MARKA 12

₁Kutani a sungula ku vulavula hi swifaniso, a ku: “Munhu a simekile vhinya ensin'wini, a yi biyerile hi rihlampfu, a cele xikhuvutelo, a aka ni tshala; kutani a yi lerisela varimi, yena a ya ku endzeni. ₂Hi nkarhi wa kona, a rhuma nandza eka varimi leswaku a ya teka mihandzu ya vhinya eka vona. ₃Kambe va n'wi khoma, va n'wi ba, kutani va n'wi tlherisa a nga ri na nchumu. ₄A tlhela a rhuma nandza un'wana eka vona; kambe yena, va n'wi khandla hi maribye va n'wi balesa nhloko, kutani va n'wi tlherisa hi tingana. ₅A engeta a rhuma un'wana; yena, va n'wi dlaya. Kutani a rhuma van'wana lavo tala; ku biwa van'wana, van'wana va dlawa. ₆Kambe, hikuva a ha ri ni n'wana wa yena a ri swakwe la rhandziwaka, na yena, a n'wi rhuma eka vona, a ri wa makumu, a ku: ‘Va ta chava n'wananga.’ ₇Kambe varimi va byelana, va ku: ‘Mudyandzhaka hi loyi; tanani, hi n'wi dlaya, ndzhaka yi ta va ya hina.’ ₈Kutani va n'wi khoma, va n'wi dlaya, va n'wi cukumeta ehandle ka nsimu ya vhinya. ₉Xana n'wini wa nsimu u ta endla yini xana? U ta ta, u ta lovisa varimi, kutani nsimu ya vhinya, u ta yi nyika van'wana.

₁₀“Xana a mi si hlaya tsalwa le ri nge: ‘Ribye leri vaaki va nga ri nyenya, hi rona le ri nga endliwa ribye ra masungulo ya yinhla? ₁₁Swi endlisiwe sweswo hi Hosi, i mhaka leyi hlamarisaka emahlweni ka hina’?” ₁₂Hi laha va rhandzaka ku n'wi khoma, kambe va chava vunyingi, hikuva va tivile leswaku u ringanisile vona loko a vula xifaniso lexi; kutani va n'wi tshika, va tifambela.

₁₃Kutani va rhuma eka yena van'wana va Vafarisi ni Vaheroda leswaku va n'wi phasa hi marito. ₁₄Vona va ta, va ku eka yena: “Mufundhisi, ha tiva leswaku u vula lexi tiyeke, ni leswaku a ku na vutoya ha munhu, hikuva a ku languti nghohe ya vanhu, kambe ndlela ya Xikwembu u yi dyondzisa hi ku tiyisa, Xana swa hi fanela ku humesela Khezari ndzuvo, kumbe a hi swona-ke? Xana hi ta humesa, kumbe hi nga humesi?” ₁₅Kambe yena, hi ku xiya ku kanganyisa ka vona, a ku eka vona: “Mi ndzi ringela yini? Ndzi tiseleni denari, ndzi yi vona.” ₁₆Va yi tisa. A ku eka vona: “Xifaniso lexi, i xa mani, ni ku tsala loku, i ka mani xana?” Va ku eka yena: “I swa Khezari.” ₁₇Kavaloko Yesu a va hlamula, a ku: “Tlheriselani Khezari leswi nga swa Khezari, ni Xikwembu leswi nga swa Xikwembu.” Kutani va n'wi hlamala ngopfu.

₁₈Vasaduki lava vulaka leswaku ku hava ku pfuka ka vafi, va ta eka yena va n'wi vutisa va ku: ₁₉“Mufundhisi, Muxe u hi tsalele, a ku: ‘Makwavo wa munhu, loko a file, a siye nsati, kambe a nga siyanga vana, makwavo a ta teka nsati wa yena, a pfuxela makwavo rixaka.’ ₂₀Kambe a ku ri ni munhu loyi ngi a ri ni vana va ntlhanu na vambirhi, lo wa hosi a teka nsati, kutani a fa, a nga siyanga vana. Wa vumbirhi, na yena, a n'wi teka, kutani a fa, a nga siyanga n'wana; ni ka wa vunharhu swi va tano. ₂₁Kutani va n'wi teka va ri va ntlhanu na vambirhi, kambe va nga siyanga vana. ₂₂Endzhaku ka vona hinkwavo, wansati na yena a fa. ₂₃Hi siku ra ku pfuka, loko va pfukile, xana wansati loyi, u ta va wa mani ka vona xana, hikuva a tekiwile hi vona va ntlhanu na vambirhi?”

