SWIRILO 3

₁Hi mina munhu la voneke mahlomulo

Hi nkhavi wa vukari bya wena.

₂U ndzi fambisile, a ndzi yisa emunyameni,

Ku nga ri eku vonakaleni.

₃Kunene u yimile emahlweni ka mina,

A ndzi hundzuluxela voko ra yena siku hinkwaro.

₄U herisile nyama ya mina ni nhlonge ya mina,

U tshovile marhambu ya mina.

₅U ndzi manyile hi rirhangu,

U ndzi rhendzele hi ku vaviseka ni makhombo.

₆U ndzi tshamisisile etindhawini ta munyama

Hi mukhuva wa lava feke khale.

₇U ndzi rhendzele hi khumbi leswaku ndzi nga tshuki ndzi huma;

U ndzi bohile hi tiketana leto tika.

₈Na swona loko ndzi huwelela, ndzi kombela ku pfuniwa,

U sivile xikhongelo xa mina,

₉U ndzi sivele tindlela ta mina hi maribye lama vatliweke,

U gombonyokisile tindlela ta mina.

₁₀Eka mina, u kotise bere leyi ndzi bvutameleke,

Ni nghala leyi tumbeleleke.

₁₁U hambukisile tindlela ta mina; a ndzi handzula;

A ndzi endla la kotisaka mananga.

₁₂A konga vurha bya yena,

A ndzi veka tanihi pakana ya nseve.

₁₃U nghenisile miseve ya gadzi ra yena

Exisutini xa mina.

₁₄Ndzi hundzukile xisandzu xa tiko ra mina hinkwaro,

Ni risimu ra vona siku hinkwaro.

₁₅U ndzi xurhisile leswo bava,

U ndzi pyopyisile hi nkaka.

₁₆Kambe u fayile meno ya mina hi maribye,

U ndzi funengetile hi nkuma.

₁₇U tsonile moya wa mina ku rhula,

Kutani a ndza ha tivi leswaku ku kateka i yini;

₁₈Kutani ndzi ri:

“Ndzi helelwe hi matimba ya mina.

Ni ku langutela ka mina eka Yehovha.”

₁₉Ehleketa ku onhaka ka mina ni ku xaniseka ka mina; nkaka ntsena ni nyongwa.

₂₀Ndzi karhi ndzi titsundzuxa,

Kutani moya wa mina wu hela matimba endzeni ka mina.

₂₁Hi tona leti ndzi nga karhi ndzi lwaka na tona embilwini ya mina,

Hikwalaho ndzi ta tshama ndzi ri karhi ndzi tshemba.

₂₂I tintswalo ta Yehovha leti ti endleke leswaku hi nga tshuki hi lova,

Hikuva tintswalo ta yena a ti si hela;

₂₃Ti tshama ti ri kona hi mixo wun'wana ni wun'wana;

Vunene bya wena byi kulukumba!

₂₄Ku averiwa ka mina i Yehovha, ku vula sweswo moya wa mina;

Hikwalaho ndzi ta n'wi tshemba.

₂₅Yehovha u ni tintswalo eka lava n'wi tshembaka,

Ni ka moya lowu n'wi lavaka.

₂₆Swi lulamile eka munhu ku langutela hi ku rhula

Ku ponisiwa hi Yehovha.

₂₇Swi lulamile eka munhu

Loko a rhwala joko ra yena evuntshweni bya yena.

₂₈Swi lulamile, ni loko a titshamela a ri swakwe, a timiyelela

Nkarhi lowu Xikwembu xi n'wi leriseke wona.

₂₉Ni loko ku ri ku veka nomu wa yena entshurini,

Swi ri leswaku kumbe ku tshemba ku kona.

₃₀Ni loko ku ri ku nyika rhama ra yena eka loyi a n'wi phakataka,

Ni ku xurha xisandzu.

₃₁Hikuva Hosi a nga ka a nga lahli munhu

Hilaha ku nga heriki.

₃₂Kambe loko a n'wi ba hi nhlomulo,

U n'wi twela vusiwana hikwalaho ka vunyingi bya tintswalo ta yena.

₃₃Hikuva mbilu ya yena a yi rhandzi ku twisa ku vaviseka

Ni ku xanisa vana va vanhu.

