LUKA 23

₁Kutani hinkwavo va suka va yima, va n'wi yisa eka Pilato, ₂va sungula ku n'wi hehla, va ku: “Hi kumile munhu loyi a hlohlotela tiko, a tshimbisa vanhu ku humesela Khezari ndzuvo; naswona u tivula Kriste, hosi.” ₃Kutani Pilato a n'wi vutisa, a ku: “Xana hi wena hosi ya Vayuda-ke?” Yesu a hlamula a ku: “Wa vurisa.”

₄Kavaloko Pilato a ku eka vaprista lavakulu ni ka vunyingi: “A ndzi kumi nandzu eka munhu loyi.” ₅Kambe va chivirika, va ku: “U pfilunganya tiko hinkwaro ra Yudiya hi ku dyondzisa, ka hari mpfhuka a sungula eGaleliya, ku fika kwala.”

₆Kuteloko Pilato a va twa va vula vito ra Galeliya, a vutisa, a ku: “Xana munhu loyi i wa Galeliya xana?” ₇Kuteloko a twile leswaku i munhu wa ku fuma ka Heroda, a n'wi rhumela eka Heroda, loyi ngi a ri eYerusalema na yena, hi masiku walawo.

₈Kuteloko Heroda a vona Yesu, a tsaka ngopfu, hikuva a ku ri khale a rhandza ku n'wi vona hikwalaho ka timhaka ta yena leto tala leti a ti tweke; kutani a tshemba leswaku u ta n'wi vona a endla masingita. ₉A n'wi vutisa timhaka to tala, kambe Yesu a nga n'wi hlamulanga nchumu. ₁₀Kambe vaprista lavakulu ni vatsari va yima, va n'wi hehla hi matimba. ₁₁Kutani Heroda a n'wi sandza a ri ni tinhenha ta yena, a n'wi tseketsela; kuteloko a n'wi funengetile hi nguvu leyi vangamaka, a n'wi tlherisela eka Pilato. ₁₂Kutani hi siku rero, Pilato na Heroda va sungula ku rhandzana, hikuva khale a va vengana.

₁₃Kambe Pilato a hlengeleta vaprista lavakulu, ni vakulu va tiko, ni vunyingi, a ku eka vona: “Mi tisile munhu loyi eka mina, mi ku: ‘U hambukisa tiko,’ ₁₄kutani vonani, ndzi n'wi vutisile mi ri kona, kambe a ndzi kumanga eka yena, hambi wu ri nandzu wun'we wa leswi mi n'wi hehlaka ha swona. ₁₅Swi tano na Heroda, hikuva u n'wi tlheriserile eka hina; kutani vonani, a nga endlanga xilo ni xin'we lexi fanekeriwaka hi ku fa. ₁₆Hikwalaho, ndzi ta n'wi ba, kutani ndzi ta n'wi tshunxa.”

₁₇Kambe a a fanele ku va tshunxela un'wana hi nkhuvo. ₁₈Kutani va huwelela hinkwavo swin'we va ku: “Susa loyi, u hi tshunxela Barabasi.” ₁₉Munhu yeloyi a nghenisiwile ekhotsweni hikuva a a pfuxile dzolonga exikarhi ka muti, ni hikwalaho ka ku dlaya munhu. ₂₀Pilato a engeta a vulavula na vona, hikuva a a rhandza ku tshunxa Yesu. ₂₁Kambe va engeta va huwelela, va ku: “N'wi vambe! N'wi vambe!” ₂₂A vulavula na vona ra vunharhu, a ku: “Loyi, u dyohile yini xana? A ndzi kumi eka yena nandzu lowu a nga dlayeriwaka wona; hikwalaho ndzi ta n'wi ba, kutani ndzi ta n'wi tshunxa.” ₂₃Kambe va huwelela hi marito lamakulu, va kombela leswaku a vambiwa; kutani ku huwelela ka vona ni ka vaprista ku va ku hlula.

₂₄Kutani Pilato a tsema mhaka, a ku: “A ku endliwe hilaha va kombelaka hakona.” ₂₅Kutani a va tshunxela la komberiweke hi vona la khotsiweke hikwalaho ka dzolonga ni ku dlaya munhu, kutani a nyiketa Yesu eku rhandzeni ka vona.

₂₆Kakuloko va n'wi yisa eku dlaweni, va teka un'wana la vuriwaka Simoni wa Kirene, la humaka emasin'wini, va n'wi rhwarisa xihambano endzhaku ka Yesu.

