Ta loko va titsona swakudya, va tivula swidyoho swa vona.
1Hi siku ra makume mambirhi na mune ra n'hweti leyi, vana va Israele va hlengeletana ku titsona swakudya, va ambele maxuka layo khwaxa, va tikhuva tinhloko hi ntshuri. 2Va rixaka ra Israele va tihlawula eka vana va matiko, va tihumesa erivaleni, va tivula swivi swa vona ni ku dyoha ka vatata wa vona. 3Va yimile ematshan'weni ya vona, kutani ku hlayiwa buku ya milawu ya Yehovha, Xikwembu xa vona, hi ku avanyisa ka vumune ka siku rin'wana ni rin'wana; hi ku avanyisa kun'wana ka vumune va humesa ku tivula ka vona kutani va khinsama emahlweni ka Yehovha, Xikwembu xa vona.
4Kutani Yexuwa, Bani, Kadimiele, Xebaniya, Buni, Xerebiya, Bani, na Kenani, va yima etshaleni ra Valevhi, va huwelela eka Yehovha, Xikwembu xa vona, hi rito lerikulu. 5Kutani Valevhi na Yexuwa, Kadimiele, Bani, Haxabiniya, Xerebiya, Hodiya, Xebaniya, na Petahiya, va ku: “Yimani, mi vonga Yehovha Xikwembu xa n'wina, hilaha ku nga heriki, ku vongiwa vito ra wena lero kwetsima leri tlakukeke ehenhla ka ku vonga hinkwako ni tinsimu hinkwato! 6Hi wena Yehovha u ri swaku, hi wena u endleke matilo ni matilo ya matilo, ni mavandla hinkwawo ya wona, ni misava, ni hinkwaswo leswi nga ehenhla ka yona, ni malwandle, ni leswi nga eka wona, hi wena la hanyisaka swilo leswi hinkwaswo, mavandla ya le matilweni ma karhi ma khinsama emahlweni ka wena. 7Hi wena Yehovha, Xikwembu la hlawuleke Abrama, u n'wi rhurhisela Uru wa Kalediya, u n'wi thya vito ra Abrahama, 8u n'wi kumile a ri ni mbilu leyi tshembekaka emahlweni ka wena, u endla ntwanano na yena ku n'wi nyika tiko ra Kanana, ni ra Vahiti ni ra Vaamori, ni ra Vaperesi ni ra Vayebusi, ni ra Vagirigaxi, leswaku u ri nyika vatukulu va yena; kunene u hetile rito ra wena, hikuva u lulamile.
9“U vonile mahlomulo ya vatata wa hina loko va ri Egipta, u twile ku huwelela ka vona, loko va ri ekusuhi ni Lwandle ro Tshwuka, 10u endle swikombiso ni masingita ehenhla ka Faro, ni le henhla ka malandza ya yena hinkwawo, ni le henhla ka tiko hinkwaro ra misava ya yena, hikuva a u tiva hilaha va va xaniseke hakona, kutani u tiendlele ku twala hilaha ku nga kona namuntlha; 11u hikile lwandle emahlweni ka vona, va ko va pela lwandle hi ndlela leyi omeke; lava va landzeke u va wisile eswidziveni, kukotisa ribye leri hoxiwaka ematini ya matimba; 12u va fambisile hi ku nembelela ka papa ninhlekanhi, ni ku nembelela ka ndzilo nivusiku, u va voningela ndlela leyi va faneleke ku famba ha yona. 13U va u xikela entshaveni ya Sinayi, u vulavula na vona u ri ematilweni u va nyika ku avanyisa ematilweni, u va nyika ku avanyisa loko lulama ni milawu leyinene, ni ku lerisa, ni switsundzuxo leswo lulama. 14U va tivisile Savata ra wena leri kwetsimaka; u va vekele ku lerisa, ni switsundzuxo, ni milawu ha Muxe nandza wa wena; 15u va nyikile vuswa lebyi humaka ematilweni ku va fihluta, u va humesela mati eribyeni ku tima torha ra vona, u ku eka vona: ‘Nghenani, mi fuma misava leyi ndzi nga hlambanya ndzi ku, ndzi ta va nyika yona.’
