MATEWU 24

₁Kuteloko Yesu a humile etempeleni, a famba, vadyondzisiwa va n'wi tshinelela ku n'wi komba maakela ya tempele. ₂Kambe Yesu a ku: “A mi swi voni leswi hinkwaswo xana? Kunene ndzi ri eka n'wina: Ku nga ka ku nga tshikiwi ribye ehenhla ka ribye rin'wana leri nga taka ri nga mbundzuxiwi.”

₃Kuteloko a tshamile eNtshaveni ya Mitlhwari, vadyondzisiwa va yena va ta eka yena va ri swavo, va ku eka yena: “Hi byele nkarhi lowu swi nga ta humelela ha wona, ni lexi nga ta va xikombiso xa ku ta eka wena, ni xa ku hela ka misava.” ₄Yesu a va hlamula, a ku: “Tilanguteleni, mi nga ti tshuka mi xisiwa hi munhu. ₅Hikuva lavo tala va ta ta hi vito ra mina, va ku: ‘Hi mina Kriste’; kutani va ta hambukisa lavo tala. ₆Mi ta twa tinyimpi, ni mpfumawulo wa tinyimpi, kambe tivoneleni leswaku mi nga ti tshukisiwa; sweswo hinkwaswo swi fanele ku humelela, kambe ku ta va ku nga si va wona makumu. ₇Hikuva tiko rin'wana ri ta pfukela tiko rin'wana matimba, ni ku fuma kun'wana ku ta lwa ni ku fuma kun'wana; tindlala ti ta va kona ni ku tsekatseka ka misava hi matlhelo layo tala. ₈Kambe sweswo hinkwaswo ku ta va ku sungula ntsena ka khombo. ₉Enkarhini wolowo va ta mi nyiketa ku xanisiwa, ni ku dlawa; mi ta vengiwa hi matiko hinkwawo hikwalaho ka vito ra mina. ₁₀Hikwalaho lavo tala va ta khunguvanyeka, kutani va ta hehlana ni ku vengana. ₁₁Ku ta humelela vaprofeta lavo tala va mavunwa va ta hambukisa lavo tala. ₁₂Kutani rirhandzu ra lavo tala ri ta tsana hikwalaho ka ku andza ka ku homboloka. ₁₃Kambe la nga ta tiyisela ku fikela emakumu, hi yena la nga ta hlayiseka. ₁₄Kutani Evhangeli leyi ya ku fuma yi ta vuriwa emisaveni hinkwayo leswaku byi va vumbhoni eka matiko hinkwawo; hi kona ku nga ta humelela makumu.

₁₅“Kutakuloko mi vona manyala ya ku herisiwa, lama nga vuriwa hi muprofeta Daniele, ma yimile exivandleni lexi hlawuriweke (la hlayaka u fanele ku anakanya); ₁₆enkarhini wolowo, lava nga eYudiya a va balekele etintshaveni; ₁₇la nga ehenhla ka yindlu, a nga ka a nga xiki a ya teka swa le ndlwini ya yena; ₁₈ni la nga emasin'wini, a nga ka a nga tlheli ekaya ku ya teka tinguvu ta yena. ₁₉Va ta va ni khombo vavasati lava tikeke ni lava an'wisaka enkarhini wolowo. ₂₀Khongelani leswaku ku tsutsuma ka n'wina ku nga humeleri nivuxika, hambi ku ri hi Savata; ₂₁hikuva enkarhini wolowo, nhlomulo wu ta va lowukulu; ka ha ri mpfhuka ku tumbuluke misava ku fikela sweswi, khombo lero tano a ri si va kona, kutani ri nga ka ri nga tlheli ri va kona, ni siku ni rin'we. ₂₂Loko ngi masiku lawa a ma nga hungutiwanga, a ku nga ti hanya munhu ni un'we, kambe hikwalaho ka vahlawuriwa, mikarhi yoleyo yi ta hungutiwa.

₂₃“Enkarhini wolowo, loko munhu a ku eka n'wina: ‘Vonani, Kriste u la,’ kumbe ‘Kriste u lahaya,’ mi nga tshuki mi pfumela. ₂₄Hikuva ku ta humelela lava tivulaka Kriste hi vunwa, kambe vaprofeta va mavunwa va ta endla masingita lamakulu, ni mahlori lama nga ta hambukisa na vona vahlawuriwa, loko swi nga koteka. ₂₅Maswivo, ndzi rhangile ndzi mi byela timhaka leti; ₂₆hikwalaho loko va ku eka n'wina: ‘Vonani, u le mananga!’ Mi nga yi kona; kumbe loko va ku: ‘Vonani u le tindlwini!’ Mi nga tshuki mi pfumela. ₂₇Hikuva kukotisa loko rihati ri huma evuxeni, ri hatima ku ya fika evupeladyambu, ku ta ka N'wana wa Munhu ku ta endlisa sweswo. ₂₈Hikuva laha ntsumbu wu nga kona, hilaha makoti ma nga ta hlengeletana kona.

