YOXUWA 11

₁Yabini, hosi ya Hasoro, kuteloko a yingisile timhaka teto, a rhuma tintsumi eka Yobabu, hosi ya Madona ni ka hosi ya Ximroni, ni ka hosi ya Akixafa, ₂ni ka tihosi ta le n'walungwini entshaveni, ni le rivaleni, edzongeni ka Kinereta, ni le tikweni leri nga ehansi, ni le mitsungeni ya Dori, evupeladyambu; ₃ni le ka Vakanana va le vuxeni ni vupeladyambu, ni le ka Vaamori, ni le ka Vahiti, ni le ka Vaperesi, ni le ka Vayebusi, entshaveni, ni le ka Vahivhi, ehansi ka Hermoni, ni le tikweni ra Mispa. ₄Kutani va huma vona, ni tinyimpi hinkwato ta vona, byi ri vunyingi lebyikulu ngopfu, byi fana ni sava leri nga eribuwini ra lwandle va ri ni tihanci, ni tigolonyi leto tala ngopfu. ₅Tihosi hinkwato leti ti hlengeletana endhawini leyi hlawuriweke, kutani ti ya gova swin'we ekusuhi ni mati ya Meromi, ku ya lwa na Israele.

₆Yehovha a ku eka Yoxuwa: “U nga tshuki u va chava, hikuva mundzuku, enkarhini lowo, ndzi ta va nyiketa hinkwavo va tlhaviwile emahlweni ka Israele; u ta tsema milenge ya tihanci ta vona, u hisa ni tigolonyi ta vona endzilweni.” ₇Kavaloko Yoxuwa ni vanhu hinkwavo va yena lava hlomeke, va fika hi nomu lowu eka vona ekusuhi ni mati ya Meromi, kutani va va tshuketa. ₈Yehovha a va nyiketa emavokweni ya Vaisraele, kutani va va tlhava va va hlongorisa ku ya fika eSidoni lowukulu ni Misrefoto-Mayimi, ni ku fika enkoveni wa Mispa, evuxeni; va lwa na vona, va nga siyi mubaleki ni un'we. ₉Yoxuwa a va endla hilaha Yehovha a n'wi byeleke hakona: a tsema milenge ya tihanci, a va a hisa tigolonyi ta vona endzilweni.

₁₀Enkarhini wolowo Yoxuwa a engeta a teka Hasoro, kutani a dlaya hosi ya kona hi tlhari; hikuva khale Hasoro a wu ri ntsindza wa tihosi leti hinkwato. ₁₁Kutani va dlaya hi tlhari hinkwaswo leswi hanyaka leswi ngi swi ri eka wona, a swi yirisa, a ku salangi nchumu eka leswi hefemulaka; kutani a hisa Hasoro hi ndzilo. ₁₂Yoxuwa a teka miti hinkwayo ya tihosi leti, ni tihosi hinkwato ta kona a ti yirisa, a ti dlaya hi tlhari, hilaha Muxe, nandza wa Yehovha, a leriseke hakona. ₁₃Kambe Yoxuwa a nga hisanga ni wun'we wa miti leyi ngi yi akiwile eswitsungeni, loko wu nga ri Hasoro ntsena, lowu Yoxuwa a nga wu hisa. ₁₄Vana Vaisraele va avelana xuma hinkwaxo, ni swifuwo swa miti leyi, kambe va dlaya hi tlhari vanhu hinkwavo va ko va va heta kunene va nga siyanga munhu. ₁₅Hilaha Yehovha a leriseke Muxe, nandza wa yena, hakona, Muxe a lerisa sweswo Yoxuwa, kutani Yoxuwa a endlisa sweswo; a nga siyanga nchumu eka hinkwaswo leswi Yehovha a swi leriseke Muxe.

₁₆Yoxuwa a teka tiko leri hinkwaro, yi ri ntshava, ni tlhelo ra dzonga hinkwaro, ni misava ya Goxeni, ni tiko leri nga ehansi, ni rivala, ni ntshava ya Israele, ni tiko leri nga ehansi ka yona, ₁₇ku suka entshaveni ya Ripalo leyi yimeke etlhelo ra Seyira, ku fika eBaali-Gadi, enkoveni wa Lebanoni, ehansi ka ntshava ya Hermoni; a khoma tihosi hinkwato ta kona, a ti dlaya. ₁₈Yoxuwa a lwa ni tihosi leti hi masiku layo tala. ₁₉A ku vanga na muti wun'we lowu kombeleke ku rhula eka vana va Israele, loko va nga ri Vahivhi lava akeke eGibiyoni; va teka miti leyi hinkwayo hi ku lwa. ₂₀Hikuva a swi huma ka Yehovha leswi va nonon'hwiseke timbilu ta vona ku lwa na Israele, leswaku a va yirisa va nga kumi tintswalo, kambe a va heta hilaha Yehovha a leriseke Muxe hakona.

₂₁Enkarhini wolowo, Yoxuwa a ta, a heta Vaanaka va le ntshaveni ya Hebroni, ni le Debiri, ni le Anabu, ni le ntshaveni hinkwayo ya Yuda, ni le ntshaveni hinkwayo ya Israele; Yoxuwa a va yirisa swin'we ni miti ya vona. ₂₂A ku salanga Vaanaka etikweni ra vana va Israele va sala ntsena eGaza, na Gati na Axidodo. ₂₃Yoxuwa a teka tiko hinkwaro hilaha Yehovha a byeleke Muxe hakona, kutani Yoxuwa a ri nyika Israele, yi va ndzhaka ya yena, a nyika nyimba yin'wana ni yin'wana hi ku averiwa ka vona; kutani tiko ri wisa, ri nga vi na ku lwa.