MATEWU 25

₁“Enkarhini wolowo, ku fuma ka matilo ku ta fana ni vanhwanyana va khume, lava nga teka mavoningo ya vona ku ya hlangana ni muteki. ₂Lava ntlhanu eka vona a va rivarile; lava ntlhanu van'wana a va tlharihile. ₃Lavo rivala va ku va teka mavoningo ya vona, va nga ha teki mafurha etimbiteni ta vona; ₄kambe lavo tlhariha a va tekile mafurha etimbiteni ta vona swin'we ni mavoningo ya vona. ₅Kutani, hi leswi muteki a hlwelaka, va khudzehela hinkwavo, va etlela. ₆Kutani hi vusiku lebyikulu ku twakala huwa, va ku: ‘Vonani, muteki wa ta, humani mi ya hlangana na yena.’ ₇Kutani vanhwanyana hinkwavo va pfuka, va lunghisa mavoningo ya vona. ₈Lavo rivala va ku eka lavo tlhariha: ‘Hi cheleleni mafurha, hikuva mavoningo ya hina ma timeka.’ ₉Kambe lavo tlhariha va hlamula, va ku: ‘E-e, ha chava, ma nga ka ma nga ringani hina na n'wina; yanani eka lava ma xavisaka, mi ya tixavela.’ ₁₀Va ku va ha ya eku xaveni, muteki a fika, kutani lava ingi va tilunghisile va nghena na yena evukatini, nyangwa yi pfariwa. ₁₁Vanhwanyana lavan'wana va fika, na vona, va ku: ‘Hosi, hosi, hi pfulele.’ ₁₂Kambe a va hlamula, a ku: ‘Ndza vurisa, ndzi ri eka n'wina, a ndzi mi tivi.’ ₁₃Hitekani hakona, hikuva a mi tivi siku hambi nkarhi lowu N'wana wa Munhu a nga ta ta ha wona.

₁₄“Hikuva kukotisa munhu la endzaka, a vitana malandza ya yena, a ma nyika xuma xa yena. ₁₅A nyika un'wana titalenta ta ntlhanu, un'wana timbirhi, un'wana yin'we; un'wana ni un'wana a nyikiwa ku ringana matimba ya yena, kutani a hatlisa a famba. ₁₆Loyi ingi a nyikiwile titalenta ta ntlhanu, a ya bindzula ha tona, kutani a kuma tin'wana ta ntlhanu. ₁₇Loyi ingi a nyikiwile titalenta timbirhi, a ya bindzula ha tona, kutani a kuma tin'wana timbirhi. ₁₈Kambe loyi ingi a nyikiwile talenta yin'we, a ya cela ehansi, a yimbela mali ya hosi ya yena. ₁₉Masiku layo tala loko ma hundzile, hosi ya malandza walawo yi fika, yi ma kambela. ₂₀Kutani loyi ingi a nyikiwile titalenta ta ntlhanu, a humesa tin'wana ta ntlhanu, a ku: ‘Hosi, a u ndzi nyikile titalenta ta ntlhanu; vona, ndzi bindzurile tin'wana ta ntlhanu ehenhla ka tona.’ ₂₁Hosi ya yena yi ku eka yena: ‘Hi swona nandza lonene, la tshembekaka; u tshembekile eswilweni swi nga ri swingani; sweswi, ndzi ta ku veka ehenhla ka leswo tala; nghena eku tsakeni ka Hosi ya wena.’ ₂₂Ku ta na yena loyi ingi a nyikiwile titalenta timbirhi, a ku: ‘Hosi, a wu ndzi nyikile titalenta timbirhi; vona ndzi bindzurile tin'wana timbirhi henhla ka tona.’ ₂₃Hosi ya yena yi ku eka yena: ‘Hi swona nandza lonene, la tshembekaka; u tshembekile eswilweni swi nga ri swingani, sweswi ndzi ta ku veka ehenhla ka leswo tala; nghena eku tsakeni ka Hosi ya wena.’ ₂₄Loyi ingi a nyikiwile talenta yin'we na yena a ta, a ku: ‘Hosi, ndzi ku tivile leswaku u munhu wa ku nonon'hwa, la tshovelaka laha u nga byalangiki kona, u hlengeleta laha u nga hlwanyangiki kona; ₂₅kwalaho ndzi chavile, kutani ndzi ya fihla talenta ya wena emisaveni; vona, xa ha ri xolexo xilo xa wena.’ ₂₆Kutani hosi ya yena yi n'wi hlamula, yi ku: ‘Nandza lowa lunya, wo loloha, a wu ri karhi u ndzi tiva leswaku ndzi tshovela laha ndzi nga byalangiki kona, ndzi hlengeleta laha ndzi nga hlwanyangiki kona; ₂₇loko swi ri sweswo, ingi u vekile mali ya mina eka lava bindzurisaka, kutani loko ndzi fika, ingi ndzi tekile xilo xa mina ni bindzu ra xona. ₂₈N'wi tekeleni talenta, mi nyika la nga ni titalenta ta khume. ₂₉Hikuva un'wana ni un'wana la nga ni xilo, u ta nyikiwa, kutani u ta va ni swilo leswo tala; kambe la nga riki na nchumu u ta tekeriwa ni leswi a nga na swona. ₃₀Cukumetani nandza lowo loloha emunyameni wa le handle, laha swirilo swi nga ta va kona, ni ku getsela ka meno.’

