YOBO 34

₂“N'wina lavo tlhariha, yingisani timhaka ta mina!

Rhiyani tindleve, n'wina vini va ku twisisa!

₃Hikuva ndleve yi ringa timhaka,

Kukota malaka loko ma nantswa swakudya.

₄A hi laveni leswi lulameke,

Hi languta swin'we leswi nga ni vunene.

₅Hikuva Yobo u te: ‘Ndzi lulamile,

Xikwembu xi kanetile ku lulama ka mina.

₆Hambi ndzi lulamile, ndzi endliwa muhembi;

Ndzi tlhaviwile hi nseve lowu dlayaka, ndzi nga ri na nandzu.’

₇Munhu i mani la kotisaka Yobo,

La nwaka mapfindlu kukota mati xana?

₈Hikuva a famba exikarhi ka lavo biha,

A longoloka ni swidyohi.

₉Hikuva u te:

‘Munhu a nga pfuniwi nchumu,

Hi ku tsakela ku va na Xikwembu.’

₁₀“Hikwalaho n'wina vavanuna vo twisisa, ndzi yingiseni!

Swo biha swi le kule na Xikwembu;

A ku na ku homboloka eka Lowa matimba hinkwawo!

₁₁Hikuva u tlherisela eka munhu leswi ringanaka mitirho ya yena.

U n'wi nyika ku ringana mikhuva ya yena.

₁₂Kunene, Xikwembu a xi endli lexi nga lulamangiki;

Lowa matimba hinkwawo a nga ka a nga hombolosi ku lulama.

₁₃I mani loyi a vekeke misava eku leriseni ka yena?

I mani la n'wi tshembiseke xirhendzevutana xa misava hinkwayo?

₁₄Loko xi tianakanya xi ri xoxe ntsena,

Loko xi titekela moya wa xona ni ku huhutela ka xona,

₁₅Nyama hinkwayo ingi yi ta fa kan'we,

Munhu u ta tlhelela entshurini.

₁₆“Loko u ni ku twisisa, yingisa mhaka leyi,

U yingisisa mpfumawulo wa marito ya mina!

₁₇La vengaka ku lulama u ta fuma xana?

Kumbe u nga kaneta lowo lulama ha kunene-ke?

₁₈Xana va ta ku eka hosi:

‘U bihile!’ ni ka tihosana: ‘Mi vadyohi?’

₁₉Xikwembu a xi yi hi nghohe ya tihosi,

A xi languti vafuwi ku tlula swisiwana;

Hikuva hinkwavo i mitirho ya mavoko ya xona.

₂₀Va ku fa hi nkarhinyana,

Exikarhi ka vusiku, vanhu va tiko va tsekatseka, va hundza;

Lava matimba va tlherisiwa,

ku nga ri hi voko ra munhu.

₂₁“Hikuva mahlo ya xona ma languta mikhuva ya vanhu.

Xi languta mafambele ya vona hinkwawo.

₂₂A ku na munyama, a ku na mindzhuti ya rifu,

Laha vadyohi va nga tumbelaka kona.

₂₃Hikuva Xikwembu a xi lavi nkarhi lowo leha ku tiva munhu;

Xi ta n'wi humesa eku avanyisiweni emahlweni ka xona;

₂₄Xi pfutlakanya vamatimba, xi nga vutisi nchumu,

Xi veka van'wana ematshan'weni ya vona;

₂₅Hikuva xi tiva mitirho ya vona,

Xi va wisa nivusiku, xi va phyandlasa;

₂₆xi va ba kukota swidyohi,

Emahlweni ka vanhu hinkwavo,

₂₇Hikuva va xi fularhele;

A va xiyangi tindlela hinkwato ta xona.

₂₈Va tlhandlukisile eka xona mihuwelelo ya swisiwana;

Xi twile mikosi ya vanhlomulo.

₂₉Loko xi va humesela ku rhula, i mani la nga endlaka dzolonga xana?

Loko xi fihla mombo wa xona, i mani la nga ta xi vona?

Xi fuma matiko ni vanhu hi mukhuva wun'we,

₃₀Leswaku munhu wa mbabva a nga tshuki a fuma,

Vanhu va nga ti phasiwa.

₃₁“Hikuva xana u kona la nga ku eka Xikwembu.

‘Ndzi biwile, a ndzi nga ha tlheli ndzi dyoha.

₃₂Ndzi kombe lexi ndzi nga xi voniki,

Loko kumbe ndzi dyohile, a ndzi nga ha swi endli’?

₃₃Xana Xikwembu xi ta vutisa wena loko xi avanyisa?

Hi wena la fanelaka ku hlawula ku nga ri mina,

Loko swi ri tano, humesa leswi u swi tivaka!

₃₄Vavanuna va ku twisisa va ta vula kukota mina.

Ni munhu wo tlhariha, la ndzi yingisaka, u ta ku:

₃₅‘Yobo a nga vulavuri hi ku twisisa,

Timhaka ta yena a ti twakali.’

₃₆Ingi ndzi rhandza leswaku u ringiwa

ku yisa emahlweni,

Leswi a hlamuleke hi mukhuva wa lavo biha!

₃₇Hikuva u engeterile ku dyoha ka yena hi ku homboloka,

A phokotela mavoko exikarhi ka hina,

A andzisa marito ya yena ku pfuka Xikwembu.”