MATEWU 22

₁Kutani Yesu a tlhela a vulavula na vona hi xifaniso, a ku: ₂“Ku fuma ka matilo ku fana ni hosi leyi endlelaka n'wana wa yona nkhuvo wa vukati. ₃Kutani a rhuma malandza ya yena ku ya vitana lava nga rhambiwa enkhubyeni, kambe va ala ku ta. ₄A engeta a rhuma malandza man'wana, a ku: ‘Byelani lava rhambiweke, mi ku: Maswivo, ndzi lunghisile swakudya swa mina, tihavi ta mina ni swifuwo swo nona swa mina swi tlhaviwile; swilo hinkwaswo swi lunghisiwile, tanani enkhubyeni.’ ₅Kambe valavo va kaneta, va famba un'wana ensin'wini ya yena, un'wana eku xaviseni ka yena; ₆kutani van'wana va khoma malandza ya yena, va ma endla hi tihanyi, va ma dlaya. ₇Kutani hosi, loko yi twa timhaka leti, yi kariha yi rhuma mavandla ya yona ku ya lovisa vadlayi valavo, yi hisa ni muti wa vona. ₈Kutani a byela malandza ya yena, a ku: ‘Nkhuvo wu lunghisiwile kambe lava ngi va vitaniwile a wu nga va fanekelanga. ₉Sweswi, yanani emahandzeni ya tindlela, mi ya vitana enkhubyeni, hinkwavo lava mi nga ta va kuma.’ ₁₀Kutani malandza wolawo ma huma ma ya etindleleni, ma hlengeleta hinkwavo lava ma va kumaka, lavo biha ni lavo lulama, kutani yindlu ya nkhuvo yi tala hi vanhu lava tshameke eswakudyeni. ₁₁Kuteloko hosi yi nghena ku ta languta lava tshameke eswakudyeni, yi vona munhu la nga ambalangiki nguvu ya nkhuvo, ₁₂yi ku eka yena: ‘Nakulorhi, u nghenise ku yini la, u nga ri na nguvu ya nkhuvo?’ Yeloyi a miyela. ₁₃Kutani hosi yi ku eka malandza: ‘N'wi boheni milenge ni mavoko, mi n'wi cukumeta emunyameni wa le handle, laha ku nga ni mikosi ni ku getsela ka meno.’ ₁₄Hikuva lava vitaniweke va tele, kambe lava nga hlawuriwa a hi vangani.”

₁₅Kutani Vafarisi va suka, va ya kanela makungu swin'we hilaha va nga ta n'wi phasa hakona hi marito ya yena. ₁₆Kutani va rhuma eka yena vadyondzisiwa va vona ni va ka Heroda, va ya n'wi byela, va ku: “Mufundhisi, ha swi tiva leswaku wa vurisa, ni leswaku u dyondzisa ndlela ya Xikwembu hi ntiyiso, u nga chavisiwi hi munhu, hikuva a wu languti nghohe ya munhu. ₁₇Wa nga hi byela, xana swa hi lulamela ku humesela Khezari ndzuvo, kumbe a hi swona-ke?” ₁₈Kambe Yesu, hi ku tiva mona wa vona, a ku: “Mi ndzi ringela yini, n'wina vakanganyisi? ₁₉Ndzi kombeni mali ya ndzuvo. Kutani va n'wi nyika denari.” ₂₀A ku eka vona: “Xifaniso lexi i xa mani, ni matsalwa, i ya mani-ke?” ₂₁Va ku eka yena: “I swa Khezari.” Kutani a ku eka vona: “Tlheriselani Khezari leswi nga swa Khezari, ni Xikwembu leswi nga swa Xikwembu.” ₂₂Kuteloko va twe mhaka yoleyo, va hlamala, kutani va n'wi tshika, va tifambela.

₂₃Hi siku rero, Vasaduki lava kanetaka ku pfuka ka vafi, va ta eka Yesu, va n'wi vutisa, va ku: ₂₄“Mufundhisi, Muxe u te: ‘Munhu loko a file a nga ri na vana, makwavo u ta teka nsati wa yena, a velekela makwavo vana.’ ₂₅Kambe a ku ri kona exikarhi ka hina vamakwavo va ntlhanu na vambirhi; kutani lowa hosi a a tekile nsati, kutani a fa, kutani hikuva a nga si va na n'wana, a siyele ndzisana nsati wa yena. ₂₆Swi endlisa sweswo ni ka lowa vumbirhi, ni ka lowa vunharhu, ku ya fikela eka lowa ntlhanu na vambirhi. ₂₇Endzhaku ka vona hinkwavo, lo wansati, na yena, a fa. ₂₈Xana siku ra ku pfuka ka vafi, nsati loyi, u ta va wa wihi eka lava ntlhanu na vambirhi, hi leswi hinkwavo va n'wi tekeke xana?” ₂₉Kambe Yesu a hlamula, a ku eka vona: “Mi lahlekile, hikuva a mi tivi Matsalwa ni matimba ya Xikwembu. ₃₀Hikuva eku pfukeni ka vafi a va nga ha teki, ni loko ku ri ku tekiwa, kambe va ta fana ni tintsumi ta Xikwembu leti nga etilweni. ₃₁Kutani loko ku ri ku pfuka ka vafi, xana a mi hlayanga leswi mi swi byeriweke hi Xikwembu, loko xi te: ₃₂‘Hi mina Xikwembu xa Abrahama, ni Xikwembu xa Isaka, ni Xikwembu xa Yakobo’? Xikwembu a hi Xikwembu xa lava feke, kambe i xa lava hanyaka.” ₃₃Kutani mitshungu loko yi yingisa sweswo, yi hlamala hi ku dyondzisa ka yena.

₃₄Kambe Vafarisi loko va yingisa leswaku u miyete Vasaduki, va hlengeletana kun'we. ₃₅Kutani un'wana wa vona loyi a a ri mufundhisi wa nawu, a vutisa Yesu hi ku n'wi ringa, a ku: ₃₆“Mufundhisi, ku lerisa lokukulu ka nawu hi kwihi xana?” ₃₇Yesu a ku eka yena: “Rhandza Hosi, Xikwembu xa wena, hi mbilu ya wena hinkwayo, ni moya wa wena hinkwawo, ni ku anakanya ka wena hinkwako. ₃₈Hi wona nawu lowo rhanga lowukulu; ₃₉kutani lowa vumbirhi lowu fanaka na wona, hi lowu nge: ‘Rhandza warikwenu kukota loko u tirhandza.’ ₄₀Milawu leyimbirhi leyi, i ku sungula ka milawu hinkwayo ni ka vaprofeta.”

₄₁Vafarisi loko va hlengeletene, Yesu a va vutisa, ₄₂a ku: “Mi ri yini ehenhla ka Kriste xana? I n'wana mani xana?” Va ku eka yena: “N'wana Davhida.” ₄₃Yena a ku eka vona: “Loko swi ri tano, xana Davhida u n'wi vurise ku yini Hosi hi Moya loko a te: ₄₄‘Hosi yi te eka Hosi yanga: “Tshamisa evokweni ra xinene ra mina, ndzi kondza ndzi veka lava nga valala eka wena evukandziyweni bya milenge ya wena.” ’ ₄₅Xana Davhida loko a n'wi vula hosi ya yena i n'wana wa yena hi mukhuva wihi xana?” ₄₆Kutani a ku vanga na munhu la tivaka ku n'wi hlamula nchumu, ku suka nkarhi wolowo, a ka ha tanga ni un'we la tiyaka mbilu ku n'wi vutisa.