Ta mathyaka ya wanuna ni ya wansati.
1Yehovha a byela Muxe na Aroni, a ku: 2“Byelani vana va Israele, mi ku eka vona: ‘Wanuna un'wana ni un'wana la nga ni ndzundzwana, u yirile ha wona. 3Hi wona nawu lowu vekeriweke lava nga ni ndzundzwana; loko wu hume emirini wa vona, ni loko wu sivekile va yirile. 4Swilawu hinkwaswo leswi loyi a nga ni ndzundzwana a etleleke eka swona, swi yirile, ni swilo hinkwaswo leswi a tshamiseke eka swona, swi yirile. 5La khumbeke xilawu xa yena, u ta hlantswa tinguvu ta yena a hlamba ematini, kambe u ta va la yilaka ku fika nimadyambu. 6La tshamisaka ehenhla ka nchumu lowu munhu, a nga ni ndzundzwana a tshamiseke eka wona, u ta hlantswa tinguvu ta yena, a hlamba ematini kambe u ta va la yilaka ku fika nimadyambu. 7La khumbeke miri wa muvabyi loyi, u ta hlantswa tinguvu ta yena a hlamba ematini kambe u ta va la yilaka ku fika nimadyambu. 8Kutakuloko muvabyi loyi a tshwutela marhi ehenhla ka loyi a tengeke, munhu loyi u ta hlantswa tinguvu ta yena, a hlamba ematini kambe u ta va la yilaka ku fika nimadyambu. 9Xihlalu xin'wana ni xin'wana lexi khandziyiweke hi munhu la nga ni ndzundzwana, xi ta va lexi yilaka. 10Mani na mani la khumbeke xilo xihi ni xihi lexi ngi xi ri ehansi ka yena, u ta va la yilaka ku fika nimadyambu kutani mani na mani la rhwaleke xona u ta hlantswa tinguvu ta yena, a hlamba ematini, kambe u ta va la yilaka ku fika nimadyambu. 11La khumbiweke hi muvabyi loyi, kambe a nga hlambanga, u ta hlantswa tinguvu ta yena, a hlamba ematini, kambe u ta va la yilaka ku fika nimadyambu. 12Loko yi ri mbita ya vumba leyi khumbiweke hi la nga ni ndzundzwana, yi ta fayiwa, loko wu ri ndyelo yi ta hlantswiwa ematini.
13“ ‘Kutakuloko a horile, u ta hlaya masiku ya ntlhanu na mambirhi ya ku tibasisa; kutani u ta hlantswa tinguvu, a hlamba ematini lama kulukaka, kutani u ta va la tengeke. 14Hi siku ra ntlhanu na manharhu u ta tilavela matuva mambirhi, kumbe mavondlo mambirhi ya matuva, a ya tikombisa emahlweni ka Yehovha enyangweni ya tabernakela ya nhlengeletano, a ya nyika muprista. 15Muprista u ta ma humesa, rin'wana ri va gandzelo ra xidyoho, rin'wana yi va holokosta; kutani muprista u ta n'wi phahlela mhamba emahlweni ka Yehovha hikwalaho ka ndzundzwana wa yena.
16“ ‘Kungakuloko eka wanuna ku hume mbewu ya ku veleka, u ta hlamba miri hinkwawo ematini, kambe u ta va la yilaka ku fika nimadyambu. 17Tinguvu hinkwato ni madzovo hinkwawo leswi nga nyamisiwa, swi ta hlantswiwa ematini kambe swi ta va leswi yilaka ku fika nimadyambu. 18Loko a ri nsati la etleleke ni nuna loyi, u ta yila na yena, un'wana ni un'wana u ta hlamba ematini, kambe va ta va lava yilaka ku fika nimadyambu.
19“ ‘Kungakuloko wansati un'wana a ri ni tin'hweti ta yena, hileswaku ngati yi huma eka yena, u ta tshama eku nyameni ka yena hi masiku ya ntlhanu na mambirhi; un'wana ni un'wana la nga ta n'wi khumba, u ta va la yilaka ku fika nimadyambu. 20Xilawu xin'wana ni xin'wana lexi a etleleke eka xona loko a ri ethyakeni ra yena, xi ta va lexi yilaka, ni swilo hinkwaswo leswi a tshamiseke eka swona, swi ta va leswi yilaka. 21Mani na mani la khumbaka xilawu xa yena, u ta hlantswa tinguvu ta yena a hlamba ematini, kambe u ta va la yilaka ku fika nimadyambu. 22Un'wana ni un'wana la khumbaka nchumu wihi ni wihi lowo a tshamiseke eka wona, u ta hlantswa tinguvu ta yena, a hlamba ematini, kambe u ta va la yilaka ku fika nimadyambu. 23Kungakuloko xivati xi ri kona exilawini, kumbe exitshan'weni laha a tshameke kona, kutani loku munhu a swi khumbile, u ta va la yilaka ku fika ri madyambu. 24Kungakuloko wanuna a etlele na yena, ni loko masangu ya yena ma n'wi namarhela u ta va la yilaka hi masiku ya ntlhanu na mambirhi, kutani swilawu hinkwaswo leswi a etleleke eka swona, swi ta va leswi yilaka.
25“ ‘Kungakuloko wansati a ri ni xitlhandla, loko ku nga ri hi nkarhi wa tin'hweti ta yena, kumbe loko masangu ya yena ma tlurisa nkarhi wa ku teka ka yena, u ta va la yilaka hi nkarhi hinkwawo wa xitlhandla xa yena, kukotisa enkarhini wa ku teka ka yena. 26Swilawu hinkwaswo leswi a etleleke ka swona enkarhini wa xitlhandla xa yena, swi ta yirisiwa kukota swilawu swa ku teka ka yena; kutani switshamo hinkwaswo leswi a tshamiseke eka swona swi ta va leswi yilaka kukotisa enkarhini wa ku teka ka yena. 27Mani na mani la khumbaka swona u ta va la yilaka; u ta hlantswa tinguvu ta yena, a hlamba ematini kambe u ta va la yilaka ku fika nimadyambu. 28Kuteloko xitlhandla xa yena xi khawukile, u ta hlaya masiku ya ntlhanu na mambirhi, kutani u ta va a tengile. 29Hi siku ra ntlhanu na manharhu, u ta teka matuva mambirhi, kumbe mavondlo mambirhi ya magugurhwana, a ma tisa eka muprista enyangweni ya tabernakela ya nhlengeletano. 30Muprista u ta humesa rin'wana ri va gandzelo ra xidyoho, rin'wana ri va holokosta: kutani muprista u ta phahla mhamba emahlweni ka Yehovha hikwalaho ka xitlhandla lexi n'wi yiriseke.
31“ ‘Mi ta susa sweswo ku yila ka vana va Israele va nga tshuki va fa hikwalaho ka thyaka ra vona, loko va nyamisa yindlu ya mina leyi nga exikarhi ka vona.’ ”
32Hi wona nawu lowu vekeriweke la nga ni xitlhandla; hambi loyi a nga ni ku teka ka yena, hambi loyi a nga ni masangu ya yena, 33ni munhu un'wana ni un'wana la nga ni ndzundzwana, hambi a ri wanuna, hambi a ri wansati, ni wanuna la etleleke ni wansati la yilaka.
