Ta ku onhaka ka Yerusalema.
1Hosi yi funengetile ha yini hi ku kariha nhwanyana wa Siyoni?
Ku kwetsima ka Israele, u ku susumetile a ri ehenhla,
a ku hoxa emisaveni,
Kutani hi siku ra vukari bya yena
A nga tsundzukanga vunavelo bya milenge ya yena.
2Hosi yi mbundzuxile miako hinkwayo ya Yakobo, a nga tsetselelanga nchumu;
U mbundzuxile hi vukari lebyi pfurhaka bya yena makhokholo ya nhwanyana wa Yuda,
U ma wisele ehansi,
A onha ku fuma ni tihosi ta kona.
3U tshovile hi vukari lebyi levaka bya yena matimba hinkwawo ya Israele,
A khwanyanisa voko ra yena lera swinene emahlweni ka valala,
Kutani a pfurha exikarhi ka Yakobo tanihi langavi ra ndzilo
Lowu lovisaka hi matlhelo hinkwawo.
4U kungile vurha bya yena kukotisa nala,
A yima a tshambuluta voko ra yena lera xinene tanihi nhenha,
Kutani a dlaya hinkwaswo leswi rhandzekaka loko swi voniwa;
Entsongeni wa nhwanyana wa Siyoni, u chulurile vukari bya yena kukotisa ndzilo.
5Hosi yi hundzukile yi kotisa nala, yi mitile Israele;
Yi mbundzuxe tindlu hinkwato ta yena ta vuhosi,
Yi herise makhokholo ya yena,
Kutani yi andzisele nhwanyana wa Yuda tingana ni mahlomulo.
6U hahlurile rirhangu ra yena kukotisa loko ngi wu ri ntanga;
U herisile xivandla xa tinhlengeletano ta yena;
Yehovha u va rivarisile Siyoni, mikhuvo ni Tisavata,
Kutani a sandza hi vukari byo leva bya yena tihosi ni vaprista.
7Hosi yi phirhekile hi alitari ya yena, ni vukwetsimelo bya yena byi va manyala eka yena;
U nyiketile emavokweni ya nala makhumbi ya tindlu ta yena ta vuhosi.
Va tlakusile marito ya vona endlwini ya Yehovha,
Kukota leswi endliwaka hi siku ra nkhuvo.
8Yehovha u kanerile ku mbundzuxa rirhangu ra nhwanyana wa Siyoni,
U tshambulute ngoti, a nga tlherisanga voko ra yena eku onheni;
Kutani u khomisile tingana rirhangu ni khumbi,
Hinkwaswo swi ri karhi swi khomiwa hi tingana.
9Tinyangwa ta yena ti mbombomele ehansi;
U onhile, kutani u tshovile swipfalo ta tona;
Hosi ya yena ni vafumi va yena va le matikweni; nawu a wa ha ri kona;
Na vona vaprofeta va yena a va kumi ku bvumbha ka Yehovha.
10Vakulu va nhwanyana wa Siyoni va titshamele ehansi, va timiyelela;
Va ticherile tinhloko ta vona hi ntshuri,
Va tibohile tinguvu leto khwaxa.
Vanhwanyana va Yerusalema, va khomiwile hi tingana, va korhamele ehansi.
11Mahlo ya mina ma vava hi ku rila, marhumbu ya mina ma pfuma,
Xivindzi xa mina xi halakela ehansi
Hikwalaho ka mbanga ya nhwanyana wa tiko ra mina,
Loko vana ni lava an'wisaka va titivala erivaleni ra muti.
12Va ku eka vamana wa vona:
Vuswa byi kwihi, ni vhinyo xana?
Va vula sweswo va ri karhi va hela kukota lava tlhaviweke emitsendzeleni ya muti,
Va karhi va nyiketa mimoya ya vona eswifuveni swa vamana wa vona.
13Xana ndzi ta ku vulavulela tihi?
Kumbe ndzi nga ku fanisa na yini, nhwanyana wa Yerusalema?
Ndzi ta ku fanisa na yini, leswaku ndzi ta ku chavelela,
Wena nhwana, nhwanyana wa Siyoni?
Hikuva ku onhaka ka wena kukulu, ku fana ni lwandle;
I mani la nga ta ku horisa?
14Vaprofeta va wena va ku vonele mavunwa ni matlangwana,
Kutani a va ku funungulelanga ku homboloka ka wena hinkwako,
Leswaku va ta hambukisa vukhumbi bya wena;
Kambe va ku komba swikombiso swa vunwa ni ku xisa.
15Hinkwavo lava hundzaka hi ndlela va phokota hi mavoko, va tsan'wa,
Va nikina tinhloko hikwalaho ka nhwanyana wa Yerusalema,
Va ri: “Xana hi wona muti lowu ingi va wu vula ku saseka loku hetisekeke,
Ni ku tsaka ka misava hinkwayo xana?”
16Lava ku vengaka hinkwavo va ku ahlamisele milomu ya vona,
Va ba miloti, va getserisa meno,
Va ku: “Hi n'wi mitile;
Kunene, hi rona siku leri hi ri languteleke, hi ri kumile, hi ri vonile.”
17Yehovha u endlile lexi a xi kaneleke,
U hetisile makungu lawa ingi a ma lerisile emikarhini ya khale;
U mbundzuxile, kutani a nga tsetselelanga;
U tsakisile lava ku vengaka, u tlakusile rimhondzo ra lava va nga valala eka wena.
18Timbilu ta vona ti huwelerile eka Hosi.
Rirhangu ra nhwanyana wa Siyoni,
halata mihloti nhlekanhi ni vusiku u kotisa nambu!
U nga tshuki u lava ku wisa,
Tihlo ra wena ri nga tshuki ri tshika ku rila.
19Pfuka, u ngurhangurha nivusiku, emasungulweni ya ku langutela,
U chulula mbilu ya wena tanihi mati emahlweni ka mombo wa Hosi!
Yimisa mavoko ya wena eka yena ematshan'weni ya vutomi bya vana va wena
Lava faka hi ndlala etisongeni ta mitsendzele hinkwayo.
20Vona, Yehovha, u languta loyi u n'wi endliseke sweswo!
Swo yini loko vavasati va kondzile va dya mihandzu ya vona,
Vana lavatsongo lava va va vukarhaka?
Hikwalaho ka yini ku dlayiwa muprista ni muprofeta exikwetsin'weni xa Hosi xana?
21Lavantshwa ni lava kuleke va latene ehansi etimbaleni,
Vanhwana ni majaha va mina va wele ehansi hi fumu;
Kunene u dlele siku ra vukari bya wena,
U dlayile, kutani a wu vanga u tsetselela.
22U ndzi rhambele ku chavisa hi matlhelo hinkwawo, kukota loko ngi siku ra nkhuvo;
Kutani a ku vanga na la poneke, ni la siyiweke esikwini ra vukari bya Yehovha.
Lava ingi ndzi va tsetselele, lava ndzi va kuriseke,
La ndzi vengaka u va herisile.
