavi nchumu. ₁₅Van'wana va endlisa sweswo hi mona ni ku kaneta; van'wana va vula Yesu Kriste hi timbilu leto basa, ₁₆va endla hi rirhandzu, hikuva va tiva leswaku ndzi vekiwile ku yimela Evhangeli. ₁₇Kambe valavo va vula Kriste hi ku kanetana, ku nga ri hi timbilu letinene, va anakanya leswaku va ndzi pfuxela ku vaviseka eku bohiweni ka mina. ₁₈Swi na yini xana? Hi matlhelo hinkwawo Kriste wa vuriwa; hambi ku ri hi ku kanganyisa, hambi ku ri hi ntiyiso; hi leswi swi ndzi tsakisaka, ndzi ta engeta ndzi tsaka. ₁₉Kunene ndza swi tiva leswaku sweswo swi ta hundzuka ku hlayiseka ka mina hi swikhongelo swa n'wina, hi ku pfuna ka Moya wa Yesu Kriste; ₂₀hi ku langutela loku tiyeke ka mina, ni ku tshemba loku ndzi nga na kona, leswaku ndzi nga ka ndzi nga khomisiwi tingana ha nchumu; kambe ndzi tivisisa leswaku swi tsandza ni sweswi, ni le mikarhini hinkwayo, Kriste u ta dzunisiwa emirini wa mina, hambi ku ri hi ku hanya, hambi ku ri hi ku fa. ₂₁Hikuva eka mina, ku hanya i Kriste, ni ku fa i rifuwo.

₂₂Kambe a ndzi tivi xana swi sasekile eka mina ku hanya enyameni, kumbexana ndzi fanele ku hlawula xihi; ₂₃hikuva ndzi kokiwa hi matlhelo mambirhi, ndzi ni ku navela ku suka, leswaku ndzi va na Kriste, hikuva hi yona mhaka leyi sasekeke eka mina ku tlurisa; ₂₄kambe hikwalaho ka n'wina, leswi tlurisaka hi ku saseka, hileswaku ndzi tshama enyameni. ₂₅Kambe ndza swi tivisisa swinene leswaku ndzi ta va kona, ndzi tshama masiku na n'wina hinkwenu mi va mi kula, mi ri ni ku tsaka eku pfumeleni, ₂₆leswaku loko ndzi tlhela ndzi va kona eka n'wina, ku tidzunisa ka n'wina ha mina ku ta engeteleka eka Yesu Kriste.

₂₇Ntsena, tifambeleni hi mukhuva lowu fanelaka Evhangeli ya Kriste, leswaku hambi ndzi ta mi vona, hambi ndzi nga ri kona, ndzi nga twa timhaka ta n'wina leswaku ma ha yima emoyeni wun'we, ni ku lwela swin'we ku pfumela ka Evhangeli hi mbilu yi ri yin'we, ₂₈na swona mi nga tshuki mi chavisiwa ha nchumu hikwalaho ka lava kanetaka; eka vona i xikombiso xa ku lova ka vona, kambe ha n'wina, i xa ku hlayiseka; kutani leswo swi huma eka Xikwembu; ₂₉hikuva, hikwalaho ka Kriste, mi nyikiwe ku kateka, ku nga ri ka ku pfumela ntsena, kambe ka ku twa ku vaviseka hikwalaho ka yena, ₃₀hikuva mi tshame eku lweni loku mi ndzi voneke ndzi ri na kona, ni sweswi swa ha ri tano, hilaha mi nga twa mahungu hakona.