LUKA 14

₁Kuteloko a nghenile hi siku ra Savata endlwini ya nkulukumba un'wana wa Vafarisi, ku ya dya swakudya kona, vona a va n'wi xiya. ₂Kambe munhu la nga vabya hi xirhumberhumbe a a ri emahlweni ka yena. ₃Kavaloko Yesu a vulavula na vona, a ku eka vafundhisi va nawu ni ka Vafarisi: “Xana swa pfumeleriwa ku hanyisa munhu hi Savata xana?” ₄Kambe va miyela. Kwalaho a n'wi teka, a n'wi hanyisa, a va a n'wi tlherisa. ₅Kutani a vulavula na vona, a ku: “I mani eka n'wina, kungakuloko mbhongolo ya yena, kumbe homu ya yena, yi wele ekheleni, a nga ka a nga hatlisi a yi humesa, hi siku ra Savata xana?” ₆Kutani va tsandzeka ku n'wi hlamula marito lawa.

₇A engeta a byela lava vitaniweke eswakudyeni, loko a vona hilaha va tihlawulelaka switshamo swo rhanga hakona, a ku eka vona: ₈“Kungakuloko munhu a ku vitile enkhubyeni, u nga tshuki u ya tshamisa exitshan'weni lexo rhanga; swingari leswaku kumbe a nga va kona la ku tlulaka hi ku chaviwa, la vitaniweke na yena, hi n'wini wa nkhuvo; ₉kutani la nga n'wi vita na wena, a nga ta ku byela, a ku: ‘Sukela loyi, exitshamo lexi,’ kutani u ya tshama u ri ni tingana exitshan'weni lexi nga endzhaku. ₁₀Kambe kungakuloko u vitaniwile, u ya tshamisa exitshan'weni lexi nga endzhaku, leswaku la ku viteke, loko a ta a ku byela a ku: ‘Nakulorhi, tlhandlukela ehenhla.’ Kutani kwalaho u ta dzunisiwa emahlweni ka lava tshameke eswakudyeni na wena. ₁₁Hikuva un'wana ni un'wana la titlakusaka, u ta tsongahatiwa; kambe un'wana ni un'wana la titsongahataka, u ta kurisiwa.”

₁₂Kambe a ku eka loyi a n'wi vitaneke: “Loko u endla nkhuvo wa xifihlulo, kumbe wa xisalelo, u nga tshuki u vitana vanakuloni, kumbe vamakwenu, kumbe maxaka ya wena, kumbe lava fuweke lava u akeke na vona; swi nga ri leswaku kumbe na vona va ku vitana, va etisa swa wena. ₁₃Kambe loko u endla nkhuvo, vitana vapfumari, ni swilema, ni lava khwitaka, ni lavo fa mahlo; ₁₄kutani u ta kateka, hikuva va pfumala swa ku ku etisela swona, hikuva u ta etiseriwa hi siku ra ku pfuka ka lava lulameke.”

₁₅Un'wana wa lava tshameke eswakudyeni, loko a twa timhaka teto, a ku eka yena: “Ku katekile la nga ta dya swakudya eku fumeni ka Xikwembu!” ₁₆Kambe Yesu a ku eka yena: “Munhu un'wana a endla xilalelo lexikulu, a rhamba vanhu lavo tala eka xona. ₁₇Kutani a rhuma nandza wa yena hi nkarhi wa ku lalela ku byela lava rhambiweke leswaku: ‘Tanani, swilo hinkwaswo swi lunghisiwile.’ ₁₈Kambe hinkwavo va va nomu wun'we ku tilandzula. Lowo sungula a ku eka yena: ‘Ndzi xavile nsimu, kutani ndzi fanele ku ya yi vona; ndza ku khongela leswaku u ndzi landzulela.’ ₁₉Un'wana a ku: ‘Ndzi xavile khume ra tihavi, kutani ndzi ya eku tiringeteni; ndza ku khongela leswaku u ndzi landzulela.’ ₂₀Un'wana a ku: ‘Ndzi hlomisile nsati; hikwalaho ndzi nga ka ndzi nga yi.’ ₂₁Nandza yeloyi a tlhela, a ya tivisa n'wini wa yena timhaka teto, Kavaloko n'wini wa yindlu a kariha, a ku eka nandza wa yena: ‘Hatlisa u ya etihubyeni, ni le mitsendzeleni ya muti, u tisa halenu vapfumari, ni swilema, ni lavo fa mahlo, ni lava khwitaka.’ ₂₂Kutani nandza a ku: ‘Hosi, ku endliwile hilaha u leriseke hakona, kambe vutshamo bya ha ri kona.’ ₂₃Kutani n'wini a ku eka nandza: ‘Famba etindleleni, ni le swihlahleni, u hluhlurheta vanhu ku nghena, yindlu ya mina yi tala. ₂₄Hikuva ndzi ri eka n'wina: A ku na munhu ni un'we wa lava vitaniweke, la nga ta nantswa xisalelo xa mina.’ ”

₂₅Mitshungu leyikulu a yi famba na yena, kutani a va hundzulukela, a ku: ₂₆“Kungakuloko un'wana a ta eka mina, a nga vengi tata wa yena, ni mana wa yena, ni nsati wa yena, ni vana, ni vamakwavo, na byona vutomi bya yena, a nga ka a nga vi mudyondzisiwa wa mina. ₂₇Kutani la nga rhwariki xihambano xa yena, a ndzi landza, a nga ka a nga vi mudyondzisiwa wa mina. ₂₈Hikuva i mani exikarhi ka n'wina, loko a rhandza ku aka xihondzo, a nga ka a nga rhangi a tshamisa a hlaya leswi nga ta humeseriwa xona xi ko xi hela. ₂₉Swingaku loko a akile masungulo, a tsandzeka ku heta, kutani hinkwavo lava nga ta swi vona, va sungula ku n'wi tsan'wa, va ku: ₃₀‘Munhu loyi, u sungurile ku aka, kambe u tsandzekile ku heta.’ ₃₁Kumbe hosi hi yihi, leyi fambaka ku ya lwa ni yin'wana hosi, xana yi nga ka yi nga rhangi hi ku tshamisa yi endla makungu, yi ta tiva leswaku xana vanhu va yena va dzana ra madzana, va nga ya hlangana ni la taka eka yena ni va madzana mambirhi ya madzana xana? ₃₂Loko swi nga ri tano, a nga rhuma tintsumi ku ya kombela ku etlela ka tiko, a ha ri kule. ₃₃Kutani-ke, un'wana ni un'wana exikarhi ka n'wina la nga tshikiki leswi a nga na swona, a nga ka a nga vi mudyondzisiwa wa mina.

₃₄“Munyu i xilo lexi nandzihaka; kambe loko munyu wu phyama, wu nga lungiwa ha yini-ke? ₃₅A wa ha pfuni nchumu, hambi ku ri ku hundzuka misava, hambi ku ri ku endla vulongo; kambe wu cukumetiwa ehandle. La nga ni tindleve ku yingisa, a a yingise.”