Ta ku dya Paseka emananga ya Sinayi.
1Yehovha a byela Muxe emananga ya Sinayi, hi lembe ra vumbirhi ra ku huma ka vona eEgipta, hi n'hweti yo rhanga, a ku: 2“Vana va Israele a va endle Paseka enkarhini wa yona. 3Mi ta yi endla hi nkarhi lowu vekiweke hi siku ra 14 ra n'hweti leyi, nimadyambu, mi ta yi endla hi milawu hinkwayo ni ku lerisa hinkwako ka yona.”
4Muxe a byela vana va Israele ku endla Paseka. 5Kutani va endla Paseka hi n'hweti yo rhanga, hi siku ra 14 ra n'hweti, nimadyambu, emananga ya Sinayi; vana va Israele va endlisa sweswo hilaha Yehovha a leriseke hinkwaswo eka Muxe.
6Kambe vanhu van'wana a va yirisiwile hi mufi, kutani va tsandzeka ku lunghisa Paseka hi siku rolero; va ta emahlweni ka Muxe na Aroni hi siku lero, 7va ku eka yena: “Hi yirisiwile hi mufi; kambe xana hi ta siveriwa ku humesa nhlengo wa Yehovha hi nkarhi lowu vekiweke exikarhi ka vana va Israele, xana?” 8Muxe a ku eka vona: “Tshamani la, ndzi ta yingisa leswi Yehovha a nga ta swi lerisa ehenhla ka n'wina.”
9Kutani Yehovha a byela Muxe, a ku: 10“Byela vana va Israele, u ku: ‘Kungakuloko munhu exikarhi ka n'wina a yirisiwile hi mufi, hambiloko a endzile ekule, hambi a ri un'wana wa ka n'wina, hambi wa vatukulu va n'wina, u ta endla Paseka ya Yehovha. 11Va ta yi endla hi n'hweti ya vumbirhi, hi siku ra 14, nimadyambu; va ta yi dya ni xinkwa lexo kala comela, ni matsavu layo bava. 12Va nga tshuki va siyela nchumu nimixo, va nga tshuki va faya ni rhambu rin'we va ta yi endla hi milawu hinkwayo ya Paseka.
13“ ‘Kambe la tengeke, ni la nga endzangiki, kutakuloko a titsona ku dya Paseka, munhu loyi u ta hungutiwa etikweni ra yena, hikuva a nga humeselanga Yehovha nhlengo hi nkarhi wa wona; munhu loyi, u ta rhwala nandzu wa yena. 14Kungakuloko muluveri u akile na n'wina, kutani a endla Paseka ya Yehovha, u ta yi endla hi nawu wa Paseka, hi ku lerisa ka wona. Nawu wu ta va wun'we eka n'wina hileswaku eka muluveri ni ka la tsariweke etikweni.’ ”
Ta papa leri ungamelaka Tabernakela.
15Siku va yimiseke Yindlu, papa ri ungamela Yindlu, yi nga tabernakela ya vumbhoni; nimadyambu kambe ku va ni leswi fanaka ni ndzilo ehenhla ka Yindlu ku fika nimixo. 16A swi ri tano hi masiku hinkwawo; papa a ri tshama ri ungamela Yindlu, nivusiku kambe, a ri fana ni ndzilo. 17Loko papa ri suka ehenhla ka tabernakela, vana va Israele a va suka, kutani laha papa ri nga yima kona, vana va Israele a va dzima mixaxa kona. 18A va tshama kona hi masiku hinkwawo lawa papa ri nga yima ehenhla ka Yindlu. 19Ni loko papa ri hlwela, ehenhla ka Yindlu masiku layo tala, vana va Israele a va yingisa ku lerisa ka Yehovha, a va nga suki. 20Kambe loko papa ri yima masikwanyana ntsena ehenhla ka Yindlu, a va dzima mitsonga hi rito ra Yehovha; kutani hi rito ra Yehovha a va suka. 21Ni loko papa ri yima ku suka nimadyambu ku fika nimixo, kutani nimixo ri suka, a va suka. Hambi ri suka ninhlekanhi, hambi vusiku, a va suka na vona. 22Hambi papa ri yima ehenhla ka Yindlu masiku mambirhi, kumbe n'hweti, kumbe nkarhi lowo leha ku tlurisa, vana va Israele va tshama emixaxeni, a va nga suki; kutani loko ri suka, a va suka. 23Hi rito ra Yehovha, a va dzima mitsonga, kambe hi rito ra Yehovha, a va suka; a va hlayisa ku lerisa ka Yehovha hilaha Yehovha a leriseke Muxe hakona.
