YOBO 6

₂“Loko swange ku ringanisiwa ku vaviseka ka mina,

Ni loko makhombo ya mina, na wona, ma nga vekiwa exikalweni!

₃A swi ta tlula sava ra lwandle hi ku tika,

Hikwalaho marito ya mina ma hungukile!

₄Miseve ya lowa matimba yi ndzi tlhavile,

Mbilu ya mina yi nwile vuxungu bya yona;

Michavo ya Xikwembu yi sisimukile ku ndzi lwisa.

₅Xana mbhongolo ya nhova yi rila exinambyaneni?

Kumbe homu yi nga bonga ebyanyini lebyi teleke xana?

₆Leswi phyamaka swi nga dyiwa loko munyu wu nga ri kona xana?

Ntsutsu wa tandza wa twakala xana?

₇Leswi moya wa mina wu alaka ku swi khumba,

Hi swona swakudya swa mina leswi ndzi nyenyetsaka.

₈“Oho! Loko ingi ku kombela ka mina ku endleka,

Ni loko Xikwembu xi ndzi nyika lexi ndzi xi languteleke!

₉Loko Xikwembu xi nga pfumela ku ndzi pfurhakanya,

Xi tshambuluta voko ra xona leswaku xi ndzi heta;

₁₀Loko ngi swi tano, ngi ndzi ta va ni ku chavelela,

Ni ku tsaka emakhombyeni lawa ndzi tikeriwaka ha wona,

Hikuva a ndzi tlulanga ku lerisa ka Lowo kwetsima.

₁₁Matimba ya mina hi wahi leswaku ndzi va ni ku tshemba?

Ku hela ka mina hi kwihi leswaku ndzi yingisela?

₁₂Xana matimba ya mina i matimba ya ribye xana?

Miri wa mina i wa nsimbhi xana?

₁₃A ndzi ku, a ku na ku pfuniwa eka mina,

Ku kutsuriwa ku tshinele ekule na mina xana?

₁₄“Maxaka ya la vavisekaka ma fanele ku n'wi twela vusiwana,

Hikuva a nga tshika ku chava Lowa matimba hinkwawo.

₁₅Vamakwerhu va tele ku kanganyisa kukota boboma.

Kukota mati ya xinambyana lama nyumbaka.

₁₆Ma tiya hi xirhami,

Ni gamboko ri tiwisela kona.

₁₇Ma phya hi nkarhi wa mumu,

Ma nyuka loko dyambu ri hisa.

₁₈Mavandla ya vafambi ma tingatinga hi ndlela ya wona,

Ma nghena emananga, ma lova kona.

₁₉Mavandla ya Tema a ma kongomile kona,

Vafambi va Xeba va tele hi ku tshemba.

₂₀Kutani va tela hi tingana hikwalaho ka ku tshemba ka vona;

Loko va fikile kona va va ni gome.

₂₁Swi tano na n'wina, mi herile,

Mi vona khombo ra mina, kutani ma chava!

₂₂Xana ndzi te eka n'wina: ‘Ndzi heni,

Ndzi humeseleni tinyiko hi rifuwo ra n'wina,’ xana?

₂₃Ndzi lamuleleni emavokweni ya nala,

Ndzi kutsuleni emavokweni ya lavo biha!

₂₄“Ndzi dyondziseni, ndzi ta miyela,

Ndzi hlamuseleni laha ndzi hoxeke.

₂₅Marito lamanene ma ni matimba swonghasi!

Kambe ku tshinyiwa ka n'wina ku tshinyela yini xana?

₂₆Xana ku vulavula ka mina ma ku tshinya xana?

Leswi timhaka ta la nga ni gome wu nga moya ntsena-ke?

₂₇Mi tikerisa xisiwana,

Mi celela nakuloni marindzi.

₂₈Kambe mi nga ndzi langutisa!

Ndzi nga ka ndzi nga mi hembeli emahlweni ka n'wina.

₂₉Tlhelani, mi nga hunguki;

Tlhelani, mi vonisisa ku lulama ka mina.

₃₀Xana leswo homboloka swi kona ra mina;

Malaka ya mina a ma tivi ku hlawula swo biha-ke?