YOXUWA 13

₁Yoxuwa loko a dyuhele, a andzeriwe masiku, Yehovha a ku eka yena: “U dyuharile, u tsaleriwe masiku, kambe ku sele tiko lerikulu, leri fanelaka ku fumiwa. ₂Tiko leri seleke hi leri: Matikwanyana hinkwawo ya Vafilista, ni ya Vagexuri hinkwavo, ₃ku suka eXihoro, lowu khulukelaka Egipta, ku fika endzilakaneni wa Ekroni, en'walungwini, tiko leri vuriwaka ra Vakanana: hileswaku tihosi ta ntlhanu ta Vafilista, ya Gaza, ya Axidodo, ya Axikeloni, ya Gati, ya Ekroni, ni Vaavhimi; ₄edzongeni, tiko hinkwaro ra Vakanana, na Meyara leri nga ra Vasidoni, ku fika eAfeke, ku fika endzilakaneni wa Vaamori; ₅ni tiko hinkwaro ra Vagebali, na Lebanoni hinkwayo evuxeni, ku suka eBaali-Gadi, ehansi ka ntshava ya Hermoni, ku fika enyangweni ya Hamata; ₆ni vaaki hinkwavo va ntshava ku suka eLebanoni, ku fika eMisrefoto-Mayimi; Vasidoni hinkwavo, Ndzi ta va hlongola emahlweni ka vana Vaisraele. Avanyisa ntsena matiko lawa hi vuhlolotwana, yi ta va ndzhaka ya Israele hilaha ndzi ku leriseke hakona. ₇Kutani sweswi, avela tiko leri hi vuhlolotwana, yi va ndzhaka ya tinyimba ta ntlhanu na mune, ni ya hafu ya nyimba ya Manase.”

₈Va Rhuveni ni va Gadi, swin'we ni hafu yin'wana ya nyimba ya Manase va kumile ndzhaka ya vona leyi Muxe a va nyikeke ehase ka Yordani, evuxeni, ₉ku suka eArowere, eribuwini ra xinambyana xa Arinoni, ku suka emutini lowu nga exikarhi ka nkova, ni rivala hinkwaro ra Medeba, ku fika eDiboni, ₁₀ni miti hinkwayo ya Sihoni, hosi ya Vaamori, leyi nga fuma Hexiboni, ku fika endzilakaneni wa Vaamoni, ₁₁na Giliyadi, ni tiko ra Vagexuri, ni Vamaakati, ni ntshava hinkwayo ya Hermoni, ni Baxani hinkwayo, ku fika eSaleka; ₁₂ni ku fuma hinkwako ka Ogo, etikweni ra Baxani, loyi a fumeke eAxitaroto na Edreyi, a ri la seleke wa Varefayimi. Muxe a va hlula, a va tekela tiko ra vona. ₁₃Kambe vana va Israele a va titekelanga tiko ra Vagexuri, ni ra Vamaakati. Kutani Gexuri na Maaka va akile exikarhi ka Israele ku fika namuntlha.

₁₄Ntsena a nga nyikangi nyimba ya Levhi ndzhaka, magandzelo lama hiseriwaka Yehovha, Xikwembu xa Israele, hi yona ndzhaka ya yona hi laha a yi byeleke ha kona.

₁₅Muxe a a nyikile nyimba ya vana va Rhuveni ku averiwa ka vona hi tindlu ta vona. ₁₆Tiko ra vona a ri suka eArowere eribuwini ra xinambyana xa Arinoni, ku suka emutini lowu nga exikarhi ka nkova, ni rivala hinkwaro, kusuhi na Medeba, ₁₇Hexiboni ni miti hinkwayo ya wona erivaleni: wu nga Diboni, Bamoto-Baali, Beta-Baala-Meyoni, ₁₈Yahasi, Kedemoto, Mefata, ₁₉Kiriyatayimi, Sibima, Sereta-Xahara, entshaveni ya nkova; ₂₀Beta-Peyori, ni mitsunga ya Pisga, na Beta-Yeximoto; ₂₁ni miti hinkwayo ya rivala, ni tiko hinkwaro ra Sihoni, hosi ya Vaamori, la fumeke Hexiboni, loyi Muxe a n'wi hluleke swin'we ni tihosi ta Midiyani a ri Evhi, na Rekemu, na Suru na Huru na Reba, tihosi leti fumiweke i Sihoni, va ri vaaki va tiko. ₂₂Vana va Israele a va dlayile hi tlhari Balaama n'wana Beyori, mungoma; va engetela ha yena lava dlayiweke. ₂₃Ndzilakana wa vana va Rhuveni a wu fika eYordani ni le ribuwini ra wona. Hi yona ndzhaka ya vana va Rhuveni, hi tindlu ta vona, yi ri miti ni swimitana swa yona.

₂₄Muxe a a nyikile nyimba ya Gadi, va ri vana va Gadi, ndzhaka ya vona, hi tindlu ta vona. ₂₅Tiko ra vona a ku ri Yazere, ni miti hinkwayo ya Giliyadi, ni hafu ya tiko ra vana va Amoni, ku fika eArowere lowu langutanaka na Rhaba, ₂₆ku suka eHexiboni ku fika eRamati-Misipe na Betonimi, ku suka eMahanayimi ku fika endzilakaneni wa Debiri, ₂₇ni le nkoveni, Beta-Harama, na Beta-Nimra, na Sukoti na Safoni, wu nga nsalo wa tiko ra Sihoni, hosi ya Hexiboni Yordani a wu ri ndzilakana wa wona ku ya fika emakumo ya Lwandle ra Kinereta, ehase ka Yordani, evuxeni. ₂₈Hi yona ndzhaka ya vana va Gadi, hi tindlu ta vona, yi ri miti ni swimitana swa yona.

₂₉Muxe a a nyikile hafu ya nyimba ya Manase va ri vana va Manase, ndzhaka ya vona hi tindlu ta vona: ₃₀Tiko ra vona hi leri: Ku suka eMahanayimi, Baxani hinkwawo, ni tiko hinkwaro ra Ogo, hosi ya Baxani, ni miti hinkwayo ya Yayiro leyi nga eBaxani, hinkwayo yi ri miti ya 60. ₃₁Ni hafu ya Giliyadi, na Axitaroto, na Edreyi, yi nga miti ya tiko ra Ogo eBaxani, yi nyikiwile vana va Makiri, n'wana Manase, ku ri ka hafu ya vana va Makiri, hi tindlu ta vona.

₃₂Hi tona tindzhaka leti Muxe a ti aveleke erivaleni ra Mowabu, ehase ka Yordani, ku lavene na Yeriko, evuxeni.

₃₃Kambe Muxe a nga nyikanga ndzhaka eka nyimba ya Levhi: Yehovha, Xikwembu xa Israele, hi yona ndzhaka ya vona hilaha a va byeleke hakona.