SWIRILO 4

₁Xana nsuku wu hundzukisile ku yini ntima?

Nsuku lowu nga ringiwa endzilweni wu hundzukisile mavala hi yini?

Maribye ya vukwetsimelo ma hangalasile ku yini

Emitsendzeleni hinkwayo xana?

₂Vana va Siyoni lavanene

Va ringanisiwe ni nsuku lowu lulameke,

Va hlayiwile ku yini kukota makhuwana ya vumba,

Yi nga mitirho ya mavoko ya muvumbi.

₃Swi tsandza ni timhisi ti humesa vele

Ku an'wisa vana va tona;

Kambe nhwanyana wa tiko ra mina yena wa nonon'hwa ngopfu,

Kukota tiyimbhu ta mananga.

₄Ririmi ra risana ri namarhele enon'wini wa rona,

Hi ku omisiwa hi torha;

Lavatsongo va kombela vuswa,

Kambe ku hava loyi a va phamelaka.

₅Lava ngi va dya swo nandziha

Va fa hi ndlala emitsendzeleni;

Lava ngi va phutseriwile hi xivunguvungu,

Va sivamile ethyakeni.

₆Ku biwa ka nhwanyana wa tiko ra mina

Ingi kukulu ku tlula ka Sodoma,

La nga wisiwa hi nkarhinyana,

Ku nga ri na mavoko lama rhumeriweke kona.

₇Vafumi va kona a va tengile ku fana ni gamboko,

Va basile kukota ntswamba;

Mimiri ya vona a yi tshwukile ku hundzisa korale,

Tinghohe ta vona a ti fana ni ribye ra safiri.

₈Tinghohe ta vona ti nyamile ku hundzisa ntima;

A va ha tiviwi emitsendzeleni;

Nhlonge ya vona yi namarhele emarhambyini ya vona,

Yi omelele tanihi rikunyi.

₉Ku katekile lava dlayiweke hi tlhari,

Ku tlula lava nga dlayiwa hi ndlala;

Vona va wile va hele matimba

Hi ku pfumala leswi vekiwaka hi nsimu.

₁₀Mavoko ya vavasati, hambi ma ri ya lavo olova

Ma swekile vana va vona,

Va vile swakudya swa vona

Eku onhakeni ka nhwanyana wa tiko ra mina.

₁₁Yehovha u hetisile vukari bya yena;

U halatile vukari lebyi pfurhaka bya yena.

Kutani u tshiverile ndzilo eSiyoni,

Lowu nga dya masungulo ya yena.

₁₂Tihosi ta misava, ni vaaki hinkwavo va matiko,

A va pfumelanga leswaku

Nala ni mukanganyisi va ta va va nghena

Hi tinyangwa ta Yerusalema.

₁₃Swona swi humelele hikwalaho ka swidyoho swa vaprofeta va yena,

Ni vukanganyisi bya vaprista va yena,

Lava nga halata exikarhi ka wona

Ngati ya lava lulameke.

₁₄A va ri karhi va rhendzeleka tanihi vo fa mahlo emitsendzeleni,

Va tinyamisile hi ngati;

Kutani tinguvu ta vona;

A ti nga ri na ku khumbiwa.

₁₅“Sukani, n'wina mi tinyamiseke!”

Ku huweleriwe sweswo eka vona;

“Sukani, sukani!

Mi nga tshuki mi khumba!”

Kuteloko va balekile, a ku ri ku tsendzeleka;

A va ku exikarhi ka matiko:

“A vanga vuyeli va aka kona.”

₁₆Mombo wa Yehovha wu hangalasile,

Evukarini bya yena a nga tlheli a va languta.

A va vanga na xichavo eka vaprista,

A va tsetselelanga swidyuhati.

₁₇Ni namuntlha mahlo ya hina ma hela

Hi ku langutela ku pfuniwa ka hina ka hava;

Eku languteleni ka hina, a hi langutela hi ku tshemba

Eka tiko leri nga riki na ku hi ponisa.

₁₈A va xiya ku famba ka hina

Leswaku hi nga tshuki hi famba etimbaleni ta ka hina;

Ku hela ka hina ku kusuhi; masiku ya hina ma herile;

Hikuva sweswi, ku fikile ku hela ka hina.

₁₉Vaxanisi va hina va ni matsamba

Ku tlula magama ya le henhla;

Va hi hlongorisa etintshaveni;

Emananga va hi celela marindzi.

₂₀Loyi a nga va ku hefemula ka hina, a ri muhlawuriwa wa Yehovha,

U phasiwile erindzini ra vona,

A ri loyi, a hi ku:

“Hi ta hanya endzhutini wa yena exikarhi ka matiko.”

₂₁Tsaka, u tsakisisa, nhwanyana wa Edomu,

La akeke etikweni ra Usi!

Xinwelo xi ta fika ni le ka wena;

Na wena u ta pyopya, u va u hluvula tinguvu.

₂₂Nandzu wa wena wu hetisiwile, nhwanyana wa Siyoni;

A ku nga ha vi na loyi a ku yisaka evukhumbini.

Ku ta lavisisiwa ku homboloka ka wena, nhwanyana wa Edomu,

Yehovha u ta funungula swidyoho swa wena.