LUKA 22

₁Nkhuvo wa swinkwa leswo kala comela, lowu vuriwaka Paseka, a wu tshinele. ₂Kutani vaprista lavakulu ni vatsari a va lava hilaha va nga ta dlaya Yesu hakona, hikuva a va chava tiko.

₃Kambe Satana a nghena eka Yudasi la vuriwaka Iskariyota, la nga hlayiwa ni lava khume na vambirhi; ₄kutani a ya eka vaprista lavakulu, ni ka tindhuna ta nyimpi, ku kanela na vona hilaha a nga ta va nyiketa yena hakona. ₅Kutani va tsaka, va pfumelelana ku n'wi nyika mali. ₆Kuteloko a pfumerile, a lava hilaha a nga ta va nyiketa yena hakona, ku nga ri na dzolonga.

₇Kuteloko siku ro sungula ra swinkwa leswo kala comela ri fikile, ri nga leri va tlhavaka Paseka ha rona, ₈a rhuma Petro na Yohane, a ku eka vona: “Yanani, mi hi lunghisela Paseka leswaku hi ta yi dya.” ₉Kambe va ku eka yena: “Hi kwihi laha u swi rhandzaka leswaku hi ya lunghisa kona?” ₁₀A ku eka vona: “Loko mi nghenile emutini, mi ta hlangana ni munhu la rhwaleke khuwana ra mati; mi n'wi landzela endlwini leyi a nga ta nghena eka yona. ₁₁Kutani byelani n'wini wa yindlu, mi ku: ‘Mufundhisi u ri eka wena: Yindlu yi kwihi laha ndzi nga ta dya Paseka eka yona ni vadyondzisiwa va mina?’ ₁₂Kutani u ta mi komba yindlu leyikulu, leyi nga ehenhla, leyi andlariweke; hi kona mi nga ta hi lunghisela kona.” ₁₃Kutani va suka, va ya kuma swi ri tano, hilaha a nga va byerisa swona; kutani va lunghisa Paseka.

₁₄Loko nkarhi wu fikile, a tshama etafuleni swin'we ni vaapostola. ₁₅Kutani a ku eka vona: “Ndzi swi rhandzile ngopfu ku dya Paseka leyi na n'wina, ndzi nga si vaviseka; ₁₆hikuva ndzi ri eka n'wina: Ku sungula sweswi, a ndzi nga ha yi dyi, ku ko ku fika siku leri yi nga ta hetiseka eku fumeni ka Xikwembu.”

₁₇Kuteloko a tekile xinwelo, a khensa, a ku: “Tekani mi siyerisana; ₁₈hikuva ndzi ri eka n'wina: A ndzi nga ha nwi murhi wa vhinya, ku ko ku fika ku fuma ka Xikwembu.”

₁₉A va a teka swinkwa, kuteloko a khensile, a phema, a va nyika, a ku: “Leswi, i miri wanga, lowu nyikeriwaka n'wina; endlisani sweswo, mi ta ndzi anakanya ha swona.” ₂₀A endlisa sweswo ni xinwelo, loko va lalele, a ku: “Xinwelo lexi, i ntwanano lowuntshwa engatini ya mina, leyi halateriwaka n'wina. ₂₁Kambe vonani, voko ra la ndzi xengaka ri kona la etafuleni na mina. ₂₂Loko a ri N'wana wa Munhu, u ta tifambela hilaha swi nga vuriwa hakona, kambe u ni khombo munhu loyi a n'wi xengaka.” ₂₃Kutani va sungula ku vutisana, va ta tiva xana i mani exikarhi ka vona la nga ta swi endla.

