LUKA 9

₁Yesu a hlengeleta vadyondzisiwa va yena va khume na vambirhi, kutani a va nyika matimba ni vuhosi ehenhla ka mademona hinkwawo, ni matimba ya ku horisa mavabyi. ₂Kutani a va rhuma ku ya vula ku fuma ka Xikwembu ni ku hanyisa vavabyi. ₃A ku eka vona: “Loko swi ri swa ndlela, mi nga tshuki mi longa nchumu, ni loko yi ri nhonga, ni loko wu ri nkwama, kumbe vuswa kumbe mali; na swona, mi nga teki tinguvu timbirhi. ₄Kutani yindlu yihi ni yihi leyi mi nga ta nghena eka yona, tshamisani kona, mi ko mi suka. ₅Kambe lava nga mi amukeriki, kutakuloko mi huma emutini wolowo, mi phumunha ntshuri wa milenge ya n'wina, leswaku byi va vumbhoni eka vona.” ₆Kwalaho va huma, va famba hi miti ni swimitana, va ri karhi va dyondzisa Evhangeli, va horisa vavabyi hinkwako.

₇Hosi Heroda a twa hinkwaswo leswi endliweke hi Yesu, kutani a tshuka ngopfu, hikuva van'wana a va ku: “Yohane u pfukile eku feni.” ₈Van'wana va ku: “Eliya u humelele,” van'wana va ku: “Un'wana wa vaprofeta va khale u pfukile eku feni.” ₉Kambe Heroda a ku: “Loko a ri Yohane ndzi n'wi tsemile nhloko; a nga va mani loyi ndzi twaka timhaka ta yena letonghasi?” Kutani a a rhandza ku n'wi vona.

₁₀Kuteloko vaapostola va tlherile, va byela Yesu hinkwaswo leswi va swi endleke, kutani a va teka, a ya hitlhelo emananga, ekusuhi ni muti lowu vuriwaka Betsayida. ₁₁Kuteloko vunyingi byi swi tivile, va n'wi landza, kutani a va amukela, a va byela timhaka ta Xikwembu, a horisa lava lavaka ku horisiwa.

₁₂Kakuloko dyambu ri lava ku pela, lava khume na vambirhi va ta eka yena, va ku: “Tlherisa vunyingi leswaku va ta tiva ku ya emitini ni le swimitaneni leswi hi rhendzeleke, leswaku va ya kuma byetlelo ni swakudya kona, hikuva la i mananga.” ₁₃Kambe a ku eka vona: “Va phameleni mi ri n'wina.” Vona va ku: “A hi na nchumu loko ku nga ri ntlhanu wa swinkwa ni tinhlampfi timbirhi, loko swi nga ri leswaku hi ya xavela vanhu lava hinkwavo swakudya!” ₁₄Hikuva a va lava ku va vanhu va ntlhanu wa makume ya madzana. Kambe a ku eka vadyondzisiwa va yena: “Va tshamisiseni, hi mitlawa ya ntlhanu wa makume.” ₁₅Kutani va endlisa sweswo, va va tshamisisa hinkwavo. ₁₆Kutani a teka swinkwa swa ntlhanu, ni tinhlampfi timbirhi, a languta ehenhla, a khensa, kutani a phema swinkwa, a nyika vadyondzisiwa va yena leswaku va avela mitshungu. ₁₇Kutani va dya, va xurha hinkwavo; kutani va rhola mahlanhla lama seleke, swi ri swirhundzu swa khume na swimbirhi.

₁₈Kakuloko a khongela etlhelweni, vadyondzisiwa va hlengeletana eka yena; kutani a va vutisa, a ku: “Vanhu va ri ndzi mani xana?” ₁₉Va hlamula, va ku: “Van'wana va ri: U Yohane Mukhuvuri; van'wana va ri: U Eliya; kambe van'wana va ri: Un'wana wa vaprofeta va khale u pfukile eku feni.” ₂₀Kutani a ku eka vona: “N'wina-ke, mi ri ndzi mani?” Simoni Petro a hlamula, a ku: “U Kriste wa Xikwembu.” ₂₁Kutani a va laya ngopfu leswaku va nga tshuki va byela munhu mhaka leyi. ₂₂Kambe a ku: “Swi fanele leswaku N'wana wa munhu a twisiwa ku vaviseka lokukulu, a soriwa hi vakulu ni vaprista lavakulu ni vatsari, a dlawa, kutani a pfuka eku feni hi siku ra vunharhu.”

