1“Vutomi bya munhu la emisaveni i matlhari;
Masiku ya yena ma fana ni masiku ya munhu la thoriweke.
2Kukotisa khumbi loko ri navela ndzhuti,
Ni mutirhi loko a langutela hakelo ya yena,
3Ndzi averiwe tin'hweti ta ku vaviseka,
Ndzi hlayeriwe vusiku bya mahlomulo hi masiku.
4Loko ndzi etlela, ndzi ku:
‘Ndzi ta pfuka rini?
Vusiku byi ta xa rini?’
Ndzi karhala hi ku hundzuluka vurhonga byi kondza byi huma.
5Nyama ya mina yi tlhomene hi swivungu ni mabuwu ya misava
Nhlonge ya mina yi oma, yi tlhela yi huma vuvopfu.
6Masiku ya mina ma tsemiwa hi ku hatlisa kukota xiluko xa muluki,
Ma hangalaka, ku nga ri na ku tshemba.
7“Yehovha tsundzuka leswaku vutomi bya mina i ku huhuta ntsena,
Mahlo ya mina ma nga ha voni ku tsaka;
8Tihlo ra la vonaka a ri nga ha tlheli ri ndzi vona;
Mahlo ya wena ma ta ndzi lava, kutani ndzi ta va ndzi nga ha ri kona,
9Mapapa ma hangalakile, ma mukile;
Hi sweswo, ni loyi a rhelelaka exivandleni xa vafi, a nga na ku tlhela kona.
10A nga ha vuyeli endlwini ya yena,
Vuako bya yena a byi nga n'wi tivi.
11“Loko swi ri tano ndzi nga ka ndzi nga tipfali nomu,
Kambe ndzi ta vulavula hi gome ra mbilu ya mina,
Ndzi ta humesa ku bava ka moya wa mina.
12Xana ndzi lwandle, kumbe dragona,
Leswi u ndzi vekeleke valanguteri?
13Loko ndzi ku: ‘Masangu ya mina ma ta ndzi wisisa,’
Xilawu xa mina xi ta olovisa ku vaviseka ka mina,
14Kava laha u ndzi khindlimusaka hi milorho,
U ndzi rhurhumerisa hi mahlori.
15Hilaha mbilu ya mina yi nga hlawula mbitsi ni ku fa!
Ku tlurisa loko ndzi hlayisa marhambu lawa!
16Ndzi phiriwa hi ku hanya!
A ndzi rhandzi ku hanya hilaha ku nga heriki!
Ndzi tshike, hikuva masiku ya mina i huhuto ntsena,
17Munhu i yini leswaku u n'wi endla lonkulu,
Ni leswaku u n'wi tsetselela;
18U va u n'wi endzela hi siku rin'wana ni rin'wana,
U n'wi ringa hi mikarhi hinkwayo xana?
19U ta tshika rini ku ndzi xondzolota hi mahlo,
U ta ndzi ha rini nkarhi wa ku mita marhi?
20Loko kumbe ndzi endlile xivi,
ndzi ku endlele yini, wena mulanguteri wa vanhu?
U ndzi veke ha yini lexi u copaka nseve wa wena ka xona,
Ndzi hundzuka ndzi va ndzhwalo eka mina,
21A ku ndzi khomeri ku dyoha ka mina ha yini,
U va u susa ku homboloka ka mina-ke?
Hikuva ndzi ya etlela entshurini,
U ta ndzi lava, kutani ndzi ta pfumaleka.”