₂₄Kutani ku kanetana ku va kona exikarhi ka vona, ku tiva la ringanisiwaka lonkulu. ₂₅Kambe a ku eka vona: “Tihosi ta matiko ta ma fuma; kutani lava ma fumaka hi matimba va vuriwa vakatekisi va wona. ₂₆Kambe swi nga tshuki swi va tano eka n'wina; kambe lonkulu exikarhi ka n'wina, a a kotise lontsongo; kutani la fumaka a a kotise la tirhaka. ₂₇Hikuva lonkulu i mani? Xana hi la tshamaka etafuleni, kumbe la tirhelaka kona xana? A hi la tshamaka etafuleni xana? Kambe mina, ndzi le xikarhi ka n'wina kukota la tirhelaka. ₂₈Kambe hi n'wina lava tiyiseleke na mina emiringweni ya mina. ₂₉Na mina ndzi ta mi nyika ku fuma kukota Tatana a ndzi nyikeke kona. ₃₀Mi ta va lava dyaka, ni lava nwaka etafuleni ra mina, eku fumeni ka mina; kutani mi ta tshama eswiluvelweni, mi avanyisa tinxaka ta khume na timbirhi ta Israele.”

₃₁Kutani Hosi yi ku: “Simoni, Simoni, waswivo, Satana a mi komberile, leswaku a mi hlela kukota mavele; ₃₂kambe mina ndzi ku khongelele, leswaku ku pfumela ka wena ku nga tshuki ku titivala. Kutani wena, loko u hundzukile, u ta tiyisa vamakwenu.” ₃₃Kambe Petro a ku eka yena: “Ndzi tilunghisele ku ya na wena ekhotsweni ni le eku feni.” ₃₄Kambe Yesu a ku eka yena: “Petro, ndza ku byela leswaku, nkuku wu nga ka wu nga ringi namuntlha, u nga si landzula kanharhu leswaku wa ndzi tiva.”

₃₅Kutani a ku eka vona: “Enkarhini lowu ndzi mi rhumeke, mi nga ri na xikwamana xa mali, ni nkwama wa timbuva, ni tintanghu, xana mi vuyile mi pfumala nchumu xana?” Va ku: “A hi pfumalanga nchumu.” ₃₆Kutani a ku eka vona: “Kambe sweswi, la nga ni xikwamana xa mali, a a xi teke, ni la nga ni nkwama wa timbuva, a endla sweswo na yena, kutani la pfumalaka tlhari, a a tixavele rona hi nguvu ya yena. ₃₇Hikuva ndza mi byela leswaku, mhaka leyi tsariweke yi fanele ku hetiseka eka mina, leyi nge: ‘U hlayiwile ni swidyohi.’ Hikuva leswi ndzi bvumbhiweke ha swona, kunene swi ta hetiseka.” ₃₈Kutani va ku: “Hosi, matlhari mambirhi hi lawa!” Yesu a ku eka vona: “Swi ringene.”

₃₉Kutani a suka a ya eNtshaveni ya Mitlhwari, hi ku tolovela ka yena; kutani vadyondzisiwa va yena va n'wi landza. ₄₀Kuteloko va fikile kona, a ku eka vona: “Khongelani leswaku mi nga ngheni emiringweni.”

₄₁Kutani a va sukela, a ya ekulenyana, hi mpfhukanyana lowu ringanaka ku hoxiwa ka ribye, kutani a khinsama, a khongela, a ku: ₄₂“Tatana, loko u swi rhandza, tshineta ndzheko lowu ekule na mina! Kambe, ku nga endliwi ku rhandza ka mina, a ku endliwe ka wena.” ₄₃Kutani ntsumi yi humelela, yi huma etilweni, yi ta n'wi tiyisa. ₄₄Kakuloko a ri emaxangwini lamakulu, a tiyisa matimba ku khongela; kavaloko nyuku wa yena wu xiririka, wu fana ni mathonsi ya ngati lama tshonelaka emisaveni. ₄₅Kuteloko a sukile eku khongeleni, a ta eka vadyondzisiwa, a va kuma va etlele hi gome. ₄₆Kutani a ku eka vona: “Xana mi etlelele yini? Pfukani, mi khongela, leswaku mi nga ngheni emiringweni.”