₂₄Yesu a va hlamula, a ku: “Xana a mi lahlekanga hi leswi mi nga tiviki Matsalwa, ni loko ma ri matimba ya Xikwembu xana? ₂₅Hikuva kutakuloko va pfukile eku feni, a va nga ha teki, ni loko ku ri ku tekiwa kambe vanhu va ta va tanihi tintsumi ematilweni. ₂₆Loko va ri vafi, ni leswi va nga ta pfuka, xana a mi hlayanga ebukwini ya Muxe, hilaha Xikwembu xi nga vulavula na yena exihlahleni, xi ku: ‘Hi mina Xikwembu xa Abrahama, Xikwembu xa Isaka, Xikwembu xa Yakobo’? ₂₇Xona, a hi Xikwembu xa vafi, kambe i Xikwembu xa lava hanyaka. Loko swi ri tano, n'wina mi lahlekile ngopfu.”

₂₈Un'wana wa vatsari la nga va twa loko va hlamulana, kuteloko a vone leswaku u va hlamurile swinene, a n'wi tshinelela ku n'wi vutisa, a ku: “Nawu lowo rhanga eka milawu hinkwayo, hi wihi xana?” ₂₉Yesu a n'wi hlamula, a ku: “Nawu lowo rhanga hi lowu nge: ‘Yingisa, Israele: Hosi, Xikwembu xa hina, i Hosi yi ri yoxe. ₃₀Kutani: Rhandza Hosi, Xikwembu xa wena, hi mbilu ya wena hinkwayo, ni moya wa wena hinkwawo, ni ku anakanya ka wena hinkwako, ni matimba ya wena hinkwawo’; hi wona nawu lowo rhanga. ₃₁Kutani wa vumbirhi lowu fanaka na wona, hi lowu nge: ‘Rhandza warikwenu, kukota loko u tirhandza’; a ku na nawu lowukulu eka yona yoleyo.” ₃₂Mutsari a ku eka yena: “Hi swona mufundhisi, u vurile swinene loko u te: Xikwembu i xin'we, kambe a ku na xin'wana loko xi nga ri xona; ₃₃kutani ku xi rhandza hi mbilu hinkwayo, ni ku anakanya hinkwako, ni moya hinkwawo, ni matimba hinkwawo, ni ku rhandza warikwavo tanihi loko munhu a tirhandza, swi tlula magandzelo hinkwawo.” ₃₄Yesu loko a vona leswaku u hlamule hi ku anakanya, a ku eka yena: “A ku kule ni ku fuma ka Xikwembu.” Kutani a ka ha vanga na munhu la tiyisaka mbilu ku n'wi vutisa.

₃₅Yesu, loko a ri karhi a dyondzisa etempeleni, a vulavula, a ku: “Vatsari va vurisa ku yini leswaku Kriste i n'wana Davhida-ke? ₃₆Kasi yena Davhida u vurile hi Moya lowo kwetsima, a ku: ‘Hosi yi te eka Hosi yanga: Tshama evokweni ra mina ra xinene, ndzi kondza ndzi endla valala va wena vunavelo bya milenge ya wena.’ ₃₇Xana loko yena Davhida a n'wi vula hosi, a nga va n'wana wa yena hi mukhuva wihi xana?” Kutani ntshungu lowunyingi a wu n'wi yingisa hi ku tsaka.

₃₈Eku dyondziseni ka yena, a ku eka vona: “Chavani vatsari lava rhandzaka ku tifambela hi tinguvu leto leha ni ku xewetiwa emitsendzeleni; ₃₉lava rhandzaka switshamo swa le mahlweni emasinagogeni, ni switshamo leswo rhanga emikhubyeni; ₄₀va mita tindlu ta tinoni, kambe va endla swikhongelo leswo leha, leswaku va tivonakarisa ntsena. Va ta avanyisiwa hi ku avanyisa loku tlurisaka.”

₄₁Yesu, kakuloko a tshamile kusuhi ni laha ku hlayisiwaka nhlengo, a languta hilaha vanhu va hoxaka mali enhlengweni; kambe vafuwi lavo tala va hoxa ngopfu. ₄₂Ku ta ni noni ya xisiwana, yi hoxa swipambatana swimbirhi leswi ringanaka fadeni. ₄₃Kuteloko a vitanile vadyondzisiwa va yena, a ku eka vona: “Kunene ndzi ri eka n'wina: Noni leyi ya xisiwana, yi humesile ku tlurisa hinkwavo lava nga humesa nhlengo. ₄₄Hikuva hinkwavo va tekile eku taleriweni ka vona, kambe loyi u humesile evusiwaneni bya yena, hinkwaswo leswi ngi a ri na swona, hinkwaswo leswi a nga ta hanya ha swona.”