SWIRILO 5

₁Tsundzuka, wena Yehovha, leswi hi humeleriweke hi swona,

Kutani u vona xisandzu xa hina.

₂Ndzhaka ya hina yi yile eka vamatiko,

Ni tindlu ta hina eka lava nga ehandle.

₃Hi endliwile swisiwana leswi nga hava tatana;

Vamana wa hina va fana ni tinoni.

₄Hi nwile mati ya hina hi ku xava hi mali;

Tihunyi ta hina hi ti kuma hi ku xava.

₅Va hi tsutsumele hi ri karhi hi rhwele hi tinhamu ta hina;

Hi karhele, kambe a hi kumi ku wisa.

₆Hi tshambulute mavoko eka Vaegipta ni ka Vaaxuru

Ku xurha hi vuswa.

₇Vatata wa hina va dyohile, kutani a va ha ri kona,

Kutani hina hi rhwala makhombo ya ku dyoha ka vona.

₈Hi fumiwa hi makhumbi;

Ku hava loyi a hi lwelaka emavokweni ya vona.

₉Hi rholela vuswa bya hina hi ku tiveka ehansi ka rifu,

Emahlweni ka tlhari ra le mananga.

₁₀Nhlonge ya hina yi hisa kukota xitiko

Hi vukari bya ndlala.

₁₁Va onhile vavasati va le Siyoni,

Ni vanhwanyana emitini ya ka Yuda.

₁₂Tihosi tin'wana ti hayekiwile hi mavoko ya tona;

Mimombo ya vakulukumba a yi xiximiwanga.

₁₃Majaha ma byarisiwile maribye yo sila,

Lavantshwa va wele ehansi ka mirhwalo ya tihunyi.

₁₄Lavakulu va lan'wile tihuvo,

Ni majaha ma tshikile magubu ya wona.

₁₅Ku tsaka ka timbilu ta hina ku herile;

Ku cina ka hina ku hundzukile nkosi,

₁₆Misingasoro yi wile etinhlokweni ta hina;

Hi ni khombo hina,

hikuva hi dyohile!

₁₇Timbilu ta hina ta hela hikwalaho ka sweswo,

Ni mahlo ya hina a ma ha voni,

₁₈Hikuva ntshava ya Siyoni yi onhakile,

Kutani timhungubye ti tifambela ehenhla ka yona.

₁₉Wena, Yehovha u fuma hilaha ku nga heriki,

Xiluvelo xa wena xi kona hi masiku ni le mikarhini hinkwayo.

₂₀Xana u nga hi rivala hilaha ku nga heriki?

Xana u nga hi lan'wa hi malembe ya ku tala xana?

₂₁U hi hundzuluxela eka wena Yehovha,

hi ta tlhela hi vuya;

Endla leswaku masiku ya hina ma va lamantshwa,

tanihi le ku sunguleni.

₂₂Xana u hi tshikele makumu xana?

Xana u hi hlunamele ku tlurisisa xana?