YOXUWA 15

₁Ku averiwa loku averiweke hi vuhlolotwana eka nyimba ya vana va Yuda hi tindlu ta vona, ku ri etlhelweni ra ndzilakana wa Edomu, ku fika emananga ya Sini, emakun'wini ya mananga edzongeni. ₂Ndzilakana wa vona wa le dzongeni wu suka emakun'wini ya Lwandle ro Dunga, tlhelo ra lwandle leri langutaka edzongeni; ₃wu huma edzongeni eka ndlela leyi khandziyaka ya Akrabimi, kutani wu hundzela eSini, wu khandziya edzongeni eKadexe-Bariniya, wu hundzela eHesironi, wu khandziya eAdara, kutani wu rhendzeleka hitlhelo ra Karaka; ₄wu ya hundza eAsimoni, kutani wu huma exinambyaneni xa Egipta, wu ya hela elwandle. Hi wona ndzilakana wa n'wina wa le dzongeni.

₅Ndzilakana wa le vuxeni, i Lwandle ro Dunga, ku fika emakun'wini ya Yordani. Ndzilakana wa le n'walungwini wu suka etlhelo ra lwandle laha ku nga ni nomu wa Yordani; ₆wu khandziya eBeta-Hogila, wu hundza en'walungwini ka Beta-Araba, kutani wu khandziya ku ya fika eribyeni ra Bohani, n'wana Rhuveni, ₇kutani ndzilakana wu khandziya etlhelo ra Debiri, kusuhi ni nkova wa Akora, wu ya en'walungwini, wu kongoma eGiligala, lowu langutanaka ni ndlela leyi khandziyaka ya Adumimi, yona yi le dzongeni ka xinambyana; wu hundza ekusuhi ni mati ya Eni-Xemexi, wu ya fika eEni-Rogele. ₈Kutani wu khandziya enkoveni wa Bene-Hinomu, ku fika eku rheleleni ka ntshava ya Vayebusi edzongeni, laha Yerusalema, a nga kona; kutani wu khandziya enhlohlorhini ya ntshava leyi langutaka nkova wa Hinomu, evupeladyambu, ku nga emakun'weni ya rivala ra Varefayimi en'walungwini. ₉Ku suka enhlohlorhini ya ntshava, ndzilakana wu ya fika exihlobyeni xa mati ya Nefitowaka, kutani wu kongoma miti ya ntshava ya Efroni, kutani wu ya fika eBaala lowu nga Kiriyata-Yeyarimi; ₁₀wu suka eBaala, wu rhendzeleka evupeladyambu, tlhelo ra ntshava va Seyira, kutani wu hundza eku rheleleni ka ntshava ya Yeyarimi leyi nga eKesaloni, en'walungwini, kutani wu rhelela eBeta-Xemexe, wu hundza ni le ka Timina. ₁₁Kutani wu huma en'walungwini, eku rheleleni ka Ekroni wu kongoma eXikeroni, wu hundza entshaveni ya Baala, kutani wu ya humela eYabinele kambe wu ya hela elwandle. ₁₂Ndzilakana wa le vupeladyambu i Lwandle Lerikulu. Hi yona mindzilekana ya vana va Yuda ematlhelweni hinkwavo, hi tindlu ta vona.

₁₃Va nyika Kalebe, n'wana Yefune, ku averiwa ka yena exikarhi ka vana va Yuda, hilaha Yehovha a leriseke Yoxuwa hakona, wu ri muti wa Araba tata wa Anaka, lowu nga Hebroni. ₁₄Kalebe a hlongola vana lavanharhu va Anaka, a ri Xexayi na Ahimani na Talimayi, vana va Anaka. ₁₅A suka kona ku ya lwa ni vaaki va Debiri; khale vito ra Debiri a wu ri Kiriyata-Sefere. ₁₆Kutani Kalebe a ku: “La nga ta lwa na Kiriyata-Sefere, a wu teka, ndzi ta n'wi nyika Akisa, n'wananga a va nsati wa yena.” ₁₇Kavaloko Otiniele, n'wana Kenazi, makwa Kalebe, a yi hlula, kutani Kalebe a n'wi nyika n'wana wa yena, Akisa, a va nsati wa yena. ₁₈Kutani kakuloko a ha ya eka nuna wa yena, a n'wi kucetela leswaku a kombela nsimu eka tata wa yena. Kavaloko a xikela mbhongolweni ya yena, kutani Kalebe a ku eka yena: “U na yini-ke?” ₁₉A ku: “Ndzi nyike ku kateka hikuva u ndzi nyikile masimu ya le dzongeni, ndzi nyike ni xihlovo xa mati!” Kavaloko a n'wi nyika swihlovo swa le henhla ni swihlovo swa le hansi.

