Ta timhamba leti hisiwaka. (Tiholokosta.)
1Yehovha a vitana Muxe, a vulavula na yena a ri etabernakeleni ya nhlengeletano, a ku: 2“Byela vana va Israele, u ku eka vona: ‘Kutakuloko un'wana wa n'wina a humesela Yehovha nhlengo, mi ta humesa swifuwo leswikulu ni leswitsongo, wu ve nhlengo wa n'wina.
3“ ‘Loko nhlengo wa yena yi ri holokosta ya xifuwo lexikulu, u ta humesa nkunzi leyi nga riki na xivati; u ta yi humesa enyangweni ya tabernakela ya nhlengeletano, yi ta amukeriwa emahlweni ka Yehovha. 4U ta tlhandleka voko ra yena enhlokweni ya holokosta kutani yi ta amukeriwa; u ta endleriwa mhamba ha yona. 5Va ta tlhava nkunzi emahlweni ka Yehovha, kutani vaprista, vana va Aroni va ta humesa ngati, va yi halatela ematlhelweni hinkwawo, ehenhla ka alitari leyi nga enyangweni ya tabernakela ya nhlengeletano. 6Va ta yevula mhamba leyi hisiwaka, va tsemelela tinyama ta yona. 7Kutani vana va Aroni, muprista, va ta tshivela ndzilo ealitarini, va veketela tihunyi endzilweni. 8Kutani vaprista, vana va Aroni va ta veketela tinyama, ni nhloko, ni mafurha ehenhla ka tihunyi leti vekiweke endzilweni, ehenhla ka alitari. 9Va ta hlantswa marhumbu ni swirho ematini, kutani muprista u ta hisa hinkwaswo ealitarini, yi va holokosta; i mhamba leyi hisiwaka, leyi nga ni risuna eka Yehovha.
10“ ‘Loko nhlengo wa yena wu ri wa swifuwo leswitsongo, ti nga tinyimpfu kumbe timbuti, ti va ta holokosta, u ta humesa ya xinuna leyi nga riki na xivati. 11Va ta yi tlhavela tlhelo ra n'walungu ra alitari, emahlweni ka Yehovha, kutani vaprista, vana va Aroni va ta halatela ngati ealitarini, ematlhelweni hinkwawo. 12Va ta yi tsemelela, swin'we ni nhloko ni mafurha ya yona, kutani muprista u ta swi veketela ehenhla ka tihunyi leti va tshiveleke ndzilo ealitarini ha tona. 13Va ta hlantswa marhumbu ni swirho ematini, kutani muprista u ta hisa hinkwaswo ealitarini, yi va holokosta; i mhamba leyi hisiwaka, leyi nga ni risuna eka Yehovha.
14“ ‘Loko nhlengo wa yena eka Yehovha, wu ri holokosta ya tinyanyana, u ta humesa nhlengo wa matuva kumbe wa magugurhwana. 15Muprista u ta humesa nyanyana ealitarini, u ta tsema nhloko hi n'wala ku yi hisa ealitarini, yona ngati, yi ta kameriwa etlhelweni ra vuxa ra alitari. 16U ta susa xikwirikwiri ni thyaka ra xona, a swi cukumeta etaleni ekusuhi ni alitari, evuxeni. 17U ta handzula nyanyana exikarhi ka timpapa, a nga yi avanyisi, kutani muprista u ta yi hisa ealitarini, ehenhla ka tihunyi leti va tshiveleke ndzilo ha tona; i holokosta, i mhamba leyi hisiwaka leyi nga ni risuna eka Yehovha.
