LEVHITIKA 8

₁Yehovha a lerisa Muxe, a ku: ₂“Teka Aroni ni vana va yena, ni tinguvu, ni mafurha yo tola, ni nkunzi ya gandzelo ra nandzu, ni makhuna mambirhi, ni xirhundzu xa swinkwa leswi nga riki na comela, ₃kutani u vitana nhlengeletano hinkwayo enyangweni ya tabernakela ya nhlengeletano.”

₄Muxe a endla hilaha Yehovha a n'wi leriseke hakona, nhlengeletano yi hlengeletana enyangweni ya tabernakela ya nhlengeletano. ₅Kavaloko Muxe a ku eka nhlengeletano: “Lexi Yehovha a xi leriseke ku xi endla, hi lexi.”

₆Kavaloko Muxe a tshineta Aroni ni vana va yena, a va hlantswa hi mati. ₇Kutani a ambexa Aroni hembe, a n'wi boha hi vamba, a n'wi ambexa ni rhoko, kutani a veka efodi ehenhla ka yena, a yi tiyisa hi ngoti ya yona. ₈A n'wi ambexa ni nguvu ya xifuva, a veka eka yona Urimi na Thumimi. ₉A n'wi vehela xihuku enhlokweni, ni le mahlweni ka xihuku, a bohela xiphepherhele xa nsuku, wu nga musingasoro lowo kwetsima, hilaha Yehovha a leriseke Muxe hakona.

₁₀Kutani Muxe a teka mafurha ya ku tola, a tota Yindlu ni swilo hinkwaswo leswi nga ka yona, a swi hlawula. ₁₁A xuva ha yona kantlhanu na kambirhi ealitarini, kutani a tota alitari ni swibya hinkwaswo swa yona, ni xihlambelo ni xikhato xa rona leswaku swi hlawuriwa. ₁₂A chela mafurha ya ku tola enhlokweni ya Aroni ku n'wi hlawula. ₁₃Kutani Muxe a vitana vana va Aroni, a va ambexa tinguvu, a va tsimba hi mavamba, a va bohelela swihuku, hilaha Yehovha a leriseke Muxe hakona.

₁₄A tshineta nkunzi ya gandzelo ra nandzu, Aroni ni vana va yena va tlhandleka mavoko enhlokweni ya nkunzi ya gandzelo ra nandzu. ₁₅Muxe a yi tlhava, a teka ngati ya yona kuteloko a petile ritiho ra yena engatini, a tota timhondzo ta alitari hinkwako; a tengisa alitari; kutani a chela ngati ehansi ka alitari, a yi hlawula leswaku ku ta phahliwa timhamba ehenhla ka yona. ₁₆Muxe a teka mafurha hinkwawo ya mpambana, ni mpambana wa xivindzi, ni tinswo timbirhi, ni mafurha ya tona, a swi hisa ealitarini. ₁₇Loko yi ri nkunzi, ni dzovo ra yona, ni nyama ya yona, ni swanyi wa yona, a swi hisa ehandle ka mixaxa, hilaha Yehovha a leriseke Muxe hakona.

₁₈Kavaloko a tshineta khuna ra holokosta; kutani Aroni ni vana va yena va tlhandleka mavoko enhlokweni ya khuna. ₁₉Va yi tlhava, kutani Muxe a chela ngati ealitarini, hi matlhelo hinkwawo. ₂₀Va hahula khuna hi swirho swa rona, kutani Muxe a hisa nhloko, ni swirho, ni mafurha. ₂₁Va hlantswa marhumbu ni masondzo ematini, kutani Muxe a hisa khuna hinkwaro ealitarini; a yi ri holokosta ya ku nun'hwela ku saseka; a ri ri gandzelo leri hiseriwaka Yehovha, hilaha Yehovha a leriseke Muxe ha kona.

₂₂A tshineta ni khuna ra vumbirhi khuna ra ku veka muprista, kutani Aroni ni vana va yena va tlhandleka mavoko enhlokweni ya khuna. ₂₃Va ri tlhava, kutani Muxe a teka ngati yin'wana ya rona, a tota ha yona ripewapewani ra ndleve ya xinene ya Aroni, ni le khudzwini ra voko ra xinene ra yena, ni le khudzwini ra nenge wa xinene wa yena. ₂₄A vitana vana va Aroni, kutani Muxe a tota hi ngati timpewapewani ta tindleve ta xinene ta vona, ni le tikhudzwini ta mavoko ya xinene ya vona, ni le tikhudzwini ta milenge ya xinene ya vona, kutani Muxe a xuva hi ngati matlhelo hinkwawo ya alitari. ₂₅A teka mafurha ni ncila, ni mafurha hinkwawo ya mpambana, ni mpambana wa xivindzi, ni tinswo letimbirhi ni mafurha ya tona, ni voko ra xinene. ₂₆A engeta a teka ni ximbundzu lexi nga riki na comela, ni ximbundzu lexi pfuviweke hi mafurha, ni xinkwa xa ximphampha exirhundzwini xa swimbundzu leswi nga emahlweni ka Yehovha; a swi veka ehenhla ka mafurha ni le henhla ka voko ra xinene; ₂₇kutani a veka swilo leswi hinkwaswo eswandleni swa Aroni, ni le swandleni swa vana va yena, kutani a swi ndziwita emahlweni ka Yehovha. ₂₈Kutani Muxe a swi teka emavokweni ya vona, a swi hisa ealitarini, ehenhla ka holokosta. A ri ri gandzelo ra ku veka leri nga ni risuna; a yi ri mhamba leyi hiseriwaka Yehovha. ₂₉Kutani Muxe a teka xifuva xa khuna ra ku veka, a xi ndziwita kukotisa nhlengo lowu humesiweke emahlweni ka Yehovha; ku va ku averiwa ka Muxe hilaha Yehovha a leriseke Muxe hakona.

₃₀Kutani Muxe a teka mafurha yo tola, ni ngati leyi nga ealitarini, a xuva ha swona Aroni ni vana va yena swin'we ni tinguvu ta vona; a hlawula sweswo Aroni, ni vana va yena, ni tinguvu ta vona.

₃₁Muxe a byela Aroni ni vana va yena, a ku: “Swekani nyama enyangweni ya tabernakela ya nhlengeletano, mi yi dyela kona ni swinkwa leswi nga exirhundzwini xa gandzelo ra ku veka hilaha ndzi leriseke hakona, ndzi ku Aroni ni vana va yena va ta dya swona. ₃₂Leswi nga ta sala swa nyama ni swa swinkwa, mi ta swi hisa endzilweni. ₃₃Hi masiku ya ntlhanu na mambirhi, mi nga tshuki mi huma enyangweni ya tabernakela ya nhlengeletano, ku ko ku hela masiku ya ku vekiwa ka n'wina; hikuva ku vekiwa ka n'wina ku ta endliwa hi masiku ya ntlhanu na mambirhi. ₃₄Leswi endliweke namuntlha, Yehovha u swi lerisile leswaku mi phahleriwa mhamba. ₃₅Mi ta tshama masiku ya ntlhanu na mambirhi enyangweni ya tabernakela ya nhlengeletano, nhlekanhi ni vusiku, mi endla leswi Yehovha a mi leriseke swona, mi nga ti fa; hikuva ku lerisiwile sweswo.” ₃₆Aroni ni vana va yena va endla sweswo hinkwaswo leswi Yehovha a swi leriseke ha Muxe.