₂₀Hi yona ndzhaka ya nyimba ya vana va Yuda, hi tindlu ta vona. ₂₁Miti leyi akiweke edzongeni, emakun'wini ya nyimba ya vana va Yuda, ekusuhi ni ndzilakana wa Edomu hi leyi: ₂₂Kabisele, Edere, Yaguru, Kina, Dimona, Adada; ₂₃Kedexe, Hasoro, Yitinana; ₂₄Zifi, Teleme, Beyaloto; ₂₅Hasoro-Hadata, Keriyoti-Hesironi, hileswaku Hasoro; ₂₆Amama, Xema, Molada; ₂₇Hasari-Gada, Heximoni, Beta-Pelete, ₂₈Hasari-Xuwala, Berexeba, Biziyotiya; ₂₉Baala, Iyimi, Esemu; ₃₀Elitolada, Kesili, Horma; ₃₁Sikilaga, Madimana, Sanisana; ₃₂Lebawoto, Xilehimi, Ayini, Rimoni. Loko yi hlanganisiwa: miti ya 29 ni swimitana swa yona.

₃₃Erivaleni: Exitawulu, Sora, Axina; ₃₄Zanowaka, Eni-Ganimi, Tapuwaka, Enama; ₃₅Yaramutu, Adulama, Soko, Azeka; ₃₆Xaarayimi, Aditayimi, Gedera, Gederotayimi: miti ya 14 ni swimitana swa yona. ₃₇Sanani, Hadaxa, Migidali-Gadi; ₃₈Dileyani, Mispe, Yokitele; ₃₉Lakixi, Bosikata, Egiloni; ₄₀Kaboni, Lahimasi, Kitilixi; ₄₁Gederoti, Beta-Dagoni, Naama, Makeda: miti ya 16 ni swimitana swa yona. ₄₂Libina, Etere, Axani; ₄₃Yifita, Axina, Nesibi; ₄₄Keyila, Akizibi, Marexa: miti ya 9 ni swimitana swa yona. ₄₅Ekroni ni miti ya yona ni swimitana. ₄₆Ku suka eEkroni evupeladyambu, hinkwaswo leswi nga ekusuhi na Axidodo, ni swimitana swa swona; ₄₇Axidodo ni miti ya yona ni swimitana; Gaza, ni miti ya yona ni swimitana, ku fika exinambyaneni xa Egipta ni Lwandle Lerikulu, endzilakaneni.

₄₈Entshaveni: Xamiri, Yatiri, Soko; ₄₉Dana, Kiriyata-Sana, hileswaku Debiri; ₅₀Anabu, Exitemoka, Animi; ₅₁Goxeni, Holoni, Gilo: miti ya 11 ni swimitana swa yona. ₅₂Araba, Duma, Exana; ₅₃Yanimi, Beta-Tapuwaka, Afeka; ₅₄Humuta, Kiriyata-Araba (lowu nge Hebroni), Siyori: miti ya 9 ni swimitana swa yona. ₅₅Mawoni, Karmele, Zifi, Yuta; ₅₆Yizriele, Yokideyama, Zanowaka; ₅₇Kayini, Gibeya, Timina: miti ya khume ni swimitana swa yona. ₅₈Halahula, Beta-Suru, Gedori; ₅₉Marati, Beta-Anoto, Elitekona: miti ya 6 ni swimitana swa yona. ₆₀Kiriyata-Baala, lowu nga Kiriyata-Yeyarimi, Raba: miti mimbirhi ni swimitana swa yona. ₆₁Emananga: Beta-Araba, Midini, Sekaka; ₆₂Nibixani, Iri-Melaka (muti wa munyu), Eni-Gedi: miti ya 6 ni swimitana swa yona.

₆₃Loko va ri Vayebusi, lava akeke eYerusalema, vana va Yuda va tsandzekile ku va hlongola, kutani Vayebusi va akile ni vana va Yuda ku fika ni namuntlha.