₂₃Kambe a va byela hinkwavo, a ku: “Kungakuloko un'wana a rhandza ku ndzi landza, a a titshike, a tirhwexa xihambano xa yena hi siku rin'wana ni rin'wana, kutani a ndzi landza. ₂₄Hikuva la rhandzaka ku hlayisa vutomi bya yena, u ta lahlekeriwa hi byona, kambe la lahlekeriwaka hi vutomi bya yena hikwalaho ka mina, u ta byi hlayisa. ₂₅Loko swi ri sweswo, munhu swi nga n'wi pfuna yini ku fuwa misava hinkwayo, loko a tilovisa, kumbe loko a tionha. ₂₆Hikuva un'wana ni un'wana la khomiwaka hi tingana hikwalaho ka mina ni timhaka ta mina, N'wana wa Munhu u ta khomiwa hi tingana hikwalaho ka yena, siku a taka eku vonakaleni ka yena ni ka Tata wa yena, ni ka tintsumi leto kwetsima. ₂₇Ndzi vurisile ndzi ri eka n'wina, van'wana va kona eka lava yimeke kwala lava nga tiki nantswa rifu, va nga si vona ku fuma ka Xikwembu.”

₂₈Endzhaku ka timhaka leti, loko masiku ma lava ku endla ntlhanu na manharhu, Yesu a famba na Petro, na Yohane, na Yakobo, a tlhandlukela entshaveni ku ya khongela. ₂₉Kakuloko a ha khongela, xivumbeko xa mombo wa yena xi hundzuka, tinguvu ta yena ti basa, ti vangama. ₃₀Kutani ku humelela vavanuna vambirhi lava vulavulaka na yena; a a ri Muxe na Eliya. ₃₁Va humelele eku vonakaleni; a va vulavula ta ku huma ka yena, loku a nga ta suka hakona eYerusalema. ₃₂Kambe Petro ni lava ngi a ri na vona, a va khomiwile hi vurhongo; kakuloko va pfuka, va vona ku vonakala ka yena, ni vavanuna lavambirhi, lava ngi va ri na yena. ₃₃Kakuloko va n'wi sukela, Petro a ku eka Yesu: “N'wini, swi nga saseka loko hi tshama kwala; a hi akeni mitsonga minharhu; wun'wana wu va wa wena, wun'wana wa Muxe wun'wana wa Eliya,” kambe a a nga tivi lexi a xi vulaka. ₃₄Kakuloko a vurisa sweswo, papa ri humelela, ri va funengeta; kuteloko va ha ku nghena epapeni, vadyondzisiwa va khomiwa hi ku chava. ₃₅Kutani rito ri huma epapeni, ri ku: “Hi loyi N'wananga, loyi ndzi n'wi rhandzhaka; n'wi yingiseni.” ₃₆Kuteloko rito leri ra ha vulavula, Yesu a voniwa a ri swakwe. Kutani vadyondzisiwa va miyela, va nga byeri munhu, leswi va swi voneke emikarhini leyi.

₃₇Siku leri tlhandlamaka, loko va ngirimele entshaveni, vunyingi lebyikulu byi hlangana na yena. ₃₈Kutani munhu un'wana exikarhi ka vunyingi a huwelela, a ku: “Mufundhisi, ndza ku khongela, languta n'wananga hikuva i wa swakwe ka mina. ₃₉Moya wu n'wi khoma, kutani a tshuka a huwelela, wu n'wi xanisa hi matimba, wu n'wi tlutlisa xikhuvi, kambe wu ala ku n'wi sukela loko wu n'wi karhatile ngopfu. ₄₀Ndzi komberile ka vadyondzisiwa va wena, ndzi ku va wu hlongola, kambe va tsandzekile.” ₄₁Yesu a hlamula, a ku: “Ha! Rixaka leri nga pfumeriki, lero homboloka ndzi ta va na n'wina ku yisa kwihi, ndzi ta mi tsetselela ku ya fika kwihi? Tisa n'wana wa wena kwala.”