₂₉“Kutakuloko mahlomulo ya mikarhi yoleyo ma herile, dyambu ri ta endla ntima, ni n'weti wu nga ha humesi ku vonakala ka wona, ni tinyeleti ti ta wa hi le henhla, kutani matimba ya le tilweni ma ta tsekatseka. ₃₀Enkarhini wolowo, xikombiso xa le tilweni, hi kona matiko hinkwawo ya misava ma nga ta tiba xifuva, va ta vona N'wana wa Munhu a ta hi mapapa ya le tilweni, hi matimba lamakulu, ni ku vonakala lokukulu. ₃₁U ta rhuma tintsumi ta yena leti yimbaka tinanga ta mpfumawulo lowukulu, ti ta hlengeleta vahlawuriwa va yena etimhehweni leta mune, ku sungula emakun'wini ya matilo, ku yisa emakun'wini man'wana.

₃₂“Dyondzani hi murhi wa nkuwa xifaniso lexi; marhavi ya wona, loko ma sungula ku olova, ma humesa matluka, ma swi tiva leswaku ximumu xi kusuhi. ₃₃Na n'wina, kutakuloko mi vona hinkwaswo leswo, tivisisani leswaku N'wana wa Munhu u kusuhi, u le nyangweni. ₃₄Kunene, ndzi ri eka n'wina, rixaka leri, ri nga ka ri nga hundzi, leswo hinkwaswo swi nga si humelela. ₃₅Tilo ni misava swi ta hundza, kambe marito ya mina ma nga ka ma nga hundzi.

₃₆“Loko ri ri siku lero ni nkarhi, a ku na loyi a wu tivaka; swi tsandza ni tintsumi ta le matilweni, a ti wu tivi, hambi a ri N'wana; kambe ku tiva Tatana a le swakwe. ₃₇Kambe kukotisa leswi nga humelela emikarhini va Nowa, swi ta va tano ni le ku teni ka N'wana wa Munhu; ₃₈hikuva kukotisa emikarhini ya ndhambi ya mati, loko vanhu a va ri karhi va dya, va nwa, va teka, va hlomisana, ku ko ku fika siku leri Nowa a ngheneke engalaveni ha rona, ₃₉a va anakanyanga nchumu ku ko ku fika ndhambi, kutani va dyiwa hinkwavo hi yona; swi ta endlisa sweswo eku teni ka N'wana wa Munhu.

₄₀“Enkarhini wolowo, eka vanhu vambirhi lava nga ta va emasin'wini, un'wana u ta tekiwa, un'wana a siyiwa; ₄₁eka vavasati vambirhi lava nga ta sila eribyeni, un'wana u ta tekiwa, un'wana a siyiwa. ₄₂Hitekani-ke, hikuva a mi tivi nkarhi lowu Hosi ya n'wina yi nga ta ta ha wona.

₄₃“Kambe tivani leswi: Loko ngi n'wini wa yindlu a tiva nkarhi lowu khamba ri nga ta ta ha wona, a ta langutela, a nga pfumeri leswaku yindlu ya yena yi boxiwa. ₄₄Na n'wina, tilunghiseni hakona, hikuva N'wana wa Munhu u ta ta hi nkarhi lowu mi nga wu anakanyiki.

₄₅“Xana i mani nandza lonene, wo tlhariha, loyi Hosi ya yena yi n'wi vekeke mulanguteri wa malandza ya yona ku va nyika swakudya enkarhini wa swona? ₄₆Ku katekile nandza yeloyi Hosi ya yena, siku yi fikaka, yi nga ta n'wi kuma a endlise sweswo. ₄₇Kunene ndzi ri eka n'wina, u ta n'wi veka muhlayisi wa hinkwaswo leswi a nga na swona. ₄₈Kutakuloko nandza yeloyi a hombolokile, kutani a tianakanya embilwini ya yena, a ku: ‘Hosi yanga yi hlwela ku fika;’ ₄₉kutani a sungula ku ba malandzakulobye, a dya, a nwa ni lava pyopyaka, ₅₀hosi ya nandza yeloyi yi ta fika enkarhini lowu a nga wu langutelangiki, ni le nkarhini lowu a nga wu tiviki; ₅₁kutani yi ta n'wi pulukanyisa, yi n'wi nyika ku averiwa ku ri kun'we ni vamanyunyu; hilaha swirilo swi nga ta va kona ni ku getsela ka meno.