YOBO 35

₂“Xana u ri i mhaka yo lulama loko u te:

‘Ndzi tlula Xikwembu hi ku lulama?’

₃Hikuva u vutisa, u ku: ‘Ndzi fuwa yini?

Ndzi ta kuma yini loko ndzi nga dyohi?’

₄Mina ndzi ta ku hlamula,

Ni vanakuloni lava u nga na vona.

₅Languta matilo, u ma vonisisa!

Languta mapapa hikuva ma tlakukile ngopfu ehenhla ka wena!

₆Loko u dyoha, u n'wi onhela yini?

Ni loko u andzisa ku homboloka ka wena, u n'wi endle yini?

₇Loko u lulamile, u n'wi nyika yini?

U amukela yini evokweni ra wena-ke?

₈Ku biha ka wena ku nga onha munhu wo kotisa wena,

Ku lulama ka wena ku nga pfuna n'wana wa munhu ntsena.

₉“Va huwelela hikwalaho ka vunyingi bya lava xanisaka,

Va rila ehansi ka ku nonon'hwa ka vamatimba.

₁₀Kambe a va vutisi, va ku:

‘Xikwembu, muvumbi wa mina u kwihi-ke?

Xona lexi nyikaka munhu nivusiku tinsimu ta ku tsaka,

₁₁Xi hi nyikile ku twisisa loku tlulaka ka swiharhi,

Ni vutlhari lebyi tlulaka bya tinyanyana ta le tilweni.’

₁₂Va huwelela, kambe a xi hlamuli,

Hikwalaho ka ku tikukumuxa ka lavo biha.

₁₃Xikwembu xi nga ka xi nga twi mikhongelo ya swahava,

Lowa matimba hinkwawo a nga ka a nga swi languti.

₁₄Hambiloko u vula leswaku a ku xi voni,

Mhaka ya wena yi le mahlweni ka xona; u xi langutela!

₁₅Kambe, hikuva vukari bya xona a byi si ba,

A hi leswaku a nga anakanyi ngopfu vuhunguki.

₁₆Hikwalaho Yobo a ahlamisa nomu ntsena,

A andzisa marito lama nga twakariki.”