₄₇A ku a ha vulavula, ku humelela ntshungu wa vanhu, kutani la vuriwaka Yudasi un'wana wa lava khume na vambirhi, a a wu rhangele emahlweni, a tshinelela Yesu ku n'wi ntswontswa. ₄₈Kambe Yesu a ku eka yena: “Yudasi, xana u nyiketa N'wana wa Munhu hi ku n'wi ntswontswa xana?” ₄₉Kutani lava ngi va ri na yena, loko va vona leswi nga ta humelela, va ku eka yena: “Hosi, xana hi ta lwa hi tlhari xana?” ₅₀Kutani un'wana wa vona a tlhava nandza wa muprista lonkulu, a n'wi tsema ndleve ya xinene. ₅₁Kambe Yesu a vulavula, a ku: “Va tshikeni.” Kutani a khumba ndleve ya munhu loyi, a n'wi horisa.

₅₂Kutani Yesu a vulavula ni lava nga n'wi tela, va nga vaprista lavakulu, ni tindhuna ta nyimpi ya tempele, ni vakulukumba, a ku eka vona: “Mi humile ku ta ndzi khoma hi tisavula ni tinhonga, kukota loko ngi ndzi ri khamba; ₅₃a ndzi tshama ndzi ri na n'wina etempeleni hi masiku; a mi vekanga mavoko ehenhla ka mina; kambe hi wona nkarhi wa n'wina, ni matimba ya munyama.” ₅₄Kuteloko va n'wi khomile va n'wi yisa endlwini ya muprista lonkulu. Kambe Petro a a landzela a ri ekule.

₅₅Kuteloko va tshiverile ndzilo ehubyeni, va tshamisa swin'we; na yena Petro a tshama exikarhi ka vona. ₅₆Nandza un'wana wa wansati, kakuloko a n'wi vona a tshamile ekusuhi ni ndzilo, a n'wi langutisa, a ku: “Na yena loyi a a ri na yena.” ₅₇Kambe yena a n'wi landzula, a ku: “Wansati, a ndzi n'wi tivi!”

₅₈Kaharhi sweswo, un'wana a n'wi vona, a ku: “Na wena u wa vona.” Kambe Petro a ku: “Munhu ndzi wena, a ndzi wa vona!”

₅₉Kuteloko ku hundzile nkarhi wu ri wun'we, un'wana a tiyisa, a ku: “Kunene na loyi a a ri na yena, hikuva na yena i wa le Galeliya.” ₆₀Kambe Petro a ku: “Munhu ndzi wena, a ndzi tivi lexi u xi vulaka!” A ku a ha vulavula, nkuku wu ringa hi nomu lowu. ₆₁Kutani Hosi yi hundzuluka, yi languta Petro; kutani Petro a tsundzuka rito ra Hosi hilaha yi nga n'wi byela hakona, yi ku: “Nkuku wu nga si ringa, u ta va u ndzi landzule kanharhu.” ₆₂Kutani Petro a humela ehandle, a rila hi xiviti.

₆₃Kutani vavanuna lava khomeke Yesu va n'wi hleka, va n'wi ba; ₆₄kuteloko va n'wi sive mahlo, va n'wi vutisa, va ku; “Bvumbha la ku beke.” ₆₅Kutani va n'wi sandza hi timhaka tin'wana leto tala.

₆₆Kuteloko byi xile, vakulu va tiko ni vaprista lavakulu ni vatsari, va hlengeletana, va n'wi yisa ehubyeni ya vona, ₆₇va ku eka yena: “Loko u ri Kriste, hi byele.” A ku eka vona: “Hambi ndzi mi byela, mi nga ka mi nga pfumeri. ₆₈Kambe, hambi ndzi mi vutisa, a mi nga ndzi hlamuri, kambe mi nga ka mi nga ndzi tshiki. ₆₉Ku sungula sweswi, N'wana wa Munhu u ta tshama evokweni ra xinene ra matimba ya Xikwembu.”

₇₀Kambe hinkwavo va ku: “Xana hileswaku u N'wana wa Xikwembu xana?” A ku eka vona: “Ma vurisa, ndzi yena.” ₇₁Kutani va ku: “Ha ha lavela yini vumbhoni xana? Hikuva na hina hi ti twile hi nomu wa yena.”