₃₁“Siku N'wana wa Munhu a nga ta ta eku kwetsimeni ka yena, ni tintsumi ta yena leto kwetsima ti ri na yena hinkwato, hilaha a nga ta tshamisa exiluvelweni xo kwetsima xa yena. ₃₂Kutani matiko hinkwawo ma ta hlengeletiwa emahlweni ka yena, u ta hlawula van'wana eka van'wana, kukotisa murisi loko a hlawula tinyimpfu eka timbuti. ₃₃U ta veka tinyimpfu evokweni ra yena ra xinene, timbuti, tona, eka lera ximatsi.

₃₄“Hilaha Hosi yi nga ta byela va le vokweni ra yena ra xinene, yi ku: ‘Tanani n'wina lava katekisiweke hi Tatana, amukelani ndzhaka ya ku fuma, leyi mi nga lunghiseriwa kaharhi loko misava yi tumbuluka; ₃₅hikuva a ndzi ri ni ndlala, mi tshama mi ndzi fihluta, a ndzi ri ni torha, mi ndzi siyele ndzi nwa; a ndzi ri muendzi, mi ndzi rhurhele; ₃₆a ndzi swerile, mi ndzi funengetile; a ndzi vabya, mi tile mi ta ndzi kamba; a ndzi ri ekhotsweni, mi tile eka mina.’

₃₇“Hi kona lava lulameke va nga ta n'wi hlamula, va ku: ‘Hosi, hi rini hi tshamaka hi ku vona u ri ni ndlala hi ku fihluta, ni loko u ri ni torha hi ku siyela u nwa? ₃₈Hi rini hi nga ku vona u ri muendzi, hi va hi ku rhurhela, ni loko u swerile, hi ku funengeta? ₃₉Hi rini hi nga ku vona u vabya, kumbe u ri ekhotsweni, hi ya eka wena?’ ₄₀Hosi yi ta va hlamula, yi ku: ‘Ndzi vurisile ndzi ri eka n'wina: Leswi loko mi swi endlile eka lontsongo wa vamakwerhu, mi swi endlele mina.’

₄₁“Kutani u ta ku eka lava nga evokweni ra yena ra ximatsi: ‘Sukani ha mina, n'wina lava rhukaniweke; yanani endzilweni lowu nga timekiki, lowu lunghiseriweke Diyavulosi ni tintsumi ta yena; ₄₂hikuva a ndzi ri ni ndlala, a mi ndzi fihlutanga; a ndzi ri ni torha, a mi ndzi siyelanga ndzi nwa; ₄₃a ndzi ri muendzi, a mi ndzi rhurhelanga, a ndzi swerile, a mi ndzi funengetanga; a ndzi ri evuvabyini ni le khotsweni, a mi tanga mi ta ndzi kamba.’

₄₄“Hilaha, na vona va nga ta hlamula, va ku: ‘Hosi, hi rini hi tshamaka hi ku vona u ri ni ndlala, ni loko u ri ni torha, ni loko u ri muendzi, ni loko u swerile, ni loko u vabya, ni loko u ri ekhotsweni, hi nga ku pfunanga?’ ₄₅Hilaha a nga ta va hlamula, a ku: ‘Ndzi vurisile ndzi ri eka n'wina: Loko mi nga swi endlanga eka un'wana wa lavatsongo, a mi swi endlanga, ni le ka mina.’ ₄₆Kutani valavo va ta ya eku biweni loku nga heriki; kambe lavo lulama va ta ya evutomini lebyi nga heriki.”