Ta vakamberi vambirhi loko va rhumiwa.
1Yoxuwa, n'wana Nuni, a rhuma vakamberi vambirhi exihundleni, a ri eXitimi, a ku eka vona: “Fambani, mi ya kamba tiko ra Kanana na Yeriko.” Va suka, kutani va ya fika endlwini ya nghwavava, vito ra yena a a ri Rahava, va etlela kona. 2Hosi ya Yeriko yi byeriwa mhaka leyi, va ku: “Waswivo, vavanuna va vana va Israele va tile halenu nivusiku ku kamba tiko.” 3Kutani hosi ya Yeriko yi lerisa Rahava yi ku: “Humesa vavanuna lava fikeke eka wena, lava ngheneke endlwini ya wena, hikuva va tile ku kambela tiko hinkwaro.” 4Kavaloko loyi a teka vavanuna lavambirhi a va fihla, kutani a ku: “Kunene vavanuna va tile eka mina kambe a ndzi va tivi laha va pfaka kona; 5kutani loko va lava ku pfala nyangwa ya muti byi ri vusikwanyana, vanhu lava va humile; a ndzi tivi laha va yeke kona; hatlisani ku va landza, hikuva mi nga va kuma.” 6Kambe a a va khandziyisile elwangwini, a va fihla ehansi ka tinyandza ta ntsembyana, leti a ti anekeke elwangwini. 7Kutani vanhu lava va va landzela endleleni leyi kongomaka emahlalukweni ya Yordani; kuteloko ku humile lava va va hlongorisaka, nyangwa yi pfariwa.
8Kakuloko vakamberi va nga si etlela, wansati a khandziya eka vona ehenhla ka lwangu; 9a ku eka vona: “Ndza swi tiva leswaku Yehovha u mi nyikile tiko leri, hikuva nchavo lowu mi wu pfuxeke wu hi wele ehenhla, kutani vaaki hinkwavo va tiko va hele timbilu emahlweni ka n'wina. 10Hikuva hi twile hilaha Yehovha a omiseke mati ya Lwandle ro Tshwuka emahlweni ka n'wina, loko mi huma eEgipta, ni laha mi endleke hakona eka tihosi timbirhi ta Vaamori ehase ka Yordani, a nga Sihoni na Ogo, lava mi nga va yirisa. 11Hi swi yingisile, kutani timbilu ta hina ti n'okile; a ku nga ha vi na ku tiya eka hina emahlweni ka n'wina: hikuva i Yehovha, Xikwembu xa n'wina, lexi nga Xikwembu le henhla ematilweni, ni la hansi emisaveni. 12Sweswi, ndza mi khongela, ndzi hlambanyeleni ha Yehovha leswaku, kukotisa leswi ndzi mi tsetseleleke, na n'wina mi ta tsetselela yindlu ya tatana, kambe ndzi nyikeni xitshembiso lexi tiyeke, 13leswaku mi ta hanyisa tatana na manana, ni vamakwerhu va vavanuna, ni va vavasati, ni hinkwavo va tindlu ta vona, mi ponisa mimoya ya hina eku feni.” 14Vavanuna lava va ku eka yena: “Vutomi bya hina ematshan'weni ya n'wina ku fa loko mi nga byeli munhu timhaka ta hina kutakuloko Yehovha a hi nyikile tiko, hi ta mi tsetselela ni ku mi endlela leswinene.”
15Kavaloko a va xikisa hi pindza efasitereni, hikuva yindlu ya yena a yi akiwile swin'we ni rirhangu, kutani a akile erirhangwini. 16A ku eka vona: “Yanani entshaveni leswaku lava mi landzaka va nga tshuki va hlangana na n'wina, mi ta tumbela kona hi masiku manharhu, va ko va vuya; hi kona mi nga ta famba endleleni ya n'wina.” 17Vanhu lava va ku eka yena: “Hi ta endla hi mukhuva wolowo ku tintshunxa ka leswi u hi hlambanyiseke swona sweswi: 18Kutakuloko hi fikile etikweni leri, u ta boha ngoti leyi ya xivunguvungu efasitereni leri u hi xikiseke ha rona; kambe u ta hlengeleta endlwini ya wena, tata wa wena, ni mana wa wena ni vamakwenu, ni ndyangu hinkwawo wa tata wa wena. 19Mani na mani la nga ta huma enyangweni ya yindlu ya wena, ku ya ehandle, ngati ya yena yi ta va enhlokweni ya yena, kutani hi nga ka hi nga vi na nandzu. Kambe un'wana ni un'wana la nga ta va na wena endlwini, loko a dlawa, ngati ya yena yi ta va etinhlokweni ta hina. 20Ni loko u rungula timhaka ta hina, hi ta tshunxiwa eku hlambanyeni loko u hi boheke hakona.” 21Kutani a ku: “A swi ve tano hilaha mi nga vula hakona!” Kavaloko a va lela, va famba. Yena a sala a boha ngoti ya xivunguvungu efasitereni.
22Kutani va famba va ya fika entshaveni; va tshama kona masiku manharhu, lava va va landzeke va ko va vuya; lava va va landzeke va va lava endleleni hinkwayo kambe a va va kumanga. 23Vavanuna lavambirhi va timukela, va rhelela entshaveni, va pela Yordani, kutani va fika eka Yoxuwa, n'wana Nuni, va n'wi ambela timhaka hinkwato leti va humeleleke. 24Va ku eka Yoxuwa: “Kunene Yehovha u nyiketile tiko hinkwaro emavokweni ya hina, na vona vaaki hinkwavo va tiko va hele timbilu emahlweni ka hina.”
