1Kutani Elifasi wa Temani, a hlamula, a ku:
2“Loko hi tiya ku vulavula na wena, xana hi ta ku karhata-ke?
Kambe la nga tibohaka i mani, leswaku a nga vulavuri?
3Vona, a u dyondzisa vanhu lavo tala,
U tiyisa va mavoko lama karheleke:
4Rito ra wena a ri pfuxa lava heleke matimba,
U tiyisa matsolo la ma rhekarhekaka.
5Kutani loko khombo ri ku humelele, wa tsana!
Loko ri ku khumbile, wa nembuluka!
6Vukhongeri bya wena a hi ku tshemba ka wena xana?
Xana a ku titshembisi hi ku pfumala nandzu eku hanyeni ka wena xana?
7“Wa nga tsundzuka, i mani a nga lova a nga ri na nandzu?
Va kwihi lavo lulama lava nga lovisiwa?
8Mina ndzi swi vonile, lava rimeke ku homboloka,
Va byale ku pfilunganya, va tshovele swona;
9Va lovile hi ku huhuta ka Xikwembu,
Va herisiwile hi ku hefemula ka ku kariha ka xona.
10Ku dzumadzuma ka nghala ku herile,
Meno ya tinghalanyana ma tshoviwile;
11Nghala leyi tiyeke yi fa hi ku pfumala,
Kutani swivanana swa nghala ya ntswele swi hangalasiwile.
12“Kambe ndzi fikeriwe hi rito rin'wana,
Ndleve ya mina yi twa mahlevo ya rona.
13Kakuloko mianakanyo yi pfuxiwa hi ku vona ka vusiku,
Enkarhini lowu vurhongo byi khomaka vanhu,
14Ku tshuka ni ku rhurhumela swi ndzi wela ehenhla,
Swi dzedzemerisa ni marhambu ya mina hinkwawo;
15Ndzhuti wu hundza emahlweni ka mina,
Misisi hinkwayo ya mina yi ku dzuu.
16Xifaniso lexi ndzi nga tsandzeka ku hlamula xiyimo xa xona, xi yima emahlweni ka mina.
Ndzi twa ku te ti-ti-ti, kutani rito ri vulavula khwatsi na mina,
ri ku:
17‘Xana wa ku fa a nga lulama emahlweni ka Xikwembu xana?
Kumbe munhu a nga basa emahlweni ka muvumbi wa yena xana?
18Vona, swi tsandza ni malandza ya xona, a xi va tshembi,
Xi vona vuhunguki ni le ka tintsumi ta xona!
19Swi nga vi tano ngopfu eka lava akeke tindlu ta vumba!
Va humile entshurini, va phyandlasiwa kukotisa xivungu.
20Ku sungula nimixo ku fika madyambu, va khandliwa,
Va lova hilaha ku nga heriki, va nga tsundzukiwi;
21Risinga leri tiyisaka vutomi bya vona ri tsemiwa,
Va fa, va nga si kuma vutlhari.’
