YOXUWA 23

₁Kuteloko masiku layo tala ma hundzile, mpfhuka Yehovha a nyikile vana va Israele ku wisa eka valala va vona hinkwavo, ematlhelweni hinkwawo, yena Yoxuwa a dyuharile, a taleriwe hi masiku. ₂Yoxuwa a hlengeleta Vaisraele hinkwavo, va ri vakulukumba va vona, ni tindhuna ta vona, ni vaavanyisi va vona, ni tindhuna ta nyimpi ya vona, a ku eka vona:

₃“Ndzi dyuharile, ni ku taleriwa hi masiku. Mi vonile hinkwaswo leswi Yehovha, Xikwembu xa n'wina, a swi endleleke matiko hinkwawo lawa, emahlweni ka n'wina; hikuva i Yehovha, Xikwembu xa n'wina, loyi a mi lwelaka. ₄Vonani, ndzi mi averile hi vuhlolotwana matiko lama saleke ku suka eYordani, ni matiko hinkwawo lawa ndzi ma heriseke ku fika eLwandle Lerikulu, evupeladyambu, leswaku yi va ndzhaka ya n'wina hi tinxaka ta n'wina. ₅Yehovha, Xikwembu xa n'wina, u ta va hlongola a ri yena emahlweni ka n'wina, u ta va tekela tiko emahlweni ka n'wina, kutani mi ta ri fuma hilaha Yehovha, Xikwembu xa n'wina a mi byeleke hakona. ₆Loko swi ri tano, tiyani swinene ku hlayisa ni ku endla hinkwaswo leswi tsariweke ebukwini ya nawu wa Muxe, mi nga hambuki exineneni hambi eximatsini, ₇mi nga hlangani na matiko lama saleke exikarhi ka n'wina; mi nga tshuki mi vula mavito ya swikwembu swa vona, kambe mi nga hlambanyi ha swona, mi nga tshuki mi swi tirhela ni ku khinsama emahlweni ka swona; ₈kambe namarhelani Yehovha, Xikwembu xa n'wina, hilaha mi swi endleke hakona ku fika namuntlha. ₉Hikuva Xikwembu xi hlongorile emahlweni ka n'wina matiko lamakulu lama nga ni matimba, kutani a ku na munhu la swi koteke ku tiya emahlweni ka n'wina ku fika namuntlha. ₁₀Munhu un'we exikarhi ka n'wina u ta hlongorisa khume ra madzana ya vona; hikuva i Yehovha, Xikwembu xa n'wina, la mi lwelaka hilaha a mi byeleke hakona. ₁₁Hikwalaho, tilanguteleni swinene emimoyeni ya n'wina leswaku mi rhandza Yehovha, Xikwembu xa n'wina.

₁₂“Hikuva loko mi tlhelela endzhaku, ni loko mi namarhela leswi saleke swa matiko lawa lama tshameke exikarhi ka n'wina, ni loko mi tekelana vavasati na vona, kutani mi hlangana na vona, na vona va hlangana na n'wina, ₁₃tivani swinene leswaku Yehovha, Xikwembu xa n'wina, a nga ka a nga ha tshami a hlongola matiko lawa emahlweni ka n'wina, kambe ri ta va sole ni rindzi eka n'wina, ni nkharisa ematsheveni ya n'wina, ni mitwa emahlweni ya n'wina, mi ko mi herisiwa henhla ka tiko lerinene leri Yehovha, Xikwembu xa n'wina a mi nyikeke rona.

₁₄“Maswivo, ndza famba namuntlha hi ndlela ya misava hinkwayo. Pfumelani hi timbilu hinkwato ta n'wina ni mimoya hinkwayo ya n'wina, mi tiva leswaku a ku wanga na rito rin'we ra marito hinkwawo lamanene lawa Yehovha, Xikwembu xa n'wina, a ma vuleke ehenhla ka n'wina; kambe mi endleriwe hinkwawo, a ku wanga na rito rin'we. ₁₅Kutani, kukotisa loko marito hinkwawo lamanene, lawa Yehovha a mi byeleke wona, ma endleriwile n'wina, na swona Yehovha u ta tiyisa ehenhla ka n'wina, marito hinkwawo layo biha mi ko mi hela ehenhla ka tiko lerinene leri Yehovha Xikwembu xa n'wina, a mi nyikeke rona. ₁₆Kutakuloko mi tlula ntwanano lowu Yehovha, Xikwembu xa n'wina, a mi leriseke wona, mi ya tirhela swikwembu swin'wana, mi khinsama emahlweni ka swona vukari bya Yehovha byi ta mi pfurhela kutani mi ta hatlisa mi fa etikweni lerinene leri a mi nyikeke rona.”