MARKA 6

₁Yesu a suka kwalaho, a tlhelela etikweni ra rikwavo, kutani vadyondzisiwa va yena va n'wi landza.

₂Siku ra Savata loko ri fikile, a sungula ku dyondzisa esinagogeni, kutani lavo tala lava n'wi yingisaka, va hlamala, va ku: “Timhaka leti, u ti kume kwihi? U nyikisiwe ku yini vutlhari lebyo tano ni masingita layonghasi lama endliwaka hi mavoko ya yena xana? ₃Xana yeloyi a hi yena muvatli, n'wana Mariya, makwa Yakobo, na Yose, na Yuda, na Simoni xana? Xana vamakwavo va xisati a va kona kwala eka hina-ke?” Kutani va khunguvanyeka ha yena.

₄Kambe Yesu a ku eka vona: “Muprofeta a nga soriwi loko ku nga ri etikweni ra rikwavo, ni le maxakeni ya yena.” ₅Hikwalaho a tsandzeka ku endla masingita kona, loko ku nga ri ku hanyisa lava vabyaka va nga ri vangani, hi ku va tlhandleka mavoko henhla. ₆Kambe a hlamala hi ku ka va nga pfumeri. Kutani a tifambela emitini leyi nga etlhelweni, a ri karhi a dyondzisa.

₇A vitana lava khume na vambirhi a sungula ku va rhuma ha vambirhimbirhi, a va nyika matimba yo hlula mimoya ya thyaka. ₈A va lerisa leswaku va nga tshuki va tamela nchumu endleleni, loko yi nga ri nhonga ntsena; va nga teki timbuva ni nkwama, hambi yi ri mali eswifungheni swa vona; ₉ntsena va vehela tintanghu, kambe va nga ambali tinguvu timbirhi. ₁₀A engeta a ku eka vona: Hinkwako laha mi nga ta nghena endlwini tshamani kona, mi ko mi suka emutini lowo. ₁₁Kutani hinkwavo lava alaka ku mi amukela ni ku mi yingisa loko mi huma eka vona, mi phumunha ntshuri lowu nga emilengeni ya n'wina, byi va vumbhoni eka vona. Kunene, ndza mi byela, ndzi ri: Sodoma na Gomora va ta twa ku olova ku tlurisa muti wolowo hi siku ra ku avanyisa.

₁₂Kuteloko va sukile va famba va ri karhi va dyondzisa vanhu leswaku va hundzuka. ₁₃Va hlongola mademona layo tala, va tota hi mafurha lava vabyaka lavo tala, va va hanyisa.

₁₄Kute hosi Heroda, loko a twile timhaka ta Yesu (hikuva vito ra yena a ri twakala ngopfu), a ku: “I Yohane Mukhuvuri u pfukile eku feni”; hikwalaho a nga ni matimba ya ku endla masingita. ₁₅Van'wana va ku: “I Eliya”; van'wana va ku: “I muprofeta, kumbe un'wana wa vaprofeta.” ₁₆Kambe Heroda, loko a swi yingisa, a ku: “I Yohane loyi ndzi n'wi tsemeke nhloko, u pfukile eku feni.”

₁₇Hikuva Heroda yeloyi, a a rhumile vanhu ku khoma Yohane, a va a n'wi boha ekhotsweni, hikwalaho ka Herodiya, nsati wa Filipi makwavo, hikuva a a n'wi tekile; ₁₈hikuva Yohane a a tshama a ku eka Heroda: “A swi ku faneri ku va ni nsati wa makwenu.” ₁₉Herodiya a a venga Yohane hakona, a rhandza ku n'wi dlaya, kambe a a tsandzeka, ₂₀hikuva Heroda a a chava Yohane, hi ku n'wi tiva leswaku i munhu la lulameke, la kwetsimaka; kambe a a n'wi sirhelela, a endla leswo tala hi ku kombisiwa hi yena, a rhandza ni ku n'wi yingisa.

₂₁Kambe siku rinene ri fika, loko Heroda a endlela tihosana ta yena ni tindhuna ta nyimpi ni vakulukumba va Galeliya nkhuvo wa siku ra ku velekiwa ka yena. ₂₂Kavaloko n'wana Herodiya yeloyi a nghena a cina, a tsakisa Heroda ni lava tshameke eswakudyeni na yena. Kutani hosi yi ku eka wanhwana: “Kombela hinkwaswo leswi u swi rhandzaka, ndzi ta ku nyika swona.” ₂₃A engeta a n'wi hlambanyela, a ku: “Leswi u nga swi kombelaka, ndzi ta ku nyika swona hambi ku ri ku ku avanyisela ku fuma ka mina hi le xikarhi.” ₂₄Kutani wanhwana a huma, a ku eka mana wa yena: “Ndzi ta kombela yini xana?” Yeloyi a ku: “Kombela nhloko ya Yohane Mukhuvuri.” ₂₅Kutani a hatla a nghena hi mapfundzu eka hosi, a kombela, a ku: “Ndzi rhandza ku nyikiwa hi wena sweswi enkambeni, nhloko ya Yohane Mukhuvuri.” ₂₆Hosi yi khomiwa hi tingana ngopfu, kambe yi chava ku n'wi alela hikwalaho ka ku hlambanya ka yena, ni hikwalaho ka lava tshameke eswakudyeni. ₂₇Kutani a hatla a rhuma nhenha, a lerisa leswaku ku nehiwa nhloko ya Yohane. ₂₈Kutani nhenha yi ya, yi n'wi tsema nhloko ekhotsweni, yi neha nhloko hi nkamba, yi yi nyika wanhwana; yena wanhwana a yi nyika mana wa Yena. ₂₉Kutani vadyondzisiwa va Yohane, loko va swi twa, va ya teka ntsumbu wa yena, va ya wu lahla esirheni.