₃₄Loko va kandziya hi milenge

Vabohiwa hinkwavo va tiko,

₃₅Loko va hombolokisa ku lulama ka munhu

Emahlweni ka mombo wa La tlakukeke.

₃₆Loko va tlherisa munhu enandzwini wa yena,

Xana Hosi a nga swi voni xana?

₃₇I mani la nga ta vula mhaka, kutani yi humelela,

Loko yi nga lerisiwanga hi Hosi xana?

₃₈Swilo leswo saseka ni leswo biha

Xana a swi humi enon'wini wa La nge henhla?

₃₉Xana munhu la hanyaka a nga tivilerisa hi yini-ke?

Munhu un'wana ni un'wana a a tivilerise hi swidyoho swa yena.

₄₀A hi lavisiseni tindlela ta hina, hi va hi tianakanya,

Kutani hi tlhelela eka Yehovha.

₄₁A hi yimiseni timbilu ta hina ni mavoko ya hina,

Eka Xikwembu lexi nga ehenhla.

₄₂“Hi dyohile hi va hi tiarisa;

Kutani wena a ku vanga u tsetselela.

₄₃“U funengele vukari bya wena, kutani u hi hlongorisa;

U dlele, kutani a ku vanga u tsetselela.

₄₄U tifunengetile hi papa,

Leswaku xikhongelo xa hina xi nga tshuki xi fika eka wena.

₄₅U hi endlile ntshuri ni xisandzu,

Exikarhi ka matiko.

₄₆“Hinkwavo lava nga valala eka hina

Va hi ahlamisele milomu ya vona.

₄₇Hi humeleriwile hi ku rhurhumela ni ku phasiwa

Swin'we ni ku onhaka ni ku lova.

₄₈Tihlo ra mina ri halata milambu ya mati

Hikwalaho ka ku onhaka ka nhwanyana wa tiko ra mina.

₄₉“Tihlo ra mina ri karhi ri halaka mihloti, a ri miyeri,

A ku na laha ri nga tikhomaka,

₅₀Yehovha a kondza a hlometela

Kutani a swi vona a ri ematilweni.

₅₁Tihlo ra mina ri xanisa moya wa mina

Hikwalaho ka vanhwana hinkwavo va muti wa mina.

₅₂“Lava ndzi vengeke ntsena

Va ndzi rhiyile hi xirimbana tanihi loko ndzi ri xinyanyana.

₅₃Va tsemile vutomi bya mina ekheleni;

Va hoxile ribye ehenhla ka mina.

₅₄Mati ma khapela enhlokweni ya mina,

Kutani a ndzi ku: ‘Ndzi tsemiwile.’

₅₅Ndzi vitanile vito ra wena, oho Yehovha!

Ndzi ri ehansi enceleni wa vafi.

₅₆“U yingisile rito ra mina, u nga tshuki u siva tindleve ta wena

Loko ndzi hefemuteka, ni loko ndzi huwelela eka wena.

₅₇U ndzi tshinelele ekusuhi siku leri ndzi nga huwelela eka wena,

U ku: ‘U nga tshuki u chava.’

₅₈“Hosi, u yimerile mhaka ya moya wa mina,

U kutsule vutomi bya mina.

₅₉Yehovha, u vonile ku xanisiwa ka mina;

U ndzi avanyisela hi ku lulama!

₆₀U vonile ku tirihisela hinkwako ka vona,

Ni ku ngurhangurha hinkwako ka vona!

₆₁“U yingisile xisandzu xa vona, oho Yehovha!

Ni ku dzumadzuma hinkwako ka vona ehenhla ka mina,

₆₂Ni milomu ya lava ndzi pfukelaka matimba,

Ni makungu ya vona ematshan'weni ya mina siku hinkwaro.

₆₃Languta loko va tshama ni loko va pfuka,

Hi mina risimu ra vona.

₆₄“Yehovha, u ta hakela hi hakelo leyi ringanaka

Mitirho ya mavoko ya vona,

₆₅U va nyika timbilu leto nonon'hwa,

Ku rhukana ka wena a ku ve ehenhla ka vona.

₆₆U va hlongorisa hi vukari bya wena,

Kutani u va herisa ehansi ka matilo, oho Yehovha!”