LUKA 20

₁Hi siku rin'wana eka walawo, kakuloko a dyondzisa vanhu etempeleni a va byela Evhangeli, vaprista lavakulu ni vatsari va fika swin'we ni vakulu va tiko; va vulavula na yena, va ku: ₂“Wa nga hi byela, matimba lawa u endlaka swilo leswi ha wona, ni leswaku la ku nyikeke matimba lawa i mani xana?” A va hlamula, a ku eka vona: ₃“Na mina ndzi ta mi vutisa mhaka: ₄Ndzi byeleni: Xana ku khuvula ka Yohane a ku huma etilweni kumbe a ku huma eka vanhu xana?” ₅Kambe va vutisana, va ku: “Loko hi ku: ‘Ku hume etilweni,’ u ta ku: ‘A mi pfumelanga ha yini?’ ₆Kutani loko hi ku: ‘Ku hume eka vanhu,’ tiko hinkwaro ri ta hi khandla hi maribye, hikuva hinkwavo va kholwa ngopfu leswaku Yohane a a ri muprofeta.” ₇Kutani va hlamula, va ku: “A hi tivi laha ku humaka kona.” ₈Kwalaho Yesu a ku eka vona: “Na mina a ndzi nga mi byeri matimba lawa ndzi endlaka swilo leswi ha wona.”

₉Kutani a sungula ku byela vanhu xifaniso lexi, a ku: “Munhu un'wana a a byarile nsimu ya vhinya, kutani a yi hirisela varimi, kavaloko a ya eku endzeni hi nkarhi lowukulwanyana. ₁₀Hi nkarhi wa ku tshovela, a rhuma nandza wa yena eka varimi leswaku va n'wi nyika mihandzu ya vhinya. Kambe varimi va n'wi ba, va n'wi tlherisa va nga n'wi nyikanga nchumu. ₁₁A engeta a rhuma nandza un'wana; na yena, va n'wi ba, va n'wi khomisa tingana, kutani va n'wi tlherisa ntsena. ₁₂A engeta a rhuma wa vunharhu, yeloyi, kuteloko va n'wi boxe timbanga, va n'wi hlongola. ₁₃Kutani n'wini wa nsimu a ku: ‘Ndzi ta endla yini? Ndzi ta rhuma n'wana wa mina, loyi ndzi n'wi rhandzaka, kumbe loko va n'wi vona, va ta n'wi chava.’ ₁₄Kambe varimi, loko va n'wi vona, va byelana va ku: ‘Mudyandzhaka hi loyi; a hi n'wi dlayeni, leswaku ndzhaka yi va ya hina.’ ₁₅Kutani va n'wi humesela ehandle ka nsimu, va n'wi dlaya. N'wini wa nsimu u ta endla yini xana? ₁₆U ta ta, a dlaya varimi valavo, a va a nyika van'wana nsimu va vhinya.” Loko Vayuda va twa sweswo, va ku: “Swi nga tshuki swi va tano.” ₁₇Kutani a va languta, a ku: “I yini leswi tsariweke, loko va te: ‘Ribye leri tshikiweke hi vaaki hi rona leri endliweke ribye ra yinhla’? ₁₈Un'wana ni un'wana la nga ta wela ehenhla ka ribye leri, u ta pyanyiwa; kambe ri ta pyanya loyi ri nga ta n'wi wela ehenhla.” ₁₉Kutani vaprista lavakulu ni vatsari, va lava ku n'wi khoma enkarhini wolowo, kambe va chava vunyingi; hikuva va swi twile leswaku u ringanise vona hi xifaniso lexi.

