YOBO 37

₁“Kunene mbilu ya mina yi tshukile;

Yi khindlimuka yi huma ematshan'weni ya yona.

₂Yingisani ku pfuma ka rito ra xona,

Ni mpfumawulo lowu humaka enon'wini wa xona!

₃Wu twakala hinkwako empfhukeni wa le tilweni,

Tindlati ta xona ti ya fika emakun'wini ya misava.

₄Kutani rito ra xona ri pfuma, xi ri pfumisa hi vukulu bya xona;

Kambe a xi pfali tindlati loko rito ra xona ri twakala.

₅Hi rito ra xona Xikwembu xi pfuma hi mukhuva lowu hlamarisaka,

Xi endla swilo leswikulu leswi hi tsandzekaka ku swi twisisa.

₆Xi ku eka gamboko: ‘Nela emisaveni,’

Xi vurisa sweswo eka mpfula, ni ka makhukhumba lamakulu.

₇Kavaloko xi fungha mavoko ya vanhu hinkwavo,

Leswaku vanhu hinkwavo lava xi va vumbeke va xi tivisisa.

₈Swivandzana swi kokovela emabakweni ya swona,

Swi tshama emiceleni ya swona.

₉Xihuhuri xi huma edzongeni,

Moya lowu pfaka en'walungwini wu tisa xirhami.

₁₀Hi ku huhutela ka Xikwembu

ku huma gamboko,

Ni mati yo khuluka ma tiya hi xirhami.

₁₁Kambe xi rhwexa mapapa hi mati,

Xi tsutsumisa mapapa, ma rhwele ndlati ya xona.

₁₂Ma tihundzuluxa hinkwako laha ma byeriwaka kona,

Ma tirha hinkwaswo hi laha ma lerisiweke hakona

Erivaleni ra misava leyi akiweke hi vanhu;

₁₃Yi nga va nhonga leyi xi baka misava ha yona,

Kumbe xi nga humesa ha wona ku kateka ka xona.

₁₄“Wee Yobo, yingisa mhaka leyi hi tindleve;

Yima la, u tsundzuka masingita ya Xikwembu.

₁₅Xana u tiva hi laha Xikwembu xi ma kaneleke hakona?

Ni laha xi hatimisaka rihati epapeni ra xona?

₁₆Xana wa twisisa ntshamelo ya mapapa?

Ni masingita ya la hetisekeke hi vutlhari?

₁₇Swiambalo swa wena swi kufumela ha yini,

Loko misava yi rhula emhehweni ya le dzongeni?

₁₈Xana u nga tiva ku andlala xibakabaka xa le tilweni kukotisa yena,

U xi tiyisa kukota xivonivoni xa nsimbhi leyi chuluriweke?

₁₉Hi dyondzise lexi hi nga n'wi byelaka xona;

Hikuva munyama wa hina wu hi sivela ni ku vula mhaka na yin'we.

₂₀I mani la nga yisaka eka xona marito ya mina?

Kumbe i mani la navelaka ku mitiwa?

₂₁“Kasi munhu wa tsandzeka ku languta dyambu

Loko ri hatima empfhukeni wa le tilweni,

Loko mheho yi hundzile yi wu kukurile.

₂₂Ku hatima loku nga ka nsuku ku huma en'walungwini;

Xikwembu xi rhendzeriwa hi ku kwetsima loku chavisaka.

₂₃Hi nga ka hi nga tshineli Lowa matimba hinkwawo,

U tlakukile hi matimba, ni ku twisisa, ni ku lulama hinkwako,

A nga hlamuli nchumu.

₂₄Hikwalaho, vanhu va fanele ku chava Xikwembu;

A xi languti la tshembaka vutlhari bya yena.”