₃₀Kutani vaapostola va hlengeletana eka Yesu, va n'wi byela hinkwaswo leswi va swi endleke, ni leti va ti dyondziseke. ₃₁Yena a va byela, a ku: “Tanani n'wina swenu laha ku tengeleleke, mi wisa kutsongo,” hikuva lavo tala a va ha ta, van'wana va tlhela, kutani vaapostola a va nga ri na nkarhi wa ku dya. ₃₂Kavaloko va nghena ebyatsweni, va ya emananga va ri swavo. ₃₃Kambe vunyingi byi va vona loko va famba, ni ku n'wi tiva, kutani va tsutsumela eka yena, va huma hi milenge emitini hinkwayo, va rhangela Yesu ni vaapostola. ₃₄Kuteloko Yesu a huma ebyatsweni, a vona vunyingi lebyikulu, a va twela vusiwana, hikuva a va fana ni tinyimpfu leti nga riki na murisi; kutani a sungula ku va dyondzisa timhaka leto tala.

₃₅Dyambu loko ri rhengile, vadyondzisiwa va yena va n'wi tshinelela, va ku: “Lomu i mananga, kambe ri perile; ₃₆va tlherise va ya emasin'wini, ni le mitini leyi hi rhendzeleke, va ya tixavela swakudya, hikuva a va na swakudya.” ₃₇A hlamula a ku eka vona: “Va phameleni mi ri n'wina!” Va ku eka yena: “Xana u ri, a hi ye hi ya va xavela swinkwa swa tidenari ta madzana mambirhi, hi ta va phamela xana?” ₃₈Yena a ku eka vona: “Mi ni swinkwa swingani? Yanani mi ya languta.” Kuteloko va swi vonile, va ku: “I ntlhanu, ni tinhlampfi timbirhi.” ₃₉Kutani a va lerisa ku tshamisisa vanhu hinkwavo hi mitlawatlawa ebyanyini lebya rilambyana. ₄₀Kutani va tshama va avene hi mitlawatlawa ya dzana, ni ya ntlhanu wa makume. ₄₁Yesu, kuteloko a tekile swinkwa swa ntlhanu ni tinhlampfi timbirhi, a languta ehenhla, a khensa, kutani a phema swinkwa a nyika vadyondzisiwa va yena leswaku va nyiketela vanhu, ni tinhlampfi timbirhi, a ti avela hinkwavo. ₄₂Va dya hinkwavo, va xurha. ₄₃Kutani va teka swirhundzu swa khume na swimbirhi leswi teleke hi mahlanhla ni swihlubyana swa tinhlampfi. ₄₄Lava dyeke swinkwa a va lava ku endla vavanuna va ntlhanu wa makume ya madzana (5 000).

₄₅Kutani Yesu a hatlisa a hluhlurheta vadyondzisiwa va yena leswaku va nghena ebyatsweni, va n'wi rhangela entsungeni, hitlhelo ra Betsayida loko yena a ha ta tlherisa vunyingi. ₄₆Kuteloko a va tlherisile, a ya khongela entshaveni.

₄₇Loko byi ri vusiku, byatso a byi ri exikarhi ka lwandle, yena a ha ri entsungeni wa hase a le swakwe. ₄₈Kutani a va vona va karhateka ngopfu hi ku tluta, hikuva moya a wu va alela; kuteloko ku lava ku va nkarhi wa ku langutela ka vumune wa vusiku, a ta eka vona a ri karhi a famba ehenhla ka lwandle, onge u va hundzela emahlweni. ₄₉Kambe loko va n'wi vona a famba ehenhla ka lwandle, va anakanya leswaku i xipuku, kutani va huwelela, ₅₀hikuva va n'wi vonile hinkwavo, va tshukile; kambe a hatlisa a vulavula na vona, a ku eka vona: “Tiyisani timbilu, hi mina mi nga chaveni!” ₅₁Kutani a nghena eka vona ebyatsweni, kavaloko moya wu miyela, kutani va hlamala hi ku tlurisa; ₅₂hikuva a va nga xiyanga masingita ya swinkwa, hikuva timbilu ta vona a ti ri leto nonon'hwa.

₅₃Kuteloko va tlutile elwandle va kongoma tiko ra Genesareta, kutani va fika eribuwini. ₅₄Kuteloko va humile ebyatsweni, vanhu va kona va hatlisa va n'wi tiva, ₅₅va tsutsuma etikweni lero hinkwaro, va sungula ku tisa lava vabyaka hi masangu ya vona hinkwako laha va twaka leswaku u kona. ₅₆Kambe hinkwako laha a nghenaka kona, emitaneni ni le mitini, ni le masin'wini, a va veka lava vabyaka emitsendzeleni, kutani va n'wi khongela leswaku a va pfumelela ku khumba ni loko ma ri makumu ka nguvu ya yena; kutani hinkwavo lava yi khumbeke va hanyisiwa.