₂₀Kutani va n'wi xiya, va rhuma tinhlori leti tiendlaka vanhu lavanene, leswaku va ta n'wi phasa hi marito ya yena, va ta n'wi nyiketa tihosi ni le matimbeni ya mufumi. ₂₁Va n'wi vutisa, va ku: “Mufundhisi, ha swi tiva leswaku u vulavula u va u dyondzisa hi ku lulama: a ku languti nghohe ya munhu, kambe u dyondzisa ndlela ya Xikwembu hi ntiyiso. ₂₂Xana swa hi lulamela ku humesela Khezari ndzuvo, kumbe a hi swona-ke?” Kuteloko a vona mano ya vona, a ku eka vona: ₂₃“Mi ndzi ringela yini xana? Ndzi kombeni denari. Yi ni xifaniso xa mani, ni vito ra mani?” ₂₄Va n'wi hlamula, va ku: “Swa Khezari.” ₂₅A ku eka vona: “Tlheriselani swa Khezari eka Khezari, ni swa Xikwembu eka Xikwembu.” ₂₆Kutani va hluleka ku n'wi phasa hi marito ya yena emahlweni ka vanhu, kambe va hlamala hi ku hlamula ka yena, kutani va miyela.

₂₇Kutani Vasaduki van'wana lava vulaka leswaku a ku na ku pfuka ka vafi, va ta eka Yesu ku n'wi vutisa, va ku: ₂₈“Mufundhisi, Muxe u hi tsalele, a ku: ‘Loko munhu a tekile nsati kutani a fa a nga ri na vana, makwavo u ta teka nsati wa yena a velekela makwavo vana.’ ₂₉Kambe vana va munhu a va ri kona va ntlhanu na vambirhi; hosi ya vona, kuteloko a tekile nsati, a fa a nga ri na vana. ₃₀Wa vumbirhi a teka nsati yeloyi, kutani na yena a fa a nga ri na vana. ₃₁Wa vunharhu a n'wi teka, kutani swi va tano eka lava ntlhanu na vambirhi; va fa va nga siyanga vana. ₃₂Endzhaku ka vona hinkwavo, na yena wansati a fa. ₃₃Xana eku pfukeni ka vafi, u ta va nsati wa mani eka vona? Hikuva va n'wi tekile hinkwavo.” ₃₄Yesu a va hlamula, a ku: “Vana va misava leyi va teka, va tekisa; ₃₅kambe lava nga ta nyikiwa ku vona tinguva leti taka, ni ku pfuka ka vafi, va nga ka va nga teki na swona va nga ka va nga tekisi; ₃₆hikuva va nga ka va nga ha fi, hikuva va ta fuma ni tintsumi, va va vana va Xikwembu, hi leswi va nga vana va ku pfuka. ₃₇Loko ku ri ku pfuka ka vafi, Muxe na yena u ku kombisile siku leri a nga ekusuhi ni xihlahla, loko a vula Hosi, Xikwembu xa Abrahama, ni Xikwembu xa Isaka, ni Xikwembu xa Yakobo. ₃₈Kasi a hi Xikwembu xa lava feke, kambe i xa lava hanyaka; hikuva hinkwavo vanhu va hanya ka xona.” ₃₉Kutani vatsari van'wana, va hlamula, va ku: “Mufundhisi, u hlamule swinene.” ₄₀Kutani a va ha tiyanga ku n'wi vutisa mhaka yin'wana.

₄₁Kutani a ku eka vona: “Vanhu va ri Kriste i n'wana wa Davhida hi mukhuva wihi xana? ₄₂Kasi yena Davhida u vurile ebukwini ya Tipisalema a ku: ‘Hosi yi byerile Hosi yanga yi ku: ₄₃Tshamisa evokweni ra mina ra xinene, ndzi kondza ndzi endla valala va wena vunavelo bya milenge ya wena.’ ₄₄Sweswi, loko Davhida a n'wi vula Hosi ya yena, a nga va n'wana wa yena hi mukhuva wihi xana?”

₄₅Kakuloko vunyingi hinkwabyo byi ri karhi byi n'wi yingisa, a ku eka vadyondzisiwa va yena: ₄₆“Chavani vatsari lava rhandzaka ku tifambela hi tinguvu leto leha, ni ku xewetiwa emitsendzeleni, va rhandza switshamo leswo rhanga emasinagogeni, ni switshamo leswo rhanga emikhubyeni. ₄₇Va dyelela tindlu ta tinoni hi ku ti endlela swikhongelo leswo leha. Valavo va ta avanyisiwa hi ku avanyisa loku hundzisaka.”