₂₇Kutani vunyingi lebyikulu bya tiko, ni vavasati lavo tala, a va n'wi landza, va ri karhi va tiba swifuva, va n'wi rila. ₂₈Kambe Yesu a rhendzelekela eka vona, a ku: “Vanhwanyana va Yerusalema, mi nga ndzi rileli; tirileleni n'wina ni vana va n'wina. ₂₉Hikuva vonani, masiku ma ta, lawa va nga ta ku: ‘Ku katekile timhika, ni makhwiri lama nga velekangiki, ni mavele lama nga an'wisangiki.’ ₃₀Enkarhini wolowo, va ta ku eka tintshava: ‘Hi weleni ehenhla,’ ni ka switsunga: ₃₁‘Hi funengeteni,’ hikuva, leswi va endliseke sweswo eka rikunyi leri tsakamaka, ku ta endlisiwa yini eka leri omeke?”

₃₂A va yisa ni van'wana vambirhi, swi ri swidyohi, ku ya dlawa na yena.

₃₃Kuteloko va fikile exivandleni lexi va nge i Ripala, va n'wi vamba kona ni swidyohi; xin'wana xi va evokweni ra xinene, xin'wana eka lera ximatsi. ₃₄Kambe Yesu a ku: “Tatana, va rivalele, hikuva a va tivi leswi va swi endlaka.” Kutani va avelana tinguvu ta yena hi ku ti hlahluva hi vuhlolotwana.

₃₅Vunyingi a byi yimile byi languta; na tona tihosi ti n'wi tseketsela, ti ku: “U hanyisile van'wana! A a tiponise na yena loko a ri Kriste, muhlawuriwa wa Xikwembu!” ₃₆Na tona tinhenha ti n'wi tseketsela, ti tshinela, ti n'wi nyika ntsuvi, ti ku eka yena: ₃₇“Loko u ri Hosi ya Vayuda, tiponise-ke!”

₃₈Kambe a ku ri ni papila enhlokweni ya yena, leri nge: “Loyi, i Hosi ya Vayuda.”

₃₉Xidyohi xin'wana xa leswi vambiweke, xi n'wi tseketsela na xona, xi ku: “Loko u ri Kriste, tiponise, na hina, hi ponise!” ₄₀Kambe xin'wana xi n'wi holovela, xi ku: “Xana a ku chavi Xikwembu ha yini; kasi u avanyisiwe swin'we na loyi. ₄₁Kasi, loko hi ri hina, swi hi lulamele; hikuva hi amukela leswi fanekelaka leswi hi swi endleke; kambe loyi, a nga dyohanga nchumu.” ₄₂Kutani xi ku eka Yesu: “Hosi, ndzi anakanye loko u nghenile eku fumeni ka wena.” ₄₃Yesu a ku eka xona: “Kunene, ndzi ri eka wena: Namuntlha u ta va na mina eParadeyisini.”

₄₄Hi nkarhi lowu laveke ku va wa ntlhanu na wun'we (ninhlekanhi), munyama wu va kona emisaveni hinkwayo, ku fika enkarhini wa ntlhanu na mune (ni ndzhenga). ₄₅Dyambu rona ri endla ntima, kutani nguvu leyi tsemakanyisaka tempele, yi handzuka hi le xikarhi.

₄₆Kutani Yesu a huwelela hi rito lerikulu, a ku: “Tatana, ndzi nyiketa moya wa mina emavokweni ya wena.” Loko a ri karhi a vula sweswo, a fa.

₄₇Ndhuna ya dzana, kuteloko yi vonile leswi humeleleke, yi dzunisa Xikwembu, yi ku: “Kunene munhu loyi a a lulamile.” ₄₈Kutani vanhu hinkwavo lava hlengeletaneke ku languta, va tlhelela ekaya, va tiba swifuva, loko va vona leswi humeleleke.

₄₉Kutani lava tivanaka na yena hinkwavo, ni vavasati lava n'wi landzeke loko a huma eGaleliya, a va yimile ekule, va langutisa swilo leswo.

₅₀Kutani ndhuna yin'wana leyi vuriwaka Yosefa, a yi ri kona, a a ri munhu wa tintswalo, la lulameke. ₅₁A nga pfumelelanga makungu ya vona, ni ku endla ka vona; a a ri wa Arimatiya, muti wa Vayuda; na yena a a langutela ku fuma ka Xikwembu. ₅₂Yeloyi a ya eka Pilato, a kombela ntsumbu wa Yesu. ₅₃Kuteloko a wu hawurile, a wu phutsela hi nguvu, a wu lahla esirheni leri vatliweke eribyeni, laha ku nga siki lahliwa munhu kona. ₅₄Siku rero a ri ri ra ku lunghisela, hikuva Savata a ri ri kusuhi.

₅₅Na vona vavasati lava humeke eGaleliya na yena, a va tshinela, va languta sirha, ni mukhuva lowu ntsumbu wa Yesu wu vekiwaka ha wona. ₅₆Kutani va tlhelela ekaya, va ya lunghisa mirhi ya risuna; kambe hi siku ra Savata, va wisa hi nawu.