16“Kambe vatata wa hina va tikukumuxile va nonon'hwisa tinhamu ta vona, a va yingisanga ku lerisa ka wena, 17va ala ku twa, a va anakanyangi swihlamariso swa wena leswi u va endleleke swona, kambe va nonon'hwisa tinhamu ta vona, va tiarisa, va tivekela tihosi va ta tlhelela eku bohiweni ka vona. Kambe wena u Xikwembu lexi teleke ku rivalela ni tintswalo ni vunene, u hlwela ku kariha, u tele ku tsetselela, a ku va fularhelanga. 18Kute ni siku va tiendleleke rhole leri chuluriweke va ku: ‘Hi xona Xikwembu xa hina lexi hi humeseke eEgipta,’ hambi va sandza swonghasi, 19hi ku tsetselela ka wena lokukulu, a ku va tshikanga mananga; ku nembelela ka papa a ku tshikangi ku va ungamela ninhlekanhi loko va famba hi ndlela, nivusiku, ku nembelela ka ndzilo a ku tshikanga ku voninga ndlela leyi va faneleke ku famba ha yona. 20U va nyikile moya wa wena lowunene ku va tlharihisa, a ku tsonangi milomu ya vona manna ya wena, u va nyika ni mati ya ku nwa. 21Hi malembe ya mune wa makume, u va hlayisile mananga, a va pfumalanga nchumu; swa ku ambala swa vona a swi onhakanga, ni milenge ya vona a yi pfimbanga. 22U va nyikile ni ku fuma matiko, u va avela wona hi tindzima, va fuma misava ya Sihoni, hosi ya Hexiboni, ni tiko ra Ogo, hosi ya Baxani. 23U andzisile vana va vona va fana ni tinyeleti ta le tilweni, u va nghenisa etikweni leri u nga byela vatata wa vona leswaku va ta nghena eka rona, va ri fuma. 24Vana va vona kunene va nghenile va fuma tiko, u tsongahata emahlweni ka vona Vakanana lava ngi va akile etikweni rolero, u va nyiketa emavokweni ya vona swin'we ni tihosi ta vona ni vanhu va tiko, leswaku va endla ha vona hilaha va swi rhandzaka. 25Va teka miti ya rirhangu ni tiko leri noneke va fuwa tindlu leti teleke xuma xa tinxakaxaka hinkwato ni swihlovo leswi ceriweke, ni tivhinya ni mitlhwari, ni mirhi yo tala leyi vekaka mihandzu, va dya, va xurha va nona, kutani va hanya eku tsakeni hinkwako hi tintswalo ta wena letikulu.
26“Hambiswiritano va tiarisile va ku hundzukela, va cukumeta milawu ya wena endzhaku, va dlaya vaprofeta va wena lava nga endla vumbhoni exikarhi ka vona, leswaku va va hundzuluxela ka wena, kambe va ku sandza ngopfu. 27Hikwalaho u va nyiketeke emavokweni ya valala va vona, va va xanisa. Emikarhini ya ku xanisiwa ka vona, va huwelela ka wena, kutani wena u va yingisile u ri ematilweni, hi mitsetselelo ya wena yo tala u va nyikile valamuleri va va lamulela emavokweni ya valala va vona. 28Kuteloko va wisile va tlhela va sungula ku endla swo biha emahlweni ka wena, na wena u va nyiketa emavokweni ya valala va vona, va va fuma; kutani va tlhela va huwelela ka wena, na wena u va yingisa u ri ematilweni, kutani hi ku tsetselela ka wena, u va ponisile ha kangani. 29U va khongoterile ku tlhelela emilawini ya wena, kambe va tialele ku yingisa milawu ya wena, va dyohele ku lerisa ka wena loku munhu a nga ta hanya hakona loko a endla hakona; va humesile khatla leri alaka joko, va nonon'hwisa tinhamu ta vona, va nga yingisi nchumu. 30U va byarha hi malembe yo tala, u va laya hi moya wa wena, u vulavula na vona hi vaprofeta va wena, kambe a va rhiyanga tindleve; hikwalaho u va nyiketeke emavokweni ya matiko ya misava. 31Kambe hi mitsetselelo ya wena ya ku tala, a ku va hetanga, a ku va fularhelanga, hikuva u Xikwembu xa tintswalo ni vunene.
32“Kutani sweswi, Xikwembu xa hina Xikwembu lexikulu xa matimba, lexi chavisaka, lexi hlayisaka ntwanano ni tintswalo, mahlomulo ma nga tshuki ma va matsanana emahlweni ya wena lama hi humeleleke hina ni tihosi ta hina, ni tihosana ta hina ni vaprista va hina, ni vaprofeta va hina, ni vatata wa hina, ni tiko ra hina hinkwaro, ka ha ri emikarhini ya tihosi ta Asiriya ku ta fikela siku ra sweswi. 33Loko u ri wena, u endlile hi ku lulama etimhakeni hinkwato leti humeleleke, u endlile swinene, kambe hina hi endlile leswo biha. 34Tihosi ta hina, ni vakulu va hina, ni vaprista va hina, ni vatata wa hina a va endlanga hi nawu wa wena, a va tsundzukangi ku lerisa ka wena ni milawu ya wena, hilaha u endleke vumbhoni exikarhi ka vona hakona. 35Kambe eku fumeni ka vona, hambi u va pfunile hi vunene byo tala, u va nyikile tiko lerikulu leri velekaka, a va ku tirhelanga a va fularhelanga mitirho leyo biha ya vona, 36vona, sweswi hi makhumbi; loko ri ri tiko leri u ri nyikeke vatata wa hina leswaku va dya mihandzu ni xuma xa rona, wanga vona, hi makhumbi eka rona, 37ku nona ka rona ku talele tihosi leti u ti vekeke ku hi fuma hikwalaho ka swidyoho swa hina, va ni matimba ehenhla ka hina, ni miri wa hina, ni tihomu ta hina, hinkwako, hilaha va swi rhandzaka hakona, kutani hina hi le khombyeni lerikulu!”
Ta ku pfuxa ntwanano. Va lunghisa ta mihlengo.
38Hikwalaho ka swilo leswi hinkwaswo hi endlile ntwanano, hi wu tsala, hi wu tiyisa hi ku tiyisa ka vakulu va hina ni Valevhi va hina ni vaprista va hina.
