MATEWU 15

₁Kutani vatsari ni Vafarisi va ta eka Yesu, va huma eYerusalema, va ku eka yena: ₂“Vadyondzisiwa va wena va tlulela yini mikhuva ya vakhale? Hikuva va dya vuswa va nga hlambanga.” ₃A va hlamula, a ku: “N'wina mi tlulela yini nawu wa Xikwembu hi mikhuva leyi mi yi endlaka? ₄Hikuva Xikwembu xi lerisile, xi te: ‘Chava tata wa wena ni mana wa wena’; kambe xi te: ‘La rhukanaka tata wa yena, hambi mana wa yena a a dlayiwe.’ ₅Kasi n'wina mi ku: ‘La nge eka tata wa yena kumbe eka mana wa yena: Leswi ndzi nga ku pfunaka ha swona, ndzi avele Xikwembu, a nga ha ri na nandzu; kunene a nga ha faneli ku chava tata wa yena ni mana wa yena.’ ₆Kutani mi hundzurile nawu wa Xikwembu swahava hi mikhuva leyi mi yi endlaka. ₇Vakanganyisi, Esaya u mi bvumbhele swinene loko a te: ₈‘Tiko leri ra ndzi chava hi milomu ya rona: kambe timbilu ta vona ti le kule na mina ngopfu. ₉Va ndzi khinsamela swahava loko va dyondzisa tidyondzo, leyi nga milawu ya vanhu ntsena.’ ” ₁₀Sweswo Yesu a vitana ntshungu, a ku eka vona: “Yingiselani, mi twisisa: ₁₁Leswi nghenaka enon'wini, a hi swona leswi bihisaka munhu, kambe leswi humaka enon'wini, hi swona leswi bihisaka munhu.”

₁₂Sweswi, vadyondzisiwa va yena va n'wi tshinelela, va ku eka yena: “Xana wa swi tiva leswaku Vafarisi va khunguvanyekile loko va yingisa ku vulavula ka wena xana?” ₁₃Kambe a hlamula, a ku eka vona: “Ximudyana xin'wana ni xin'wana lexi nga simekiwiki hi Tatana wa le tilweni, xi ta tsuvuriwa. ₁₄Va tshikeni, i vo fa mahlo lava fambisaka vo fa mahlo. Lowo fa mahlo loko a fambisa lowo fa mahlokulobye va ta wela ekheleni havambirhi.”

₁₅Petro a angula, a ku eka yena: “Hi hlamusele xifaniso lexiyani.” ₁₆Kambe Yesu a ku: “Xana ma ha pfumala ku anakanya na n'wina-ke? ₁₇Xana a mi twisisi leswaku hinkwaswo leswi nghenaka enon'wini, swi ya ekhwirini swi kondza swi ya cukumetiwa enhoveni. ₁₈Kambe leswi humaka enon'wini swi pfa hi le mbilwini; hi swona leswi bihisaka munhu. ₁₉Hikuva miehleketo leyo biha, ni ku dlayana, ni timholovo, ni vuoswi, ni vukhamba, ni ku hembelana, ni ku sandzana swi huma embilwini, ₂₀hi swona leswi bihisaka munhu, kambe loko ku ri ku dya hi mavoko lama nga hlambiwangiki, a hi xilo lexi bihisaka munhu.”

₂₁Yesu a suka kwalaho, a ya etikweni ra Tiri na Sidoni. ₂₂Kutani ku humelela wansati wa Kanana la humeke ematlhelweni walawo, a huwelela, a ku: “Ndzi twele vusiwana, Hosi, n'wana Davhida, n'wana wa mina wa wanhwanyana u vabya ngopfu hi mademona.” ₂₃Kambe Yesu a nga n'wi hlamulanga nchumu. Kutani vadyondzisiwa va yena va n'wi tshinelela, va n'wi khongela va ku: “N'wi tlherise, hikuva u huwelela, a ri karhi a hi landza.” ₂₄Yena a hlamula, a ku: “A ndzi rhumiwanga eka munhu, loko ku nga ri ka tinyimpfu ta yindlu ya Israele leti loveke.” ₂₅Lowa nsati a n'wi tshinelela a khinsama, a ku eka yena: “Hosi, ndzi pfune!” ₂₆A n'wi hlamula, a ku: “A hi swona ku tekela vana vuswa, ku byi hoxela timbyana.” ₂₇Kambe lo wansati a ku: “Ina, Hosi, kambe na tona timbyana ti rholela mahlanhla lama waka etafuleni ra vini va tona.” ₂₈Yesu a hlamula, a ku eka yena: “Wansati, ku pfumela ka wena kukulu! A ku endliwe eka wena hilaha u rhandzaka hakona.” Kutani n'wana wa yena a hanya hi nkarhi wolowo.

₂₉Yesu, loko a suka kwalaho, a tshinelela lwandle ra Galeliya: kuteloko a tlhandlukile entshaveni, a ya tshamisa kona. ₃₀Mitshungu leyo tala yi ta eka yena, va neha lavo khwita, ni swilema, ni lavo fa mahlo, ni timbheveve ni van'wana lavo tala, va va veka emilengeni ya Yesu, kutani a va hanyisa. ₃₁Mitshungu yi hlamala loko va vona lavo fa xifuva va vulavula, ni swilema swi hanyisiwa, ni lavo khwita va famba, ni lavo fa mahlo va vona; kutani va dzunisa Xikwembu xa Israele.

₃₂Kutani Yesu a vitana vadyondzisiwa va yena, a ku eka vona: “Ndzi twela ntshungu lowu vusiwana, hikuva va tshamile na mina masiku manharhu, va nga ri na leswi va swi dyaka; kutani ndza tsandzeka ku va tlherisa va ri ni ndlala, leswaku kumbe va nga karhala endleleni.” ₃₃Vadyondzisiwa va ku eka yena: “Xana laha mananga hi nga swi kuma kwihi swakudya leswi ringanaka ku xurhisa ntshungu lowonghasi xana?” ₃₄Yesu a ku eka vona: “Mi ni swinkwa swingani-ke?” Va ku: “Ntlhanu na swimbirhi, ni tinhlampfinyana ti nga ri tingani.” ₃₅Hikwalaho a lerisa mitshungu leswaku yi tshama ehansi. ₃₆Kuteloko a teke swinkwa swa ntlhanu na swimbirhi ni tinhlampfi, a khensa, a phema, a nyika vadyondzisiwa va yena vona va ta avela mitshungu. ₃₇Kutani hinkwavo va dya va xurha, va ko va rholela mahlanhla lama nga sala, swirhundzu swa ntlhanu na swimbirhi swi tala. ₃₈Lava nga dya a va ri vavanuna va madzana ya mune wa makume, loko ku nga hlayiwi vavasati ni vana. ₃₉Kuteloko Yesu a tlherisile mitshungu, a nghena ebyatsweni, a ya etikweni ra Magadala.