₄₂Kakuloko a tshinela, demona ri n'wi tlatlalata, ri n'wi xanisa hi matimba, kambe Yesu a tshinya moya lowo biha, kutani a horisa n'wana, a n'wi nyika tata wa yena. ₄₃Kutani hinkwavo va hlamala vuhosi lebyikulu bya Xikwembu.

₄₄Kakuloko hinkwavo va hlamala hinkwaswo leswi Yesu a swi endleke, a byela vadyondzisiwa va yena, a ku: “Loko mi ri n'wina, yingisisani swinene marito lawa: N'wana wa Munhu u ta nyiketiwa emavokweni ya vanhu.” ₄₅Kambe a va twisisanga marito lawa, a ma siveriwa ka vona, leswaku va nga tshuki va ma twisisa; kutani va chava ku n'wi vutisa mhaka leyi.

₄₆Kutani ku humelela ku kanetana exikarhi ka vona, ku tiva la nga nkulukumba wa vona. ₄₇Kuteloko Yesu a vona miehleketo ya timbilu ta vona, a teka xihlangi, a xi veka ekusuhi na yena, kutani a ku eka vona: ₄₈“Un'wana ni un'wana la amukelaka xihlangi lexi hi vito ra mina, wa ndzi amukela; kutani la ndzi amukelaka, u amukela la ndzi rhumeke. Hikuva lontsongo exikarhi ka n'wina hinkwenu, hi yena la nga ta va lonkulu.”

₄₉Kutani Yohane a vulavula, a ku: “N'wini, hi vonile un'wana la hlongolaka mademona hi vito ra wena, kutani hi n'wi arisile, hikuva a nga ku landzi swin'we na hina.” ₅₀Yesu a ku eka yena: “Mi nga tshuki mi n'wi arisa hikuva la nga lwiki na hina wa hi lwela.”

₅₁Kakuloko nkarhi wa ku tlakusiwa ka yena wu lava ku fika, a tiyisa mombo wa yena ku ya Yerusalema. ₅₂Kutani a rhuma tintsumi leswaku ti n'wi rhangela emahlweni; kutani va suka, va nghena emutini wa Vasamariya ku n'wi lunghisela kona. ₅₃Kambe a va n'wi amukelanga, hikuva mombo wa yena a wu kongoma eYerusalema. ₅₄Vadyondzisiwa va yena, Yakobo na Yohane, loko va swi vona, va ku: “Hosi, xana wa swi rhandza leswaku hi ku, ndzilo wu xika hi le tilweni, wu va hisa, tanihi leswi Eliya a nga swi endla xana?” ₅₅Kambe Yesu a rhendzeleka, a va laya, a ku: “A mi wu tivi moya lowu mi nga na wona! ₅₆Hikuva N'wana wa Munhu u tile, ku nga ri ku lovisa vanhu kambe ku va hlayisa.” Kutani va ya emutini wun'wana.

₅₇Kakuloko va ha famba endleleni, munhu a ku eka yena: “Hosi, ndzi ta ku landza hinkwako laha u nga ta ya kona.” ₅₈Kambe Yesu a ku eka yena: “Vahlati va ni micele, ni tinyanyana ta tilo ti ni swisaka, kambe N'wana wa Munhu a nga na laha a nga seketelaka nhloko ya yena kona.”

₅₉Yesu a ku eka un'wana: “Ndzi landze.” Yeloyi a ku: “Hosi, wanga ndzi pfumelela ndzi rhanga ndzi ya lahla tatana.” ₆₀Yesu a ku eka yena: “Tshika vafi va lahla vafi va vona; kambe wena famba u ya vula ku fuma ka Xikwembu.”

₆₁Un'wana a ku: “Ndzi ta ku landza. Hosi, kambe ndzi pfumelele ndzi rhanga ndzi ya lela ve ekaya ka mina.” ₆₂Yesu a ku eka yena: “La vekaka voko ra yena exikon'wini, kutani a rhendzeleka a languta endzhaku, a nga lulameri ku fuma ka Xikwembu.”